ەلورداداعى قازاق ۇلتتىق حورەوگرافيا اكادەمياسىندا ۇلتتىق قۇرىلتاي مۇشەسى, ۇلتتىق عىلىم اكادەمياسىنىڭ اكادەميگى, استانا قالاسى قوعامدىق كەڭەسىنىڭ مۇشەسى كارىمبەك قۇرماناليەۆپەن «جالپىۇلتتىق قۇندىلىقتار» تاقىرىبىندا جاستارمەن كەزدەسۋ ءوتتى.
كۇنى كەشە اتىراۋدا وتكەن ۇلتتىق قۇرىلتايدىڭ ءۇشىنشى وتىرىسى ءبىلىم الۋشىلارمەن كەزدەسۋدىڭ نەگىزگى وزەگى رەتىندە تاڭدالدى. «ادال ادام – ادال ەڭبەك – ادال تابىس» اتتى مەملەكەت باسشىسى قاسىم-جومارت توقاەۆتىڭ توراعالىعىمەن ۇيىمداستىرىلعان اۋقىمدى جيىن جاس بۋىن ءۇشىن ۇلتتىق قۇندىلىقتارىمىزدىڭ ماڭىزىن ايقىنداپ بەردى. ۇلتتىق قۇرىلتايدا كوتەرىلگەن ادامي قاسيەتتەردى ۇرپاق بويىنا ءسىڭىرۋ – اتالمىش كەزدەسۋدىڭ باستى ماقساتى.
كەزدەسۋدە پروفەسسور كارىمبەك قۇرماناليەۆ مەملەكەتتىڭ باسەكەگە قابىلەتتى بولۋىندا جالپىۇلتتىق قۇندىلىقتارعا باسا ءمان بەرەتىن ۇرپاقتى قالىپتاستىرۋ ماڭىزى تۋرالى كەڭىرەك ءسوز قوزعادى.
«ەڭبەكقورلىق, بىلىمپازدىق جانە ادامي قاسيەتتەر سەكىلدى جالپىۇلتتىق قۇندىلىقتاردى ۇلىقتايتىن سانالى ۇلت تۇتاس ەلدىڭ دامۋ كۇشىنە اينالادى. ادال ەڭبەك سالتانات قۇرعان قوعامدا عانا ادىلەتتى قازاقستان ورنايدى. جاستارىمىز ديپلوم الۋعا ەمەس, جاقسى مامان بولۋعا ۇمتىلۋى كەرەك. بىلىكتى كادر اتانۋ ءۇشىن ەڭبەك ەتپەي, ماڭدايدان تەر توكپەي, ماقساتقا جەتۋدىڭ مۇمكىندىگى جوق. ەلىم ماعان نە بەرە الادى دەپ ەمەس, مەن ەلىم ءۇشىن نە بەرە الامىن دەيتىن الاش بالاسىنىڭ ءتۇپتىڭ-تۇبىندە ماڭداي تەرىمەن تاپقان ادال ەڭبەگىنىڭ نانى ءتاتتى بولماق. جاستار ونەردى عىلىمي دەڭگەيدە زەرتتەۋگە ۇمتىلعانى ابزال. سەبەبى ونەردىڭ دە ءالى اشىلماعان قىرى كوپ. «ونداي بولماق قايدا دەپ, ايتپا عىلىم سۇيسەڭىز…» دەگەن ۇلى ابايدىڭ ءىلىمى «ادال ەڭبەك» كونتسەپتسياسىن جان-جاقتان اشىپ كورسەتەدى. ۇرپاق تاربيەسى وتباسىنان باستالادى. سوندىقتان ءار اتا-انا ەڭبەككە باۋلۋدىڭ ءمان-ماعىناسىن ۇعىندىرىپ قانا قويماي, ءىس جۇزىندە بالالارىنا كورسەتە ءبىلۋى قاجەت» دەدى ءوز سوزىندە اكادەميك.
«كەلىسىپ پىشكەن تون كەلتە بولماس» دەيدى دانا حالقىمىز. ۇلتتىق قۇرىلتاي وسى ءتامسىلدىڭ نەگىزىنە قۇرىلعانى ءسوزسىز. بۇكىل ەلدى بىرىكتىرەتىن القالى جيىننىڭ ماڭىزى جايىندا ونەر وشاقتارىنىڭ ءبىلىم الۋشىلارى دا قالىس قالماي, بىلۋگە, تۇسىنۋگە ۇمتىلۋى قۋانتادى. قازاق ۇلتتىق حورەوگرافيا اكادەمياسىنىڭ رەكتورى بيبىگۇل ءنۇسىپجانوۆا ونەردىڭ بيىگىنە تالماي ەڭبەك ەتۋدىڭ ارقاسىندا جەتۋگە بولاتىنىن باسا ايتتى.
– ۇلتتىق قۇرىلتاي مەن ۇلتتىق قۇندىلىقتار تاقىرىبىندا وتكەن, سۇراق-جاۋاپ فورماتىندا وربىگەن ءىس-شارا جاستار ءۇشىن وتە قىزىق بولدى. قۇرىلتاي شاقىرۋ – ەرتەدەن كەلە جاتقان اتا ءداستۇرىمىز. بابالارىمىز ماڭىزدى ماسەلەلەردى وسىنداي القالى جيىندا تالقىلاعان. حالىق ءوزارا اقىلداسىپ, ءبىر شەشىمگە كەلگەن. وسىنىڭ نەگىزىن اكادەميك كارىمبەك قۇرماناليەۆ جاتتاندى سوزدەرمەن ەمەس, ءوز تاجىريبەسىنەن مىسالدار كەلتىرە وتىرا, جاقسى جەتكىزدى. وتانشىل, ەلىن, ءوز ءىسىن سۇيەتىن جانداردىڭ بويىندا ەڭبەكقورلىق قاسيەتى ءبىرىنشى تۇرادى, – دەدى ب.ءنۇسىپجانوۆا.
كەزدەسۋگە اكادەميانىڭ ستۋدەنتتەرى, كوللەدج ءبىلىم الۋشىلارى جانە مەكتەپ وقۋشىلارى قاتىسىپ, تاقىرىپقا قاتىستى وزدەرىن تولعاندىرعان سۇراقتاردى قويدى. ءىس-شارا سوڭىندا اكادەميا اتىنان سپيكەرگە قازاق بي ونەرىنىڭ پاديشاسى شارا جيەنقۇلوۆا تۋرالى وقۋ ورنى شىعارعان تۋىندى ەستەلىككە تارتۋ ەتىلدى.
