كەشە استاناداعى ۇلتتىق اكادەميالىق كiتاپحانادا ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى, ەكونوميكا عىلىمدارىنىڭ دوكتورى, قر ديپلوماتيالىق قىزمەتىنە ەڭبەك سىڭىرگەن قايراتكەرى سايلاۋ باتىرشا-ۇلىنىڭ «تاۋەلسىزدىك جولىنداعى ديپلوماتيا», «ديپلوماتيا نا پۋتي ك نەزاۆيسيموستي» اتتى كىتابىنىڭ تۇساۋكەسەرi ءوتتى.
كىتاپتا سايلاۋ باتىرشا-ۇلىنىڭ وسكەلەڭ ءومىر جولى مەن ديپلوماتيا سالاسىنداعى قىزمەتى باياندالادى. سونداي-اق قازاق حالقىنىڭ ديپلوماتيا تاريحى مەن كسرو جانە الەم ديپلوماتياسى تۋرالى مول ماعلۇمات بەرىلەدى. كىتاپتىڭ ەڭ باستى قۇندىلىعى رەتىندە كەيىپكەردىڭ تاۋەلسىزدىك ءۇشىن كۇرەسىپ, قازاق حالقىنىڭ ەگەمەندى ەل بولۋ تالپىنىسىن جۇزەگە اسىرۋعا ازاماتتىق تۇرعىدان اتسالىسىپ, ونى ابىرويمەن اتقارىپ شىققانىن اتاپ ايتۋعا بولادى. كىتاپتا ۇلت تاعدىرى, ءتىل, ءدىن, شەتتەگى قانداستار جايى دا كوپ ماسەلەلەر قوزعالعان.
– مەن سايلاۋ باتىرشا-ۇلىنىڭ بۇل كىتابىن ارناۋلى الدىرىپ, قۇنتتاپ وقىپ شىقتىم. ديپلومات رەتىندە مەن دە كوپ ماعلۇمات الدىم. بۇل كىتاپتىڭ ءىشى تولعان دەرەك. اسىرەسە, ءبىزدىڭ تاۋەلسىزدىك جىلدارىنداعى قازاق ديپلوماتياسىنىڭ جالپى جاعدايى وتە ادىلدىكپەن تاماشا باياندالعان, – دەپ مەملەكەت جانە قوعام قايراتكەرى قۋانىش سۇلتانۇلى اعىنان اقتارىلسا, اكادەميك, فيلولوگيا عىلىمدارىنىڭ دوكتورى ءۋاليحان قاليجان كىتاپتىڭ فورما جاعىنان دا ەرەكشەلەنەتىنىن ايتا كەلىپ, 7 بولىمىنەن تۇراتىن ديالوگ-ەسسە كىتاپتىڭ ءار تاراۋىن قىسقاشا تالداپ, ءسوزىنىڭ سوڭىن «بۇل قازاق ديپلوماتيا سالاسىنداعى اسا قۇندى كىتاپ» دەپ ءتۇيدى.
ايتا كەتەيىك, سايلاۋ باتىرشا-ۇلى تاشكەنت مەملەكەتتىك ۋنيۆەرسيتەتىندە, كسرو سىرتقى ىستەر مينيسترلىگىنىڭ جوعارى ديپلوماتيالىق مەكتەبىندە, داماسك ۋنيۆەرسيتەتىنىڭ (سيريا) اراب فيلولوگياسى فاكۋلتەتىندە, پاريجدەگى «فرانتسۋز اليانسى» ينستيتۋتىندا وقىعان. ماسكەۋ مەملەكەتتىك حالىقارالىق قاتىناستار ينستيتۋتىندا كانديداتتىق ديسسەرتاتسياسىن قورعاعان العاشقى قازاق. پلەحانوۆ اتىنداعى رەسەي ەكونوميكالىق ۋنيۆەرسيتەتىندە جانە لەنينگراد مەملەكەتتىك الەمدىك ەكونوميكا ۋنيۆەرسيتەتىندە دوكتورلىق ديسسەرتاتسياسىن قورعاعان.
