ءداستۇر مەن ءدىندى دارىپتەگەن
قازاقستان مۇسىلماندارى ءدىني باسقارماسىنىڭ ءدىني ۋاعىز-ناسيحات جانە ينتەرنەتپەن جۇمىس ءبولىمىنىڭ مەڭگەرۋشىسى ەرشات وڭعاروۆتىڭ “قازاق مادەنيەتى جانە يسلام قۇندىلىقتارى” اتتى عىلىمي مونوگرافياسى وقىرماندارعا جول تارتتى.
بۇل ەڭبەك يسلام دىنىندەگى قۇندىلىقتاردى مادەني انتروپولوگيالىق فەنومەن رەتىندە قاراستىرىپ, قازاق مادەنيەتىندەگى يسلام ءدىنىنىڭ ەتيكالىق ۇعىمدار باستاۋلارىن فيلوسوفيالىق, تاريحي, مادەنيەتتانۋ, ءدىنتانۋ سەكىلدى عىلىمدار توعىسىندا, كەڭ پانارالىق شەڭبەردە زەرتتەيدى. قازاقستانداعى مۇسىلماندىق دۇنيەتانىمنىڭ اكسيولوگيالىق سيپاتتاماسىن مادەنيەتتانۋلىق تۇرعىدان تالدايدى. سونىمەن قاتار, يسلام فيلوسوفياسىنداعى ەل بىرلىگى, ءداستۇرلى دىنگە جات راديكالدى اعىمداردىڭ تارالماۋىنىڭ وڭتايلى ماسەلەلەرى تۋرالى عىلىمي ىزدەنىس-زەرتتەۋلەرى ۇسىنىلعان.
ۇلتتىق اكادەميالىق كىتاپحانادا وتكەن “قازاق مادەنيەتى جانە يسلام قۇندىلىقتارى” كىتابىنىڭ تانىستىرىلىمىنا ءدىنتانۋشىلار, تەولوگتار جانە استانالىق جاماعات قاتىستى.
ءدىنتانۋشىلار كونگرەسىنىڭ توراعاسى, جازۋشى عاريفوللا ەسىم جاڭا ەڭبەكتىڭ تەوريالىق تۇرعىدان جوعارى باعالاناتىنىنا سەنىمىن ءبىلدىرىپ, ەلىمىزدەگى قازىرگى احۋالدى اڭگىمەلەدى.
ايشا دامبۋلشاەۆا