ەلباسى نۇرسۇلتان نازارباەۆ استاناداعى ناۋرىز مەيرامىنا ارنالعان ءىس-شاراعا قاتىستى. مەرەكەلىك ءىس-شارا اياسىندا مەملەكەت باسشىسى «جاڭارعان جەر, باق قونعان نۇرلى ەل» ميۋزيكلىن تاماشالادى. سونداي-اق, «ەكسپو» كورمە كەشەنى اۋماعىندا ورنالاسقان ەتنواۋىلدى ارالاپ كوردى.
مەملەكەت باسشىسى بۇقارالىق اقپارات قۇرالدارى وكىلدەرى الدىندا ءسوز سويلەدى. نۇرسۇلتان نازارباەۆ بارشا قازاقستاندىقتاردى ناۋرىز مەرەكەسىمەن قۇتتىقتاپ, بۇل مەيرام ۇرپاقتار ساباقتاستىعىنىڭ جانە حالقىمىزدىڭ تەرەڭنەن تامىر تارتقان سالت-ءداستۇرى مەن مادەنيەتىنىڭ سيمۆولىنا اينالعانىن ايتتى.
– ناۋرىز شىنايى جالپىحالىقتىق مەرەكەگە, ءاربىر ازاماتىمىز بۇكىل قازاقستاننىڭ دامۋى مەن وركەندەۋىنە زور ۇلەس قوسىپ وتىرعانىن كورسەتەتىن ەل بىرلىگىنىڭ جارقىن ۇلگىسىنە اينالدى, – دەدى نۇرسۇلتان نازارباەۆ.
قازاقستان پرەزيدەنتى جالپىعا ورتاق جاڭارۋ مەن رۋحاني جاڭعىرۋدى تانىتاتىن بۇل قاستەرلى مەرەكەنىڭ ونەگەلىك ماڭىزى زور ەكەنىن ەرەكشە اتاپ ءوتتى.
– ەجەلدەن بۇل مەيرام ادامداردى بەرەكە-بىرلىككە باستاپ, ولاردى جاقسىلىق پەن مەيىرىمدىلىككە, ماحاببات پەن شاتتىققا بولەپ كەلەدى. بۇل كۇندەرى ءبىز ءبىر-بىرىمىزگە قولداۋ كورسەتىپ, وكپە-رەنىشىمىزدى كەشىرەمىز, ۇيلەسىمدىلىك پەن بىرلىككە ۇمتىلامىز. ەلىمىزدىڭ جاھاندىق باسەكەگە قابىلەتتىلىگىنىڭ بەرىك نەگىزىن قالىپتاستىرىپ, ءوزارا قۇرمەت پەن كەلىسىم قۇندىلىقتارىن نىعايتۋ ءبارىمىز ءۇشىن اسا ماڭىزدى, – دەدى ەلباسى.
مەملەكەت باسشىسى قازاقستاننىڭ تاۋەلسىزدىك جىلدارىندا باستى بارلىق باعىتتار بويىنشا زور ناتيجەلەرگە قول جەتكىزگەنىنە ەرەكشە نازار اۋدارىپ, بۇگىندە ەلىمىز ودان دا ءورشىل ماقساتتى – الەمنىڭ وزىق دامىعان وتىز ەلىنىڭ قاتارىنا قوسىلۋدى كوزدەپ وتىرعانىن اتاپ ءوتتى.
پرەزيدەنت ءاربىر ازاماتىمىزعا جاڭا مۇمكىندىكتەر بەرەتىن «بەس الەۋمەتتىك باستامانى» ىسكە اسىرۋ ماسەلەسىنە ەرەكشە توقتالدى.
سوڭىندا ەلباسى وتانىمىز – قازاقستان رەسپۋبليكاسىنىڭ وركەندەۋى جولىندا بارشا جۇرتقا باقىت, بەرەكە-بىرلىك پەن تولاعاي تابىس تىلەدى.
