ەلوردا تۇرعىندارى قالاداعى تۇراقتىلىق پەن قاۋىپسىزدىكتى ساقتاۋ ماقساتىندا قۇقىق قورعاۋ ورگاندارىنا كومەك كورسەتۋ ءۇشىن «حالىق ساقشىسى» جاساعىنا بىرىكتى. ەرىكتىلەر اراسىندا سپورتشىلار, دارىگەرلەر, كاسىپكەرلەر, مۇعالىمدەر جانە ۆولونتەرلەر بار. ولاردىڭ ءبارى ءتارتىپ ساقشىلارىمەن بىرگە تارتىپسىزدىكتىڭ جانە زاڭسىزدىقتىڭ الدىن الۋ ءۇشىن ەرىكتى تۇردە نيەت ءبىلدىردى.
«ەلىمىزدە نە بولىپ جاتقانىن ءبارىمىز كورىپ وتىرمىز. بەيبىت شەرۋلەر جاپپاي تارتىپسىزدىككە, زورلىق-زومبىلىققا, ۇرلىققا ۇلاستى. ءوز قالامىز, ەلىمىز ءۇشىن الاڭداپ وتىرمىز. سول سەبەپتى قالامىزدا قانداي دا ءبىر زاڭسىزدىق, تارتىپسىزدىك بولماس ءۇشىن جۇدىرىقتاي جۇمىلىپ وتىرمىز» دەدى كاسىپكەر الىبەك مۇقاتاەۆ.
ەرىكتىلەر اراسىندا نيەت بىلدىرگەندەردىڭ باسىم بولىگى – سپورتشىلار. رينگتە, تاتاميدە قازاقستان نامىسىن قورعاپ ۇيرەنگەن بىلەكتى جىگىتتەر بۇگىن كۇش قۇرىلىمدارىمەن بىرگە مەملەكەتتىك ماڭىزى بار نىسانداردى, سول سياقتى قالانىڭ تىنىس-تىرشىلىگىنە جاۋاپتى كاسىپورىنداردى كۇزەتەتىن بولادى.
«قوعامدىق ءتارتىپتى ساقتاۋ ءۇشىن قانشا ۋاقىت قاجەت بولسا دا بارىمىزدى سالىپ كومەكتەسەتىن بولامىز. ارانداتۋشىلار, تارتىپسىزدىكتى ۇيىمداستىرۋشىلار, سول سياقتى وسىنداي قيىن كەزەڭدە وزگەنىڭ ەسەبىنەن ءوز پايداسىن تابۋعا ۇمتىلاتىندار وزدەرىنە كۇشتى قارسىلىق بارىن ءبىلۋى ءتيىس. ءبىز پوليتسەيلەردىڭ تاساسىندا تىعىلىپ وتىرمايمىز» دەدى ارالاس جەكپە-جەكتەن الەم چەمپيونى ەلدار قۇدايبەرگەنوۆ.
بەلسەندى ازات ابىكەنوۆتىڭ ايتۋىنشا, ءوز ءۇيىڭدى توناپ, توڭكەرۋ پاتريوتتىقتىڭ بەلگىسى ەمەس. ازات ءوز سوزىندە دەسترۋكتيۆتى ءىس-ارەكەتتى اقتاپ الۋدىڭ ەش قيسىنى جوق ەكەنىن ايرىقشا ايتىپ ءوتتى.
«قالا تۇرعىندارى مەن قوناقتارىن قورعاۋ ءۇشىن جينالدىق. ءبىز پروفەسسياعا نەمەسە كونفەسسياعا بولىنبەيمىز. ءبىز ەلىن كەز كەلگەن جاۋدان قورعايتىن ەر-ازامات رەتىندە جينالدىق. قالامىزدا بەيبىتشىلىكتى ساقتاپ قالۋ ءۇشىن قولىمىزدان كەلگەننىڭ ءبارىن جاسايمىز» دەدى ول.
