تايلاندتىڭ ەڭ باي ادامدارىنىڭ ءبىرى, بەلگىلى كاسىپكەر, ايگىلى «اماتا» كورپوراتسياسىنىڭ نەگىزىن قالاۋشى ءارى باس ديرەكتورى ۆيكروم كروماديت اۆتوكەرۋەنىمەن استاناعا كەلىپ جەتتى. استانا قالاسى اكىمىنىڭ ورىنباسارى قانات سۇلتانبەكوۆپەن كەزدەسكەن ول ەلوردادا وتەتىن «EXPو – 2017» حالىقارالىق كورمەسى اياسىنداعى وي-پىكىرلەرىمەن ءبولىستى.
«جاسىل ەكونوميكا» تاقىرىبىن كەڭىنەن تالقىلاعان قوس تاراپ وسى سالادا ىنتىماقتاسا جۇمىس ىستەۋگە نيەت ءبىلدىردى. بەس بىردەي ءىرى يندۋستريالدىق پاركتىڭ قوجايىنى ۆيكروم كروماديت مىرزا ەڭ الدىمەن ادامداردىڭ دەنساۋلىعى مەن قورشاعان ورتانىڭ تازالىعىن بارىنەن بيىك قوياتىندارىن, سول سەبەپتى يندۋستريالدىق پارككە ەنگەن 1 مىڭعا جۋىق كاسىپورىننىڭ تۇگەلى «قالدىقسىز ءوندىرىس» قاعيداتىمەن جۇمىس ىستەيتىنىن جەتكىزدى.
كەزدەسۋدىڭ سوڭىندا جۋرناليستەرمەن جۇزدەسكەن كاسىپكەر ەلىمىزگە كەلۋ ماقساتىمەن, الداعى جوسپارىمەن تانىستىردى. «مەن قازىر بيزنەسپەن اينالىسپايمىن. جاسىم الپىسقا كەلگەلى ەل, جەر كورىپ, جۇرتشىلىقتىڭ كادەسىنە جارايتىن ىستەرمەن شۇعىلدانعاندى ءجون كوردىم. بۇل ءومىر ماڭگى ەمەس. جيعان-تەرگەنىڭدى وزىڭمەن بىرگە الىپ كەتە المايسىڭ. ال ارتىڭا قالدىراتىن رۋحاني دۇنيە – ماڭگىلىك. سوندىقتان كىتاپ جازۋعا دەن قويدىم. ءوزىم ۇيىمداستىرعان «ازيا كەرۋەنىنىڭ» ماقساتى – ازيا ەلدەرىن الەمگە تانىستىرۋ» دەيدى ۆيكروم مىرزا.
بيزنەس سالاسىندا بيىك تابىستارعا قول جەتكىزگەن مۋلتيميلليونەردىڭ جازۋشىلىق قادامى دا ءساتتى بولعانعا ۇقسايدى. ونىڭ كىتابىن تايلاندىقتار «پىشاق ۇستىنەن» ءبولىپ اكەتەتىن كورىنەدى. كىتابى ءبىر كۇندە 150 مىڭ دانامەن ساتىلعان كەزدەر دە بولعان. تاي ەلى ءتىپتى ۆيكروم مىرزانىڭ العاشقى كىتابىنىڭ جەلىسىمەن تەلەسەريال دا ءتۇسىرىپ ۇلگەرىپتى. ايتپاقشى, بۇل كىتابى «بىت حوروشيم چەلوۆەكوم» دەگەن اتاۋمەن ورىس تىلىندە باسىلىپ شىعىپتى. ءوزى ارالاعان ەلدەردىڭ ادەت-عۇرپى مەن تۇرمىس-تىرشىلىگىنەن العان اسەرلەرىن قاعازعا ءتۇسىرىپ, 17-ءشى كىتابىن شىعارعالى وتىرعان ۆيكروم كروماديت ەندى قازاقستان تۋرالى كىتاپ جازباقشى. «قازاقتار تۋرالى دەرەكتى فيلمدەر تسيكلىن ءتۇسىرۋ دە ويىمدا بار» دەيدى اۆتور.
ءۇش جىلدان بەرى ناۋرىز-قازان ايلارىندا ازيا ەلدەرىن ارالاۋعا شىعاتىن اۆتوكەرۋەن بۇگىنگە دەيىن بيرما, كورەيا, قىتاي, مونعوليا جانە رەسەيدى ارالاپ شىققان. ەندى 16 تامىزعا دەيىن ەلىمىزدى شيىرلاپ, استانادان باسقا, پەتروپاۆل, كوكشەتاۋ, بۋراباي, قاراعاندى, بالقاش, الماتى قالالارىنا ساپار شەكپەك. ءارى قاراي قىتاي ارقىلى ءوز ەلدەرى – تايلاندقا جول تارتادى.
قىمبات توقتامۇرات
