ءار زاماننىڭ ءوز باتىرلارى, ونەگە تۇتار تۇلعالارى بولادى ەكەن. ەرتەرەك ءبىر كەزدەردە ءدىن تاراتۋشىلار ىقپالدى بولىپتى. كەيىندەۋ – بالا وقىتۋشى ۇستازدار… ال ءوزىمىز كورىپ, اقىل-كەڭەسىنە جۇگىنىپ جۇرگەن قالامگەر اعا-اپالارىمىز كەڭەستىك داۋىردە سۋرەتشىلەر, جازۋشىلار, عالىمدار مەن ەڭبەك ادامدارىنىڭ جۇلدىزى جوعارى بولعانىن ايتادى.
بۇگىن شە؟..
«تەلەديدار قانداي بولسا, قوعام سونداي» دەيتىن قاعيدا بار. تەلەباعدارلامالاردىڭ ءبارى دەرلىك ساحنا ساڭلاقتارىنىڭ ونەرى مەن ءومىرىن, ءتىپتى, كۇندەلىكتى تۇرمىس-تىرشىلىگىن ناسيحاتتاۋعا ارنالىپ كەلەدى. ونەر ادامدارىنىڭ كيگەن كيىمى, ىشكەن اسى – تەلەجۋرناليستەردىڭ كورگەن-باققانى. الايدا, قوعامداعى ەلەۋلى وقيعالار كەزىندە ەلدى اۋزىنا قاراتىپ قويىپ, ەستى ءسوز ايتۋعا سول «جۇلدىزداردىڭ» ورەسى جەتىپ ءجۇر مە؟ بۇقارا حالىق داعدارىپ, الدەبىر قاۋىپ-كۇدىك الدىندا تۇرعاندا كىمگە جۇگىنىپ, كىمنەن سۇيەنىش ىزدەيدى؟..
ال كوگىلدىر ەكراندى ويىن-ساۋىق پەن ءان-كۇي, شوۋ, جەڭىل اڭگىمەلەر جاۋلاعانى جاستاردىڭ تاربيەسىنە قالاي اسەر ەتەدى؟..
بۇل تاقىرىپتا ءبىزدىڭ قوعامدا, اسىرەسە, الەۋمەتتىك جەلىلەردە وقتىن-وقتىن وي-پىكىرلەر ايتىلىپ تۇرادى. ايتسە دە, ءبىز بۇگىن «ەندىگى تۇلعالار كىمدەر, جاستار كىمدەردى يدەال تۇتىپ, كىمدەرگە قاراپ بوي تۇزەپ ءجۇر» دەگەن ساۋالدار بويىنشا زامانداستارىمىزدىڭ پىكىرىن سۇراپ كوردىك.
سەرىكزات دۇيسەنعازين,
ايتىس اقىنى:
جاپپاي انشىلەردەن تۇلعا جاساۋ – جاقسىلىققا اپارمايدى
ىلگەرىدە اقىن-جازۋشىلاردىڭ كىتاپتارى, گازەت-جۋرنالدار ءجۇز مىڭداعان تيراجبەن شىعاتىن. قالادان بولەك اۋدان ورتالىقتارىنا, اۋىل-اۋىلدارعا, بولىمشەلەرگە, ءتىپتى, مالشى قىستاقتارىنا دەيىن جۇيەلى تۇردە جەتكىزىلىپ تۇراتىن ەدى. بۇكىل ەل كولەمىندە جازىلعان جاڭا كوركەم شىعارمالار, عىلىمي ەڭبەكتەر مەرزىمدى ءباسپاسوز ارقىلى تانىستىرىلىپ جاتاتىن. قازىر سول جۇيەنى السىرەتىپ الدىق.
ەكىنشىدەن, بۇكىل ەلىمىزدە ءبىر-ەكى تەلەارنا عانا بولاتىن. ونىڭ ەفيرى كوركەمدىك كەڭەس ارقىلى سۇرىپتالىپ, ەڭ ماڭىزدى ماسەلەلەر عانا قوزعالاتىن. جازۋشىلارىمىز, عالىمدارىمىز راديو-تەلەارنالاردان سول ۋاقىتتىڭ وزەكتى تاقىرىپتارىن تالقىلاپ تۇراتىن. ارينە, تسەنزۋرا دا بولدى. دەگەنمەن, ساپاعا باسا ءمان بەرىلەتىن. ال قازىر كوممەرتسيالىق تەلەارنالار كوبەيىپ, وسى ءۇردىستى بۇزدى. ەفيرلەرىمىز ءمانسىز-ماعىناسىز شەتەلدىك دۇنيەلەرگە تولدى. سولارعا ەلىكتەگەن جاس انشىلەرىمىز اتى قازاقشا بولعانىمەن, ءسوزى دە, ءوزى دە تۇسىنىكسىز اندەر جازىپ, كەيىنگى بۋىننىڭ سانا-سەزىمىن ۋلاپ جاتقانى – اششى شىندىق. وعان ينتەرنەتتەگى الەۋمەتتىك جەلىلەردىڭ دە اسەرى بار. ارنالارىمىز رەيتينگ جيناۋ دەگەن باسەكەگە ءتۇسىپ, كورەرمەن تارتۋ ءۇشىن انشىلەرىمىزدى جۇرگىزۋشى رەتىندە ەكرانعا شىعارۋدى كوبەيتتى. انشىلەردىڭ اراسىندا دا ينتەللەكتۋالدىق دەڭگەيى جوعارى ازاماتتار بار. ولاردىڭ ءبىرازى جۋرناليستيكا, تەاتر سالاسىندا جوعارى ءبىلىم العان. وعان قارسىلىعىم جوق. بىراق, بارلىعى بىردەي سولاي دەۋگە بولمايدى. اقشانىڭ كۇشىمەن شەتەلدە كليپتەر ءتۇسىرىپ, تانىلعان كەيبىر جاس انشىلەرىمىزدى قالاي تۇلعا دەي الامىز؟ كەيبىرەۋى ەكى ءسوزدىڭ باسىن قۇراپ ايتا الماۋى دا مۇمكىن. سولاردى ەكرانعا تەلەجۇرگىزۋشى رەتىندە شىعارعاندا شىنىن ايتايىن, قاتتى نامىستانام! نەبىر مىقتى جۋرناليستەر, جۇرگىزۋشىلەر تۇرعاندا ارنايى ءبىلىمى جوق انشىلەردى شىعارىپ, رەيتينگ ناۋقانىنا ۇرىنىپ جاتقانىمىز وكىنىشتى.
كەزىندە انشىلەردەن دە كەرەمەت تۇلعالار شىققان. جۇسىپبەك ەلەبەكوۆ, عاريفوللا قۇرمانعاليەۆ, بيبىگۇل تولەگەنوۆا, قايرات بايبوسىنوۆ, «دوس-مۇقاسان» ءانسامبلىنىڭ مۇشەلەرى ءوز زامانىنىڭ ۇلگى تۇتار ازاماتتارى بولدى عوي. قازىر دە «مۇزارت», «بايتەرەك» توبى, دوسىمجان تاڭاتاروۆ, اقان ءابدىۋالى, ەرلان رىسقالي, تاعى باسقالار سياقتى ءوز سالاسىندا كاسىبي دەڭگەيى جوعارى انشىلەر بار. ولار تۇلعا بولسا رەنجىمەيمىز. ونسىز تاعى بولمايدى. ال جاپپاي انشىلەردەن تۇلعا جاساۋ ناۋقانى جاقسىلىققا اپارمايدى. مەن وعان قارسىمىن. ەلىمىزدە اشىلىپ جاتقان عىلىمي جاڭالىقتاردى, كىتاپتاردى ناسيحاتتايتىن تەلەباعدارلامالاردى كوبەيتۋ كەرەك. مەكتەپ باعدارلامالارىندا تۇلعاتانۋ ساباقتارىن كوبەيتۋ كەرەك. كوممەرتسيالىق ارنالاردى دا ءوز تۇلعالارىمىزدى ناسيحاتتاۋعا مەملەكەت تاراپىنان مىندەتتەۋ كەرەك. سوندا كەلەشەگىمىز جارقىن بولماق.
ايگۇل بولاتحانقىزى, «بالا تاربيەسى» جۋرنالىنىڭ رەداكتورى:
ءبىز ءۇشىن «جۇلدىزدار» ەڭبەك ادامدارى بولدى
«وتكەنگە تاس اتساڭ, بولاشاق ساعان وق اتادى» دەگەن ءبىر جاقسى ءسوز بار… مەن كەڭەس وداعىن كوكسەپ وتىرعانىم جوق, دەسەم دە, كەيدە سول كەزدىڭ وزىنە ءتان ءتارتىبىن اڭسايتىنىم راس… ءبىز ن.وستروۆسكيدىڭ «قۇرىش قالاي شىنىقتى؟» اتتى كىتابىن وقىپ وستىك. «باتىر بالا بولاتبەك» دەپ اندەتىپ وسكەندىكتەن بە, سول كەزدەگى ادامداردىڭ بويىنداعى قايسارلىق, جىگەرلىلىك, وجەتتىك قاسيەتتەرى بۇگىنگىگە قاراعاندا وزگەشەلەۋ كورىنەتىنى راس…
وزىمە دە, ءوزىمنىڭ اينالاما دا ەرەكشە اسەر ەتكەن نارسە – كەزىندە اۋىل شارۋاشىلىعىن دامىتۋعا ەلەۋلى ۇلەس قوسقان مەحانيزاتور, سوتسياليستىك ەڭبەك ەرى كامشات دونەنباەۆا مەن مەحانيزاتور, سوتسياليستىك ەڭبەك ەرى جادىرا تاسپانبەتوۆا جايلى سول كەزدەگى, ياعني, بالا كەزىمىزدەگى گازەت-جۋرنالدارعا شىققان ماقالالار مەن سۋرەتتەر. بۇگىنگى جاستارعا بۇل ءتىپتى كۇلكىلى كورىنۋى مۇمكىن. بىراق, ءبىزدىڭ بالا كەزىمىزدە ول كىسىلەرگە ۇلكەن قۇرمەتپەن قارايتىن. ويتكەنى, سول ادامدار ەڭبەك مايتالماندارى بولاتىن. جالقاۋلىقتىڭ قاس جاۋىنداي كورىنەتىن ولار. قايسىسىن الساق تا: زىليحا تامشىباەۆا, ناتاليا گەللەرت… مىسالى, مەكتەپ بىتىرە سالا اۋەلى تراكتور, كەيىن كومباين ءرۋلىن يگەرگەن جادىرا تاسپانبەتوۆانىڭ تالاي كوركەم شىعارماعا, ءان-جىرعا ارقاۋ بولعانىن ءبارى بىلەدى. ول كومباين بۋنكەرى شنەگىنە اياعى ءىلىنىپ, مۇگەدەك بولىپ قالعان. الايدا, كەيىن پروتەز اياعىمەن دە كومباين جۇرگىزدى. وسىنداي جانقيارلىق ەڭبەگىمەن جاستارعا ۇلگى بولدى. ومىرسۇيگىشتىگى, ەڭبەكقورلىعى, وتانشىلدىعى ارقاسىندا بيىك دارەجەلەرگە جەتتى. كسر جوعارعى كەڭەسىنىڭ دەپۋتاتى بولدى. مارتەبەلى اتاق-دارەجەلەر الدى. مىنە, بىزگە ۇلگى بولعان وسىنداي اپالار بولاتىن…
ءبىزدىڭ اۋىلدا دا تراكتوردى شىرق ۇيىرەتىن ايگۇل دەگەن جەرلەسىم بولدى. بۇگىنگى ەكراننىڭ بەتىن جاۋلاپ العان انشىلەردەي ەمەس, ءبىز ءۇشىن «جۇلدىزدار» سول ەڭبەك ادامدارى بولدى.
ءازىلحان نۇرشايىقوۆتىڭ «ماحاببات قىزىق مول جىلدارىن» وقىماعان ادام جوق شىعار. قىز بىتكەننىڭ بارىنە مەڭتاي يدەال كورىنۋشى ەدى. مەڭتايعا ەلىكتەيتىنبىز, مەڭتايداي بولعىمىز كەلەتىن. ءار قىزدىڭ جۇرەك تۇكپىرىندە ەربولعا دەگەن قۇرمەت جاتتى. قازاق جىگىتتەرىنىڭ ەربولداي بولعانىن قالادى. مۇنىڭ بارلىعى كىتاپقۇمار بولىپ وسكەنىمىزدىڭ جەمىسى شىعار. سولارداي بولساق دەپ ارماندادىق, ەلىكتەدىك.
بۇگىنگى جاستار تەك انشىلەرگە عانا ەلىكتەيدى. سولارعا ۇقساعىسى كەلەدى. سولارداي بولۋعا ۇمتىلادى. ويتكەنى, قازىر وتە ءجيى ناسيحاتتالاتىن – تەك انشىلەر قاۋىمى. بۇگىنگى بالالار ءبىز سياقتى «ۇشقىش بولامىن», «كوسموناۆت بولامىن», «ساتۋشى بولامىن» دەپ سان ءتۇرلى ماماندىقتى ايتىپ, ارمانداي المايتىن دا سياقتى بولىپ كورىنەدى ماعان. كىم ءبىلسىن, «ءار زاماننىڭ ءوز سۇرقىلتايى بولادى» دەگەن…
قوعامدى تەك انشىلەر بيلەپ تۇرعانداي اسەر ەتۋ – ءبىرىنشى سەبەپ بولسا, ەكىنشىدەن, بىزدەگى «ءتىل ەركىندىگى» بالا ارمانىنا توسقاۋىل قويىپ تاستاعان سياقتى, الدە ماعان سولاي كورىنەدى مە ەكەن؟.. ءبىز سياقتى «بولماساڭ دا ۇقساپ باعۋعا» تالپىنبايتىن سەبەبى – بۇگىن جەر-كوككە سىيعىزباي ماقتاعان تۇلعانى ەرتەڭىندە تابانعا سالىپ تاپتاۋ, جامانداۋ… وسىنى وقىپ-كورىپ وسكەن بالادا قانداي يدەال بولسىن؟
«يدەال» دەگەندى مۇلدە باسقاشا تۇسىنەتىن ادامدار دا بار. وزگەنى ەمەس, ءوز باسىمنان ءوتىپ جاتقاندى ايتسام… جاسىرمايمىن, مەنىڭ يدەالىم – باتىر اتامىز باۋىرجان مومىشۇلىنىڭ كەلىنى زەينەپ احمەتوۆا. ول – كورگەندى كەلىن, اياۋلى انا, كەمەڭگەر اجە… ول – ماعان تاربيەنىڭ ايتۋدان ەمەس, كورسەتۋدەن سىڭەتىنىن سوزىمەن دە, ىسىمەن دە دالەلدەپ كەلە جاتقان كىسى. زەينەپ اپادان ەستىگەنىمدى جان-جاعىما ايتىپ تا جۇرەمىن. ەندى مىنا قىزىقتى قاراڭىز, «زەينەپ اپانىڭ جانىندا ءجۇرىپ, نەگە باسىڭا ورامال سالمايسىڭ؟», «نەگە شالبار كيەسىڭ؟», قويشى, ايتەۋىر, بولمايتىن سۇراقتاردى قويادى, كيىمدەرىم مەن مىنەزىمنەن ءمىن ىزدەيدى… قۇداي-اۋ, قازاقتا زەينەپ احمەتوۆا بىرەۋ عوي. ونى قايتالاۋ مۇمكىن ەمەس, ولاي بولمايدى دا!
وكىنىشكە قاراي, ازىرگە بىزدەگى «يدەال» ۇعىمى وسىنداي بولىپ تۇر…
اڭساعان مۇستافا, سۋرەتشى:
تەلەديداردان كىم كوپ شىقسا, سول جاستاردىڭ يدەالىنا اينالادى
مەن ءۇشىن بۇگىنگى تۇلعالار – ايدوس سارىم, , عالىم بوقاش, مۇرات ابەنوۆ, ەرلان قارين سەكىلدى ەركىن ويلى, ەلجاندى ازاماتتار. بۇلاردى وقىعان دا قىزىق, پىكىرلەسكەن دە پايدالى. كوپ بىلەدى, ولاردان كوپ نارسە ۇيرەنۋگە بولادى. بۇلار – اعىسقا قارسى جۇزەتىن ادامدار. جاڭا جول تابادى, ءار پروبلەمادان شىعاتىن جاڭا تاسىلدەر ۇسىنادى. بۇعىپ ۇيرەنىپ قالعان ادامداردان جاقسى, تىڭ يدەيا شىقپايدى عوي.
«جاستار كىمدەرگە قاراپ بوي تۇزەيدى؟» دەپ سۇرادىڭىز. جاستاردىڭ كىمگە قاراپ بوي تۇزەيتىندەرىن بىلمەدىم. شىنىمدى ايتسام, نەگە ەكەنىن بىلمەيمىن ارتىستەرگە قاراپ بوي تۇزەيتىندەر كوپ سياقتى. وتكەندە ۋكراينادا بولىپ جاتقان وقيعالاردى تالقىلاعاننان «بىرەۋدىڭ كونتسەرتىنە بىرەۋ كىرە الماي قالىپ, توبەلەسىپ قالىپتى» دەگەن سياقتى ۇساق-تۇيەك اڭگىمەلەر كوبەيگەن. وسىنىڭ ءوزى جاستاردىڭ نە ويلاپ, كىمدەرگە قاراپ بوي تۇزەپ جۇرگەنىن كورسەتەتىن شىعار دەپ ءتۇيدىم, ءوز باسىم. ارينە, «قازانى باسقانىڭ قايعىسى باسقا» دەگەن دە بار. ءبىر جاعىنان شەت ەلدىڭ ارنالارى وتە كوپ, بىزدىكىنەن ون ەسە كوپ, ول دۇرىس ەمەس ءۇردىس.
جاسوسپىرىمدەر, جاستار ءۇشىن كىمدەر يدەالعا اينالىپ ءجۇر؟ تەلەديداردان كوپ كورگەن ادامدار ولارعا يدەالعا اينالادى-اۋ. سوندىقتان, تەلەديداردان تەك ءانشى-بيشىلەردى كورسەتە بەرمەي, ءجونى ءتۇزۋ اڭگىمە, جاستارعا ايتارى مول ادامداردى شاقىرىپ, توك-شوۋلاردىڭ فورماتىن تەك ىرقىل-جىرقىل قىلماي, جوندەۋ كەرەك. ماماندىق وتە كوپ قوي, بىزدىكىلەر تەك يۋريست بولعىسى كەلەدى, اقشانىڭ استىندا قالامىز دەپ ويلايدى. ارينە, اقىلدى جاستار كوپ قوي, سوندا دا ولارعا ەلىكتەيتىن ادامدار كەرەك-اق.
داۋرەن بابامۇراتوۆ,
رەسپۋبليكالىق «بولاشاق»
قوزعالىسىنىڭ جەتەكشىسى:
ۇلتتىق تاربيەگە وزگەرىستەر كەرەك
ءوز باسىم قاسيەتتى ونەرگە جانە ونىڭ شىنايى دارىپتەۋشىلەرىنە ەش قارسىلىعىم جوق. ونەرسىز ۇلت از-اق ۋاقىتتا قۇردىمعا كەتپەك, ونسىز دەربەس ۇلتتى ەلەستەتۋ مۇمكىن ەمەس. بىراق, ونەرگە ەشكىم قارسى ەمەس جانە بولۋى دا مۇمكىن ەمەس دەپ, ونى بارىنشا ساياسيلاندىرا بەرۋگە بولمايدى. سەبەبى, بۋمەرانگتىڭ ەرتەڭ قايتىپ كەلىپ ۇراتىنى و باستان بەلگىلى. ءدال قازىر ءبىز نە كورىپ وتىرمىز؟! ءبىز ۇلت زيالىلارى مەن قوعام قايراتكەرلەرىن انشىلەر جانە تاعى باسقا ونەر يەلەرىمەن الماستىرۋدىڭ باستالعانىن (ياعني, جالعاسىپ كەلە جاتقانىن) كورىپ وتىرمىز. ءانشى «پيار» كەرەك دەپ, ەشبىر سۇراق پەن تاقىرىپتان تايسالمايدى, ياعني, وزدىگىنەن ەفيردەن باس تارتپايدى. بەلگىلى ءبىر جاعدايدا بيلىككە دە سول كەرەك سياقتى, ياعني, قوعام ءۇشىن ماڭىزدى, وتە اۋقىمدى جانە ۇلت تاعدىرىمەن ۇندەس تاقىرىپتاردى تالقىلاۋعا ادەتتە انشىلەر شىعادى. ارينە, ولاردىڭ دا اتالعان تاقىرىپتارعا قاتىستى ءوز ويىن ايتۋعا, جەتكىزۋگە تولىق قۇقى بار. بىراق, ونداي جاعدايدىڭ جاپپاي ورىن الۋى – وتە قاۋىپتى جايت. مەملەكەت و باستان ۇلتتىق جانە وتباسىلىق قۇندىلىقتاردى دارىپتەۋى كەرەك, ول ونىڭ نەگىزگى فۋنكتسياسى جانە وسى ماقساتتا انشىلەردى پايدالانسا دا, مەن قارسى ەمەسپىن. بىراق, كوپشىلىك جاعدايدا ولاي بولماي جاتادى.
مەملەكەت ۇلت بولاشاعى ءۇشىن يدەال مەن كۋميردى ءوزى جاساپ, ونى ۇرپاققا ۇسىنۋى كەرەك. سانالى جانە ساليقالى قوعامنىڭ بارىندە سونداي. بىزدە, بىراق, ول جوق, «ەل ساياساتپەن اينالىسپاسىن» دەگەن نيەتپەن الدەكىمدەر ەكران مەن ەفيردىڭ ءبارىن ويىن-ساۋىقپەن تولتىرىپ تاستاعان. بۇل ارنايى جاسالىپ وتىرعان ساياسات ەكەنى ايتپاسا دا تۇسىنىكتى. مۇنداي ساياسات ۇزاققا بارمايدى, ول تەحنولوگيانى تەك ۋاقىتشا پايدالانۋعا بولادى, ءبىزدىڭ بيلىك بولسا اتالعان ءتاسىلدى شەكتەۋ ۋاقىتىن تىم الىستاتىپ جىبەرگەن سياقتى. ءانشى – دەپۋتات بولۋى مۇمكىن, بىراق ەشقاشان ول ۇزدىك دەپۋتات بولمايدى, سەبەبى, ونىڭ ستيحياسى باسقا, ومىرلىك ماقساتى باسقا…
قالىپتاسقان جاعدايدا, ەگەر ەفير انشىلەردەن بوسامايتىن بولسا, ونسىز دا رەيتينگىسى تومەن وتاندىق ارنالار ودان سايىن قۇلدىراي بەرمەك. وتاندىق ارنالار مەن ۇلتتىق تاربيە باعىتىنا ۇلكەن وزگەرىستەر كەرەك.
ءتۇيىن
پسيحولوگ ليمانا قويشيەۆانىڭ ايتۋىنشا, ادامدىڭ اقپاراتتى قانداي جولمەن ءسىڭىرىپ, جادىنا قالاي جۇكتەيتىنى قانداي سەزىمىنىڭ دامىعانىنا بايلانىستى. كەيبىر جاستاردىڭ ەستىگەنىن ەستە ساقتاۋ قابىلەتى جەتىك بولسا, ەندى ءبىرى كورگەنىن ەستە ساقتاۋعا بەيىم كەلەدى.
دەسە دە, بۇگىنگى كۇنى كىتاپ وقىتۋ, اقىل ايتۋ ارقىلى بالا تاربيەلەۋ سيرەك جاعداي دەيدى پسيحولوگ. اقپاراتتىق تەحنولوگيانىڭ شارىقتاپ دامۋى ادامنىڭ كورۋ ارقىلى ەستە ساقتاۋ قابىلەتىن جەتىلدىرىپ وتىر.
ەندەشە, جاستاردىڭ كىم كوز الدىندا كوبىرەك كولبەڭدەسە, سولارعا ەلىكتەيتىنى تۇسىنىكتى. كوگىلدىر ەكران ارقىلى قانداي ازاماتتار ءجيى ناسيحاتتالسا, بۇگىنگى ۇرپاق سولارعا قاراپ بوي تۇزەيدى. بۇل ورايدا, ينتەللەكتۋالدىق ورەسى, ومىردەن تۇيگەنى مەن سىڭىرگەن ەڭبەگى ايتارلىقتاي بولماسا دا, جاستاردىڭ انشىلەرگە ەلىكتەيتىنى جاپپاي بەلەڭ الىپ بارادى. بۇعان تەلەباعدارلامالار ارقىلى ساحنا «جۇلدىزدارىنىڭ» وزدەرى تۇتىناتىن ءزاۋلىم ءۇيى, قىمبات كولىگى, باعالى كيىمدەرى مەن ساندىك بۇيىمدارى تۋرالى ءجيى اڭگىمەلەۋگە, شەت ەلدەردەردە قىدىرىپ, قالاي دەم العانىن, قانداي كوڭىلدى كەشتەردە بولىپ, قالاي جاسانىپ جۇرگەنىن – جالپى تۇرمىسى ەلدەن جاقسىراق ەكەنىن جاريا قىلىپ كورسەتۋگە قىمسىنبايتىنى دا سەبەپ.
توقسان ءسوزدىڭ توبىقتاي ءتۇيىنى, جاستار كورگەنىنە ەلىكتەيدى. ال ىقپالى ارتىپ وتىرعان كوپشىلىك اقپارات قۇرالدارى بۇگىندە بۇقارا ەلدىڭ مادەنيەتىن, تالعامىن ءوسىرىپ, تانىمىن كەڭەيتۋ مىندەتىن ۇمىت قالدىرعان. قازىرگى تەلەارنالاردىڭ, ءبىر سوزبەن ايتساق, جاس بۋىندى «ءتاتتى كۇلشەمەن» قىزىقتىرىپ, قۇردىمعا جەتەلەپ بارا جاتقانى جاسىرىن ەمەس.
دايىنداعان: ءنازيرا بايىربەك
