عاني ارتىقوۆ, پودپولكوۆنيك, استانا قالالىق قورعانىس ىستەرى جونىندەگى دەپارتامەنت باستىعىنىڭ ورىنباسارى: اسكەرگە التى ءجۇز ازامات اتتانادى
بولاشاق جاۋىنگەرلەردى جيناۋ ناۋقانى تاعى دا باستالدى. جاۋاپتى شارا بارىسىمەن تانىسۋدى ماقسات ەتىپ, استانا قالالىق قورعانىس ىستەرى جونىندەگى دەپارتامەنت باستىعىنىڭ ورىنباسارى, پودپولكوۆنيك عاني ارتىقوۆقا بىرەر ساۋال جولداعانبىز…
– «كۇز-2012» جەدەل اسكەري قىزمەت اتقارۋ ناۋقانىنا الدىن الا زەرتتەۋ جانە ىرىكتەۋ جۇمىستارى جۇرۋدە. شارانىڭ ماڭىزدىلىعىن ءسوز ەتسەڭىز الدىمەن.
– بيىل «اسكەري قىزمەت جانە اسكەري قىزمەتشىلەردىڭ مارتەبەسى» تۋرالى زاڭ نەگىزىندە ۇكىمەتتىڭ «قر ازاماتتارىن اسكەري قىزمەتكە شاقىرۋدى ۇيىمداستىرۋ جانە وتكىزۋ ەرەجەسىن بەكىتۋ تۋرالى» №620 قاۋلىسى قابىلداندى. ەندى قر قارۋلى كۇشتەرى قاتارىنا الدىن الا بەلگىلەنگەن تالاپتاردان ءوتىپ, دەنساۋلىعى, ءبىلىمى, پسيحولوگياسى بويىنشا تاپسىرمالاردى ورىنداعان ازاماتتار ىرىكتەلىپ الىنادى. ال بۇل شارانىڭ ماڭىزدىلىعى – اسكەرگە شاقىرىلعانداردىڭ قاي سالاعا بەيىمى بار ەكەندىگىن انىقتاۋ. مەملەكەت باسشىسىنىڭ ايتقانىنداي, ەلىمىزدىڭ قارۋلى كۇشتەرى سانىمەن ەمەس, ساپاسىمەن ەرەكشەلەنۋى كەرەك. ءاربىر جاۋىنگەر كاسىبي شەبەرلىگىمەن, موبيلدىلىگىمەن, كەز كەلگەن جاعدايعا ساقاداي سايلىعىمەن قىزمەت اتقارۋ قاجەت.
– ناۋقاننىڭ بارىسىمەن تانىستىرساڭىز. جىگىتتەرىمىز وتان قورعاۋعا قانشالىقتى دايىن؟
– اسكەري مىندەتتىلەردى الدىن الا زەرتتەۋ جانە ىرىكتەۋ جۇمىستارى 10 شىلدەدە باستالعان بولاتىن. قازىرگى كەزدە 3 مىڭنان استام بولاشاق جاۋىنگەر بىزگە كەلىپ, ارنايى تەكسەرىستەن ءوتتى, ولاردىڭ كوپشىلىگى اسكەرگە جارامدى بولىپ وتىر. اسكەرگە شاقىرۋ كوميسسياسى ءوز جۇمىسىن 1 قازاندا باستايدى. سول كەزدە ىرىكتەلىپ الىنعان اسكەري مىندەتتىلەر ناقتى قانداي اسكەري بولىمدەرگە بولىنەتىنى انىقتالاتىن بولادى. 15 قازاندا العاشقى لەك اتتانادى.
– ءار ناۋقان سايىن قانشا ازامات تارتىلۋى ءتيىس اسكەرگە؟ سونىمەن قاتار, ناۋقان كەزىندە قانداي دا ءبىر ماسەلەلەر بولا ما؟
– قارۋلى كۇشتەر قاتارىنا شاقىرىلاتىن ادامداردىڭ سانى شەكتەۋلى. سوندىقتان ءبىز استانا قالاسىنان 18 بەن 27 جاس ارالىعىنداعى اسكەري مىندەتتىلەردىڭ ىشىنەن بيىل كۇزگى شاقىرتۋعا 600 ادامدى ىرىكتەپ الامىز. ال, ىرىكتەۋ كەزىندە كەزدەسىپ وتىرعان ءبىر ماسەلە بار: جىگىتتەر بۇرىنىراقتا اۋىرعان سىرقاتتارىن جاسىرادى. ماسەلەن, ونىڭ قولى سىنعان, اياعى شىققان بولۋى مۇمكىن, باسقا دا اۋىر اۋرۋلارمەن ناۋقاستانعان بولار… وندايلار بۇگىن ايتىلماعانىمەن, ەرتەڭ اسكەري جاتتىعۋلار كەزىندە اشكەرەلەنەدى عوي. بۇل – ءبىزدىڭ جۇمىسىمىزدىڭ ساپاسىزدىعى بولىپ تانىلادى. سوسىن اسكەرگە شاقىرۋشىلاردى اتا-اناسىمەن شاقىرىپ, سولاردان سۇرالاتىن بولدى.
