لاريسا كراسنيكوۆا: شەتەلدىك كولىكتەر تەكسەرىلەدى
لاريسا كراسنيكوۆا, استانا قالاسى ءىىد اكىمشىلىك پوليتسيا باسقارماسىنىڭ ەرەكشە تاپسىرمالار جونىندەگى اعا ينسپەكتورى
– استانا قالاسىندا «ترانزيت» جەدەل-پروفيلاكتيكا شاراسى باستالىپتى. بۇل جۇمىستىڭ ماقساتى نە؟
– سوڭعى ۋاقىتتا ەلىمىزدە شەتەلدىك كولىك جۇرگىزۋشىلەرى تاراپىنان بولاتىن جول قاۋىپسىزدىگى ەرەجەسىن بۇزۋ جاعدايلارى ءجيى ورىن الىپ كەتكەن بولاتىن. سوعان وراي, جول-پاترۋلدىك پوليتسياسى ءتيىستى شارا قولدانۋعا تۋرا كەلدى. ءسىز ايتىپ وتىرعان «ترانزيت» جەدەل-پروفيلاكتيكا شاراسى, مىنە, وسى ماقساتپەن جۇزەگە اسىرىلىپ وتىر.
– شەتەلدىك كولىك جۇرگىزۋشىلەرى تاراپىنان سوڭعى ايلاردا قانشا ەرەجە بۇزۋشىلىق بولدى جانە ولاردىڭ سيپاتى قانداي?
– تەك قانا سوڭعى توعىز ايداعى ءمالىمەتتەردى كەلتىرەر بولسام, رەسپۋبليكا بويىنشا شەتەلدىك كولىكتەردىڭ ءجۇرگىزۋشىلەرى تاراپىنان 26 مىڭ جول ەرەجەسىن بۇزۋ وقيعاسى تىركەلگەن. ولاردىڭ 28-ءى – جول-كولىك وقيعاسى. سونىڭ سالدارىنان 58 ادام ءار ءتۇرلى جاراقاتتار العان.
– ەندى «ترانزيت» جەدەل-پروفيلاكتيكالىق شاراسى بويىنشا تەك شەتەلدىك كولىكتەر قاتاڭ تەكسەرىلەتىن بولا ما؟
– ادەتتەگىدەي, قالادا جول ەرەجەلەرىنىڭ ساقتالۋى قاتاڭ باقىلاۋدا بولادى. الايدا, ارنايى «ترانزيت» شاراسىنا 500 قىزمەتكەر جۇمىلدىرىلعان. وسى جول-پاترۋلدىك پوليتسياسى مەن كوشى-قون پوليتسياسى قىزمەتكەرلەرى شەت ەلدەردەن كەلگەن كولىكتەردى ەرەكشە باقىلاۋعا الاتىن بولادى. ولاردىڭ بۇرىن-سوڭدى ەرەجە بۇزىپ نە بۇزباعانى, قۇجاتتارىنىڭ دۇرىستىعى – تۇگەل تەكسەرىلەدى. جۇك تاسىمالداۋ كولىكتەرى, جەڭىل اۆتوكولىكتەر, تاعى باسقا كولىك قۇرالدارىن كىرگىزۋ كەزىندە كولىك يەلەرىنىڭ كەدەندىك باقىلاۋ زاڭنامالارىن ساقتاماي نەمەسە باسقا دا زاڭبۇزۋشىلىققا بارعانى انىقتالسا, ولار دەرەۋ ەلىمىزدەن شىعارىلادى.
– بۇل قانشا كۇنگە سوزىلادى؟
– «ترانزيت» جەدەل-پروفيلاكتيكا شاراسى 27 قازانعا دەيىن جۇرگىزىلەدى.
ءنازيرا سايلاۋقىزى