ەلوردادا وتكەن «Astana Eurasian Book Fair 2024» حالىقارالىق كىتاپ كورمە-جارمەڭكەسىندە «بەيبارىس» اراب حالىق رومانىنىڭ ءتارجىما كىتابى تانىستىرىلدى.
ادەبيەتتانۋشى-عالىم, قر مەملەكەتتىك سىيلىعىنىڭ لاۋرەاتى ساۋىتبەك ابدراحمانوۆ انا تىلىمىزگە شيرەك عاسىر بۇرىن تارجىمالاعان دەشتى قىپشاقتىڭ دارا پەرزەنتى ءاز-زاكىر بەيبارىس سۇلتاننىڭ عۇمىرناماسى تۋرالى كىتاپتى تانىستىرۋ راسىمىنە قازاقتىڭ بۇگىنگى تانىمال بەلگىلى زەرتتەۋشىلەرى, تاريحشىلارى مەن جازۋشىلارى قاتىستى.
ءىس-شارانىڭ مودەراتورى, پروفەسسور ديحان قامزابەكۇلى كىتاپقا حالقىمىزدىڭ دانا پەرزەنتى, تاريحتىڭ تەرەڭ بىلگىرى, ادەبيەت الىبى ءابىش كەكىلباەۆ العى ءسوز جازعانىن جەتكىزدى. كىتاپتا بالا كۇنىندە تاعدىردىڭ جازۋىمەن قازاق جەرىنەن, اتىراۋ بويىنداعى بەرىش جۇرتىنان مىسىر جەرىنە جەتكىزىلىپ, ەرەك اقىلىمەن, بولەك نامىسىمەن, سيرەك قايراتىمەن قۇلدىقتان سۇلتاندىققا دەيىن كوتەرىلگەن, مىسىر مەن سيريانى 17 جىل بويى بيلەگەن, ءدىن مۇسىلماندى كىرەس كەرۋشىلەردەن قورعاپ قالعان الەمگە ايگىلى ءامىرشى بەيبارىستىڭ عاجايىپ عۇمىرى قازاقتىڭ اۋىزەكى اڭگىمە ايتۋ مانەرىمەن قىزعىلىقتى باياندالعان. «فوليانت» باسپاسىنان جارىق كورگەن جاڭا كىتاپ تۋرالى ونىڭ تۇساۋكەسەرىنە كەلگەن ءادىل احمەتوۆ, قۋانىش جيەنباي, ءمادي ايىمبەتوۆ, شەرحان قازىعۇل, شەرۋباي قۇرمانبايۇلى سىندى ادەبيەت وكىلدەرى وسىلاي باعا بەردى.
– اۋدارما اۆتورىنىڭ شىعارماشىلىق شەبەرلىگىن ەرەكشە ايتا كەتسەك. وزدەرىڭىزگە ءمالىم, ساۋىتبەك ابدراحمانوۆ – قۇيقالى, شۇيگىندى ءسوزدىڭ قادىرىن بىلەتىن قالامگەر. اۋدارماشى قولدانعان «كەسكەن تەرەكتەي سۇلاعان», «قۇلاقكەستى قۇل», «سوقا باسى سوپايىپ», «كەرنەيلەتىپ-سىرنايلاتىپ», «جانىنا ساۋعا سۇراعان» دەگەن سياقتى باسقا دا جۇزدەگەن, مىڭداعان ءسوز تىركەستەرى وقىرماندى باۋرايدى. ساۋكەڭ سونداي-اق انا ءتىلىمىزدىڭ زاڭدىلىعى مەن اراب سوزدەرىن مۇمكىندىگىنشە تىگىسىن جاتقىزىپ, قازاقىلاندىرعان, – دەدى
د.قامزابەكۇلى.
– ءتىلى وتە قاراپايىم. شولوحوۆتىڭ ءسوزى بار, سەنىڭ جازعان شىعارماڭ مينيسترگە دە, ەتىكشىگە دە تۇسىنىكتى بولۋ كەرەك دەگەن. بۇگىنگى تۇساۋى كەسىلىپ جاتقان رومان وتە قاراپايىم, ءبىز ءوزىمىز باتىرلار جىرىن, اۋىزەكى اڭگىمەلەردىڭ بارلىعىن قۇلاقپەن تىڭدادىق قوي, سونداي ءبىر اۋەزدى ەرەكشە ەستىگەندەي بوپ تۇراسىڭ, – دەدى جازۋشى قۋانىش جيەنباي. ول سونداي-اق الەم تانىعان ءامىرشىنىڭ ەسىمىن ەلورداداعى ە.گۋميلەۆ اتىنداعى ماڭدايالدى وقۋ ورنىنا بەرۋ تۋرالى ۇسىنىسىن ايتتى.
كىتاپتىڭ ءبىر قۇندىلىعى – ءابىش كەكىلباەۆتىڭ العىسوزى. بۇل العىسوزدى وقۋدىڭ ءوزى بەيبارىس تۋرالى كەرەمەت مول مالىمەت بەرەدى. روماننىڭ وسىمەن ءۇشىنشى رەت باسىلىپ وتىرعانى كىتاپ عۇمىرىنىڭ ءالى دە ۇزاق بولارىن ايعاقتايدى.
