ءمولدىر اۋەلبەكوۆا, ەسترادا ءانشىسى: استانادا ارماندار ورىندالادى
ايرىقشا داۋسى مەن بيازى قازاقىلىعىنىڭ ارقاسىندا كوپشىلىكتىڭ كوزايىمىنا اينالعان ءمولدىر اۋەلبەكوۆا ءداستۇرلى ايدارىمىزدىڭ بۇگىنگى قوناعى بولىپ وتىر. «استانا اقشامى» گازەتىنىڭ رەداكتسياسى مەن سايتىنا كەلىپ تۇسكەن حات يەلەرىنىڭ ءبىرازى ءانشى قىزعا ارناعان ساۋالدارىن جولداپتى.
– وتباسىلىق جاعدايىڭىزعا بايلانىستى جاڭا جىلدا استاناعا كوشىپ كەلدىڭىز. جاقىندا «استانا» اتتى جاڭا ءانىڭىز جارىققا شىقتى. باس قالانىڭ قانداي ەرەكشەلىكتەرى ءسىزدى قۋانتۋدا؟
جامبىل وتارباي,
ستۋدەنت
– ءيا, تۇرمىس قۇرعالى بەرى ەلوردانىڭ تۇرعىنى اتاندىم. جاسىراتىنى جوق, وعان دەيىن بۇل جاقتى سۋىق شاھار رەتىندە ەلەستەتەتىنمىن. مەنىڭ ويىمدا استانا دەگەن ءسوز تەك سونداي سيپاتتامامەن عانا بايلانىساتىن. بىراق مۇنداعى مادەنيەت پەن تازالىقتىڭ جانىندا باسقا كەمشىلىگى بايقالمايدى ەكەن, ءتىپتى. جالپى, مۇنتازداي ۇقىپتىلىقتى ءاربىر استانالىق ءومىر داعدىسى قىلىپ قالىپتاستىرىپتى. ەلوردادا جاستار كوپ. كۇن سايىن قازاقستاننىڭ تۇكپىر-تۇكپىرىنەن اپپاق ارماندارىن ارقالاعان ادامدار وسىندا قونىس اۋدارىپ جاتىر. ولاردىڭ جەتەم دەپ قول سوزعان ماقسات-مۇراتتارى باس قالادا بايانىن تاباتىنىنا سەنەمىن. ويتكەنى, وسى جەر – سانسىز مۇمكىندىكتەردىڭ مەكەنى.
– سۇلۋلىقتىڭ قۇپياسى نەدە؟
اسەم مۇڭايتپاسوۆا,
دارىگەر
– «تاماعى توقتىق, جۇمىسى جوقتىق ازدىرار ادام بالاسىن» دەپ اباي اتام ايتقانداي, سۇلۋلىق جامباستاپ جاتقاننان قاشادى. كىشكەنتاي كۇنىمنەن كەرىلىپ جاتۋدان اۋلاقپىن. بالا كۇنىمنەن-اق سپورتتىڭ بىرنەشە تۇرىنە قاتىستىم. قازىر دە سول قالىپتان تايعان جوقپىن.
– حيت ءاندى قايدان ىزدەۋ قاجەت؟
ولجاس ساقىپوۆ, قارجىگەر
– «حيت ءاندى مىنا جەردەن ىزدەڭىز» دەيتىندەي ناقتى مەكەنجايىن بىلمەيدى ەكەنمىن. اركىمنىڭ باعى مەن بابى بار. ءان دە سولاي. ورىنداۋشىسىن تاپسا, تىڭداۋشىسىن دا مىندەتتى تۇردە تابادى.
– بيىل ءسىز قاتىسقان «جۇلدىزدار ايتىسادى» شوۋى تاعى دا حالىقتىڭ سىنىنا ۇشىرادى. ەسترادا جۇلدىزدارىنىڭ وسىلاي ايتىسۋىنا ءوزىڭىز قالاي قارايسىز؟
نابات قالجىگىت, بانك قىزمەتكەرى
– بيىل دا, بىلتىر دا شوۋ-ايتىس سىندا ءجۇر. مەنىڭشە, وعان وڭ كوزبەن قاراۋعا تىرىسۋ كەرەك. شوۋ-ايتىس – xالىقتىڭ قىزىعۋشىلىعىن ارتتىرۋ ماقساتىمەن جاسالعان دۇنيە. ءوزىمنىڭ دە ماقساتىم – وسىنداي ىسكە كىشكەنە دە بولسا ۇلەس قوسۋ ەدى. شارادا ءبىزدىڭ اقىندىعىمىز ەمەس, شوۋ كورسەتە ءبىلۋ قابىلەتىمىز تانىلدى. سىننان قورىقپايمىن. حالىق ايتقان ورىندى سىندى قابىلداپ, تۇزەتۋگە تىرىسامىن.
– داۋسىڭىزدى قالاي كۇتەسىز؟ جۇمىرتقانىڭ سۇيىعىن ءىشىپ, اۋىزعا جاڭعاق سالۋ دەگەن ادىستەردى قولداناسىز با؟
رۋسلان ماكىشوۆ, اسابا
– داۋىس – اللانىڭ سىيى. وعان كۇتىم جاساۋ – تياناقتىلىقتىڭ, جاۋاپكەرشىلىكتىڭ بەلگىسى دەپ بىلەمىن. سالقىن جانە گازدالعان سۋسىنداردى ىشپەۋگە تىرىسامىن. جاڭعاق جانە پىستەنى مۇلدەم اس ازىرىنە قوسپايمىن. سونىمەن قاتار, داۋىسقا ارنالعان ءارتۇرلى جاتتىعۋلار جاساۋ كۇندەلىكتى ادەتىمدە بار.
– بۇگىندە «جەتىنشى ارنادان» بەرىلەتىن «كۇنباستار» باعدارلاماسىن جۇرگىزىپ ءجۇرسىز. نەگىزى ءسىزدىڭ جۇرگىزۋشىلىك قابىلەتىڭىزدى كوپتەن بەرى بىلەمىز. وسى ورايدا جۇرتشىلىق اراسىندا «انشىلەر جۋرناليستەردىڭ نانىن تارتىپ الدى» دەگەن پىكىر بار. بۇعان نە ايتاسىز؟
ايگۇل جانگەلدى, جۋرناليست
– وسى سۇراقتى كەرىسىنشە قويىپ كورگەن جۋرناليست بار ما ەكەن؟! ەگەر ول كاسىبي مامان, ءوز ءىسىنىڭ ءمىنسىز شەبەرى بولسا, نازاردان تىس قالىپ قويۋى مۇمكىن ەمەس دەپ ويلايمىن. مىسالى, بەلگىلى تەلەجۇرگىزۋشى ءلايلا سۇلتانقىزىنىڭ كوپ جىلدىق ەڭبەگىنىڭ كۋاگەرىمىز. دەڭگەيى مىقتى كىسى! كەز كەلگەن باعدارلامانى, كونتسەرتتى, فورۋمدى ساپالى جۇرگىزە بىلەدى. سونداي شارۋا قولدارىڭىزدان كەلسە, مارحابات! ماسەلە ءانشىنىڭ جۇرگىزۋشى نەمەسە جۇرگىزۋشىنىڭ ءانشى بولۋىندا ەمەس. ءوز ماماندىعىنان مۇلدە الىس انشىلەر دە جەتكىلىكتى. سەنىڭ كاسىبىڭ ەمەس دەپ قايسىبىرىنە كىنا ارتۋعا بولادى؟! ءوز باسىم ماعان ۇسىنىلعان جۇمىستىڭ قولىمنان كەلىپ, شامام جەتكەنىنە عانا كەلىسىمىمدى بەرەمىن. بىرەۋدىڭ نانى تۇگىلى قالتاسىنا قاراۋدان اۋلاقپىن. تەلەارنالار, ۇيىمداستىرۋشىلار شاقىراتىنى راس. ەكى اۋىز ءسوزدىڭ باسىن قوسا المايتىن, تىلگە شورقاق اداممىن دەپ ويلامايمىن.
– ءمولدىر ءۇشىن توي-بيزنەس پەن شوۋ-بيزنەستىڭ اراسىندا شەكارا بار ما؟ تويعا كيگەن كيىمدى ساحناعا كيىپ, تويدا ايتقان ءاندى ساحنادا شىرقاپ جۇرەسىز بە, الدە ارقايسىسىنىڭ ءوز ورنى بار ما؟
كۇنزيرا وسپانوۆا, ءۇي شارۋاسىنداعى ايەل
– بىزدە توي بار, شوۋ جوق. ايىرماشىلىعى وسى عانا. مەنىڭ كونتسەرتتە ورىندايتىن استارلى اندەرىمنىڭ تويدا ورىندالۋى ەكىتالاي. ماسەلەن, «وسيەت» ءانىن ەلەستەتىپ كورىڭىزشى؟ ءاننىڭ قاي كەزدە, قاي جەردە ورىندالۋى ونىڭ ماعىناسىنا, شىعۋ تاريxىنا بايلانىستى. رەپەرتۋارىمدا تويعا ارنالعان «جەزدەكە» سەكىلدى اندەر بار. بۇل اندەر مەنىڭ ورىنداۋىمدا تەك تويدا شىرقالادى. ال كيىم ماسەلەسى وڭايىراق. بارىمىزدى كيەمىز.
– پروديۋسەرلىك ءىسىڭىز قالاي دامۋدا؟
جانات ەسمۇحان, جەكە كاسىپكەر
– مەن پروديۋسەر ەمەسپىن. پروديۋسەر دەگەن ۇعىم قازىرگى تاڭدا سانگە اينالدى. ناعىز پروديۋسەر دەپ قىدىرالى بولمانوۆ سىندى اعا-اپكەلەرىمىزدى ايتۋ كەرەك. مەن ۇستازبىن. شاكىرت تاربيەلەپ, جاس ونەرپازعا جول سىلتەۋدى ۇستازدىق دەپ بىلەمىن.
– كەلىن اتانعانىڭىزعا كوپ بولا قويعان جوق. ءۇي مەن ونەردى قاتار الىپ ءجۇرۋ قيىن با؟ كۇيەۋىڭىز نەمەسە ونىڭ تۋىستارى ءسىزدىڭ شىعارماشىلىقپەن اينالىسۋىڭىزعا قارسى ەمەس پە؟
بەگىمزادا كوشقاليەۆا, بالا كۇتۋشىسى
– ادامنىڭ نيەتى ءتۇزۋ بولسا, قيىندىق تۋمايدى. ءۇي مەن ونەردى قاتار الۋدا اۋىرتپاشىلىقتىڭ بولۋ-بولماۋى وزىمە بايلانىستى. الدىڭعى قاتارعا وتباسىمدى قويعانىمدى كورىپ وتىرعان جولداسىم, كەرىسىنشە, ونەرىمە ۇلكەن قولداۋ بىلدىرۋدە. شاڭىراعىمىزدا مەن ءۇشىن الدىمەن قۇداي قوسقان قوساعىمنىڭ ريزاشىلىعى ماڭىزدى. سول سەبەپتى دە, كونتسەرت بولسىن, ءتۇسىرىلىم بولسىن, ەڭ اۋەلى وتاعاسىنان رۇقسات الامىن.
– ونەر يەلەرى ۇنەمى ماسكامەن جۇرەدى دەگەنگە كەلىسەسىز بە؟
تالاسبەك نۇرتازين, وقۋشى
– بۇل – جاي عانا ستەرەوتيپ. اعىلشىننىڭ ايگىلى اقىنى شەكسپير «ءومىر – تەاتر, ال ادامدار – اكتەرلەر» دەگەن ەكەن. ءومىر ساحناسىندا ءبارىنىڭ – مەيلى ءانشى, مەيلى مۇعالىم, مەيلى قۇرىلىسشى بولسىن, ءبىر ەمەس, بىرنەشە بەتپەردەسى بار. سوندىقتان بۇل نارسەنى ءبىر توپقا عانا تەلىپ قويۋعا بولمايدى. ونەر ادامى دا ەت پەن سۇيەكتەن جارالعان. ونىڭ دا وتباسىندا نە قىزمەتىندە قيىندىقتار تۋى مۇمكىن. ىشتەگى ءتۇتىندى سىرتقا بىلدىرمەي, بۇقاراعا تەك جاقسى كوڭىل-كۇي سىيلاعىسى كەلەتىن جاندى نە ءۇشىن سوگەمىز؟!
دايىنداعان: بوتاگوز ماراتقىزى
