كەشە كۇللى قازاقستاندىق بالدىرعاندارعا ەلباسى نۇرسۇلتان نازارباەۆ جاڭاجىلدىق قۇتتىقتاۋىن جولدادى. وسى كۇنى ەلىمىزدىڭ بارلىق وڭىرىندە پرەزيدەنتتىڭ اتىنان شىرشاتوي وتكىزىلدى. «ماڭگىلىك ەلدىڭ قاسيەتتى قۇندىلىقتارى» دەگەن جالپى اتاۋمەن ۇيىمداستىرىلعان مەرەكەلىك باعدارلاماعا استانا قالاسى دا ىجداھاتتى ازىرلەنىپ, وقۋشىلار سارايىنداعى شىرشا تۇبىنە 300 بالدىرعاندى جيناپ, دۋمان كورىگىن قىزدىردى.
– جاڭا جىل – ەڭ الدىمەن, بالالارعا قۋانىش سىيلايتىن مەرەكە. سەندەر ارقىلى قازاقستاندىق بارشا بالالاردى كەلە جاتقان جاڭا جىلمەن قۇتتىقتايمىن. ءبىزدىڭ ۇلى وتانىمىز جىلدان جىلعا وركەندەي تۇسۋدە. قازىر دۇنيەجۇزى قازاق ەلىن قۇرمەتتەيدى. سەندەر وسىنداي ەرەكشە ەلدە ءوسىپ كەلە جاتقان باقىتتى ۇرپاقسىڭدار. اتا-انالارىڭدى قۋانتىپ, زەرگەر دە زەردەلى, ءبىلىمدى دە بىلىكتى بولىڭدار. بۇل ءۇشىن ەلىمىزدە بارلىق مۇمكىندىك بار. جاسامپاز ىستەردىڭ بارلىعى سەندەردىڭ جارقىن بولاشاقتارىڭ ءۇشىن جاسالىپ جاتىر. بارلىق وڭىردە جاڭا مەكتەپتەر سالىنۋدا. «ونەرلى ورگە جۇزەر» دەيدى دانا حالقىمىز. ونەر – ءبىلىمنىڭ كەنى. وركەندى ەلدىڭ تەڭى بولىڭدار. جاسىل شىرشا – بازارلى بالالىقتىڭ بەلگىسى. شىرايىن بەرمەيتىن وسى شىرشاداي جايناپ وسە بەرىڭدەر. بولاشاقتارىڭ باياندى بولسىن, – دەدى قۇتتىقتاۋىندا پرەزيدەنت.
استانا قالاسىندا وتكەن پرەزيدەنتتىڭ شىرشاتويىنا ءبىلىم جانە عىلىم ءمينيسترى اسلان ءسارىنجىپوۆ جانە استانا قالاسى اكىمىنىڭ ورىنباسارى ەرمەك امانشاەۆ قاتىستى.
جالپى باس قالادا وتكەن پرەزيدەنت شىرشاتويىنا شاقىرىلعان 300 بالدىرعاننىڭ 150-ءى كوپبالالى وتباسىنان بولسا, قالعان جارتىسى – بالالار ءۇيىنىڭ تاربيەلەنۋشىلەرى ەكەن.
مەرەكە بارىسىندا بالالار وزدەرىنە ارنالعان جاڭاجىلدىق باعدارلامانى تاماشالادى. ەرتەگى كەيىپكەرلەرىمەن بىرگە كوڭىلدى ويىنداردىڭ قىزىعىنا كەنەلدى. كەيىپكەرلەر دەمەكشى, وسى جولى شىرشاتويدا قازاق ەرتەگىلەرى كەيىپكەرلەرىنىڭ قاراسى باسىم بولدى. قاللەكي تەاترىنىڭ كوركەمدىك جەتەكشىسى, رەجيسسەر تالعات تەمەنوۆتىڭ ستسەناريلىك قولتاڭباسى ايقىن اڭعارىلىپ تۇردى. تازشا بالا, سۋ پەرىسى, ايداھار بالدىرعانداردى ەرتەگى الەمىنە جەتەلەپ, ادەمى اسەرگە بولەدى. ال اياز اتا مەن اقشاقار شىرشاتويعا قاتىسىپ, ءماز-ءمايرام بولعان بالالارعا پرەزيدەنتتىڭ اتىنان ارنايى ازىرلەنگەن سىيلىقتاردى تاراتتى.
جاڭاجىلدىق مەرەكەگە وراي ساحنالانعان ويىن-ساۋىق باعدارلاماسىنان كەيىن بالالار ءتاتتى تاعامدارعا تولى داستارحاننان ءدام تاتتى.
قىمبات نۇرعالي
