ەلباسى نۇرسۇلتان نازارباەۆ ەلىمىزگە مەملەكەتتىك ساپارمەن كەلگەن يران يسلام رەسپۋبليكاسىنىڭ پرەزيدەنتى حاسان رۋحانيمەن كەزدەستى.
كەزدەسۋ بارىسىندا قازاق-يران ءوزارا ىقپالداستىعىن ودان ءارى دامىتۋ مەن نىعايتۋدىڭ نەگىزگى جولدارى مەن تەتىكتەرى تالقىلاندى. اتاپ ايتقاندا, ەكونوميكا, ەنەرگەتيكا, ينفراقۇرىلىمداردى دامىتۋ, اۋىل شارۋاشىلىعى جانە كولىك-ترانزيت سالالارىنداعى ىنتىماقتاستىق ماسەلەلەرى قوزعالدى.
مەملەكەت باسشىسى قازاقستان مەن يراننىڭ اراسىنداعى قارىم-قاتىناس ءاردايىم تۇراقتى دامىپ كەلگەنىن جانە بۇگىنگى تاڭدا بۇل جاراسىمدى ىنتىماقتاستىقتىڭ ءارى قاراي وركەندەتۋگە قاجەتتى الەۋەت بار ەكەنىن ايتتى.
ال, حاسان رۋحاني ءوز كەزەگىندە يران جاعى قازاقستانمەن قارىم-قاتىناستى دامىتۋعا ايرىقشا ءمان بەرەتىنىن اتاپ ءوتتى.
تاراپتاردىڭ كەڭەيتىلگەن قۇرامداعى كەزدەسۋى كەزىندە مەملەكەت باسشىسى قازاقستاننىڭ يران يسلام رەسپۋبليكاسىن الەمدەگى عانا ەمەس, كاسپي ءوڭىرى بويىنشا دا ماڭىزدى سەرىكتەس رەتىندە قاراستىراتىنىن جەتكىزدى.
نۇرسۇلتان نازارباەۆ يراننىڭ يادرولىق ماسەلەسىنىڭ دە شەشىمىن تاباتىنىنا جانە وسى ەلدىڭ ەكونوميكاسىنىڭ دامۋىنا سەپتىگىن تيگىزەتىندىگىنە سەنىم ءبىلدىردى.
بۇدان كەيىن مەملەكەت باسشىلارى ءباسپاسوز ءماسليحاتىن وتكىزدى. وندا ەلباسى يران پرەزيدەنتى حاسان ءرۋحانيدىڭ ەلىمىزگە ساپارى ماڭىزدى ەكەنىن ايتا كەلىپ, «يران – الەمدەگى اسا ءىرى جانە ماڭىزدى ارىپتەسىمىز ءارى كاسپي جاعالاۋىنداعى تاتۋ كورشىمىز» دەپ اتاپ ءوتتى.
قوس تاراپتىڭ كەلىسسوزدەرى بارىسىندا قانداي ماسەلەلەر تالقىلانعانىن اتاپ وتكەن ەلباسى كولىك-ترانزيت سالاسىن دامىتۋعا باسىمدىق بەرىلگەنىن جەتكىزدى. وسىعان بايلانىستى قازاقستان – تۇرىكمەنستان – يران باعىتىنداعى تەمىرجول ماگيسترالى بيىلعى قاراشا ايىندا اشىلاتىنى بەلگىلى بولدى. ەگەر وسى ءىرى جول تورابى ىسكە قوسىلسا, ەلىمىزدىڭ بيداي ەكسپورتىنىڭ كولەمى 5 ەسە ۇلعايماق. جاڭا ماگيسترال 10 ميلليون توننا جۇك تاسىمالداۋعا مۇمكىندىك بەرىپ قانا قويماي, قازاقستاننىڭ پارسى شىعاناعىنداعى بارلىق مەملەكەتكە شىعۋىنا جول اشادى.
يران پرەزيدەنتىنىڭ قازاقستانعا ساپارى اياسىندا بىرلەسكەن ءمالىمدەمەلەر قابىلداندى. اتاپ ايتقاندا, ەكى ەلدىڭ سىرتقى ىستەر مينيسترلىكتەرى اراسىندا ىنتىماقتاستىق تۋرالى بەسجىلدىق باعدارلاما قۇرۋ, جولاۋشىلار مەن جۇكتەردىڭ حالىقارالىق اۆتوموبيل تاسىمالى تۋرالى جانە ىنتىماقتاستىقتى دامىتۋ جونىندەگى جول كارتاسى توڭىرەگىندە كەلىسىمدەر جاسالدى.
بۇدان كەيىن پرەزيدەنتتەر قازاقستان-يران بيزنەس-فورۋمىنا قاتىسىپ, «نازارباەۆ ۋنيۆەرسيتەتىنە» باردى.
قىمبات توقتامۇرات
