بيىل قازاقستاننىڭ بىرقاتار وڭىرلەرىن سۋ باسىپ, قىستىڭ سوڭى اپاتقا ۇلاستى. قىستاي كۇن قۇرعاتپاي قارىن تازالاپ, مۇزىن ويىپ شىعارىپ تۇرعان استانانىڭ ءوزى كۇن كۇرت جىلىنعاندا قالا كوشەلەرى كولكىگەن سۋعا اينالدى. ال استانا توڭىرەگىندەگى قوياندى, قاراوتكەل ەلدى مەكەندەرىن سۋ باسىپ, تۇرعىندار قارعىن سۋدىڭ ورتاسىندا قالدى. كەيبىر وبلىستاردا جولداردى سۋ شايىپ, ورىستەگى مال دا سۋعا كەتىپ جاتىر.
ارينە, توتەنشە جاعدايلار ءمينيسترى اقپان ايىنىڭ ورتاسىندا سۋ تاسقىنى قاۋپى جوعارى وڭىرلەردى اتاپ, ەرتە دابىل قاققانىمەن, كوپ وڭىرلەر سەل اپاتىنا دايىن بولماي شىقتى. ءماجىلىس دەپۋتاتى سەرگەي پونومارەۆ «بيىل قىستا قار مول ءتۇسىپ, كەي ايماقتا قالىڭدىعى ەكى مەترگە جەتتى, ياعني تاسقىن بولاتىنى انىق ەدى, بىراق ۇكىمەت پەن اكىمدىكتەر اپاتتىڭ الدىن الۋعا دايىن بولمادى. وڭىرلەردەگى گيدروتەحنيكالىق قۇرىلىستار توزعان جانە قاراۋسىز قالعان» دەيدى. توتەنشە جاعدايلار مينيسترلىگىنىڭ دەرەگى بويىنشا, ەلدە 537 گيدروتەحنيكالىق قۇرىلىستى جوندەۋ قاجەت, ونىڭ 8-ءى – يەسىز. 200-دەن استام بوگەتتىڭ قۇجاتى جوق جانە ولاردىڭ تەحنيكالىق قاۋىپسىزدىك دەڭگەيى قانداي ەكەنى بەيمالىم. ونىڭ ۇستىنە, جىل سايىن تاسقىننان سوڭ ميللياردتاعان قاراجات بولىنسە دە, بۇل الداعى جىلداردى قامتاماسىز ەتۋگە جۇمسالماي كەلەدى. ياعني كوپ جۇمىس كوكتەمگى تاسقىن مەزگىلىنەن ءوتىپ الۋ تۇرعىسىنان عانا جاسالادى, ۇزاق مەرزىمدى جوسپارمەن, ستراتەگيالىق تۇرعىدان ىستەلىپ جاتقان جۇمىس جوق.
سوڭعى جىلدارى ەلىمىزدە سۋ اعارلارعا زاڭسىز قۇرىلىستار سالىپ, سۋ جولىن بوگەپ تاستايتىن جاعداي دا جيىلەدى. ونى ءبىرتۇتاس جوسپار بويىنشا قاداعالاپ وتىرعان اكىمدىك تە, قۇزىرلى ورگان دا جوق. كوشەلەردە, اۋىل ارالارىندا ەرىگەن قار سۋى مەن جاڭبىر سۋى اعىپ كەتەتىن ارىق-توعان جەلىسى جوق, بار بولسا دا كوبى كوزبوياۋشىلىقپەن جاسالعان. جول سالعاندا, اۋىل كوشەلەرىن اسفالتتاعاندا سۋ ماسەلەسى ەسكەرىلىپ, سۋ وتەتىن كوزدەر قالدىرىلمايدى دا, كوتەرىڭكى سالىنعان جولدار تابيعي تۇردە اعىن سۋدى بوگەپ, كوكتەم سايىن جول جاعاسى, اۋىل اراسى كولكىگەن كوك تەڭىزگە اينالادى.
سونىمەن قاتار, ەلىمىزدە اۋا رايىنىڭ جاعدايىنا قاراي دايىندىق جاساۋ جاعى دا ءالسىز. ماسەلەن, بيىل كۇزدە جاڭبىر كوپ جاۋىپ, قىس باسىندا قارا سۋىق قاتتى بولدى. سونىمەن جەردىڭ توڭ قاباتى قالىڭداپ, ءبىر مەترگە دەيىن توڭ ءجۇردى دە, كوكتەمدە كۇن كۇرت جىلىنعاندا جەر جىبىمەي, قارعىن سۋ جەرگە سىڭبەي اققان سۋ سەلگە اينالدى. دەمەك, ءبىزدىڭ ەل كوكتەمگى سەلدىڭ جەردىڭ توڭىمەن دە قاتىستى ەكەنىن ەسكەرگەن جوق.
قىسقاسى, قازاقستاندا سۋ تاپشى دەپ زارلاعانىمىزبەن, كوكتەمدە بەيبەرەكەت اعاتىن قارعىن سۋدى باسقارۋدى, ساقتاۋدى ۇيرەنە الماي كەلەمىز. سۋ تاسقىنىنان ساقتانۋدىڭ ۇزاق مەرزىمدى جوباسى جاسالىپ, ول مەملەكەت تاراپىنان قاداعالانباي, قارعىن سۋدىڭ قىسپاعىنان قۇتىلمايمىز.
