كنيازبەن كەزدەسۋ
كەشە پرەزيدەنت نۇرسۇلتان نازارباەۆ ەلىمىزگە رەسمي ساپارمەن كەلگەن موناكو كنيازى II البەرمەن كەزدەستى.
كەزدەسۋدىڭ سالتاناتتى راسىمىنەن كەيىن مەملەكەت باسشىلارى ساياسي, ساۋدا- ەكونوميكالىق, ينۆەستيتسيالىق, ەكولوگيالىق جانە مادەني-گۋمانيتارلىق ىنتىماقتاستىق ماسەلەسىن تالقىلادى. اڭگىمەلەسۋ بارىسىندا قازاقستان پرەزيدەنتى بۇل II البەردىڭ قازاقستانعا العاشقى ساپارى ەكەنىن اتاپ ءوتتى.
– مەن ءسىزدىڭ جاس, تاۋەلسىز مەملەكەت – قازاقستاندى كورۋ ءۇشىن كەلگەنىڭىزگە قۋانىشتىمىن. قازاقستان مەن موناكو اراسىنداعى ىنتىماقتاستىقتىڭ تاريحى وسىدان باستالادى دەپ ۇمىتتەنەمىن, – دەدى مەملەكەت باسشىسى.
ءوز سوزىندە موناكو كنيازى II البەر نۇرسۇلتان نازارباەۆقا جىلى قابىلداۋى مەن دوستىق نيەتى ءۇشىن العىسىن ايتتى:
– دەلەگاتسيا جانە ءوزىم دە موناكودا ءجۇرىپ-اق, سىزدەر جاقتان جەتكەن جىلىلىقتى سەزىندىم. سونداي-اق, مەن اناما ارنالعان كورمەنى وزدەرىڭىزدىڭ جاس ەلوردالارىڭىز استانادا ۇيىمداستىرۋعا كەلىسىم بەرگەنىڭىز ءۇشىن ريزاشىلىعىمدى بىلدىرەمىن. ءسىزدىڭ كورمەنىڭ اشىلۋىنا قاتىساتىنىڭىز مەن ءۇشىن ۇلكەن قۇرمەت. بۇل كورمەنىڭ وتكەنىنە, يدەيانىڭ وسىندا جان-جاقتى قولداۋ تاپقانىنا وتە قۋانىشتىمىن, – دەدى II البەر.
كەلىسسوزدەردىڭ قورىتىندىسى بويىنشا, مەملەكەت باسشىلارىنىڭ بىرلەسكەن دەكلاراتسياسى قابىلداندى جانە قر ساۋدا, ونەركاسىپ پالاتاسى مەن موناكو ەكونوميكالىق دامۋ پالاتاسى اراسىنداعى ىنتىماقتاستىق تۋرالى كەلىسىمگە قول قويدى. بىرلەسكەن دەكلاراتسيادا مەملەكەت باسشىلارى ەكى ەلدىڭ ۇلتتىق مۇددەلەرى مەن جاhاندىق سيپاتتاعى پروبلەمالارىنا جاۋاپ بەرەتىن ماسەلەلەر بويىنشا قازاقستان مەن موناكو اراسىنداعى ءتۇرلى دەڭگەيدە جۇرگىزىلگەن ساياسي ديالوگ پەن كونسۋلتاتسيالاردىڭ ءرولىن جوعارى باعالادى.
سونداي-اق, نۇرسۇلتان نازارباەۆ پەن II البەر قاۋىپسىزدىكتى جانە جاhاندىق اۋقىمدا تۇراقتىلىقتى نىعايتۋ ماقساتىندا حالىقارالىق جانە ءوڭىرارالىق ينستيتۋتتار اياسىنداعى ەكى ەلدىڭ ءبىرلەسكەن جۇمىسىن جالعاستىرۋعا تىلەكتەستىكتەرىن ءبىلدىردى.
مەملەكەت باسشىلارى ەكىجاقتى ەكونوميكالىق قاتىناستاردىڭ دامۋىن جانە قازاقستان مەن موناكونىڭ الەۋەتى مەن تاجىريبەلەرىن ەسكەرە وتىرىپ, ءوزارا ءتيىمدى ىنتىماقتاستىقتىڭ باعىتتارى مەن جوبالارىن بەلسەندى ىزدەۋ كەرەكتىگىنە توقتالدى.
بۇدان كەيىن ەكى تاراپ «گرەيس كەللي – موناكو حانشايىمىنىڭ ءداۋىرى» اتتى كورمەنىڭ اشىلۋ سالتاناتىنا قاتىستى.
«گرەيس كەللي – موناكو حانشايىمىنىڭ ءداۋىرى» اتتى كورمە موناكو كنيازى III رەنەنىڭ زايىبى جانە تانىمال گولليۆۋد اكتريساسى گرەيس كەلليدىڭ جەكە ومىرىنە ارنالعان. كورمەدە كنياگينيا ءومىرىنىڭ كەيبىر ساتتەرى – فيلادەلفيادا وتكەن بالالىق شاعى, گولليۆۋدتاعى سالتاناتتى ساتتەر, كنيازبەن كەزدەسۋى, انا اتانعان جانە موناكو سيمۆولى بولعان جىلدار كورىنىس تاپقان. ەكسپوزيتسيا اراسىندا جەكە زاتتارى, فوتوسۋرەتتەرى, كنياگينيانىڭ اشەكەيلەرى, بالالار ويىنشىقتارى, ونىڭ كنياز رەنەمەن ءتۇرلى كورول وتباسى مۇشەلەرىمەن, ا.حيچكوكپەن, ب.كروسبيمەن, ك.گرانتپەن, ج.كەننەديمەن, م.روستروپوۆيچپەن, ر.نۋريەۆپەن جانە م.شاگالومەن جازبالارىنان قۇجاتتار, سونداي-اق, گرەيس كەلليدىڭ كەيبىر ءۇي كينوجازبالارى دا بار.