جامبىل جاباەۆ اتىنداعى №4 مەكتەپ-گيمنازياسىندا وقۋشىلارعا ارنالعان ءان مەرەكەسى ءوتتى. «ونەرلى وتباسى» دەپ اتالاتىن بۇل كونتسەرت ەڭ اۋەلى وسى ءبىلىم ۇياسىنداعى بالالارعا ارناپ قويىلدى.
رەسپۋبليكاعا ەسىمى ايگىلى ءانشى, جىراۋ ەلميرا جاڭابەرگەنوۆا قۇداي دارىتقان سيرەك تالانتىمەن شەتەلدەردە قازاقتىڭ مارتەبەسىن اسىرىپ ءجۇر. بۇل ءبىلىم وشاعىندا تۋعان حالقىنىڭ سۇيىكتى انشىسىنە اينالعان ەلميرا ماناسقىزىنىڭ ەكى قىزى وقيدى. سالتانات پەن ساندۋعاش – انا جولىن قۋعان جاس دارىندار, جاۋقازىن گۇلدەي ەندى ءبۇر جارىپ كەلەدى. بيىل مەكتەپ بىتىرەتىن سالتاناتى بىرنەشە حالىقارالىق بايقاۋلاردا جەڭىمپاز اتاندى. سونىڭ ءبىرى – حالىقارالىق «بوزتورعاي» بايقاۋىنىڭ باس جۇلدەسى. ول قوبىزبەن كۇي شالادى, ءان سالادى. ساندۋعاشتىڭ سەگىز جاسىنان دومبىراسىن قاعىپ, توگىلتە تەرمە ايتقانىن ەستىگەندە ءالى قاۋىرسىنى قاتپاعان بالاپان ەكەنىن, بابى كەلىسسە, بيىكتەرگە شىرقايتىنىن سەزىنىپ قۋاناسىڭ. كىپ-كىشكەنتاي كەزىنەن حالىقارالىق بايقاۋلارعا ول دا قاتىسىپ ءجۇر.
بالالارعا تەگىن كونتسەرت-ءدارىس قويىپ بەرگەن ەلميرا ماناسقىزى وزىمەن بىرگە تۋعان ءسىڭلىسى, جاستار تەاترىنىڭ اكتريساسى ايشولپان يبراەۆانى, شاكىرتى ءاليحان دۇيسەنبايدى الا كەلگەن. ءاربىر ءان, تەرمە, جىردى ورىندار الدىندا ءانشى بالالارعا جىراۋ تۋرالى ۇلكەن تۇسىنىك بەردى, سوزدەرىن ولاردىڭ بولمىس-ءبىتىمى مەن ءومىر جولدارىنان, قايراتكەرلىگىنەن الىنعان قىزىقتى دەرەكتەرمەن بايىتتى. تالاي جاس بالانىڭ كەۋدەسىندەگى سىر ساندىعىنىڭ التىن كىلتىن ءانشى اپالارى بازار جىراۋ, تۇرماعامبەت, نۇرتۋعان جىرلارىنان, ءوزىنىڭ «جىر باستاۋىن» توگىلتكەندە اينىتپاي تاپقانى ءشۇباسىز. ويتكەنى, ءتول مادەنيەتى – كەز كەلگەن حالىقتىڭ رۋحاني قورەگى.
مەكتەپ ديرەكتورى بازاركۇل سىزدىقوۆا بىلاي دەدى: «تاربيەلىك ءمانى بار تاماشا كەش بولدى. ال ەلميراداي حالقىنىڭ ماراپاتىنا بولەنگەن ايتۋلى ءانشىنىڭ ونەر جولىن ەندى باستاعان ەكى قىزىنىڭ ونەرى وزدەرى قاتارلى بالالارعا اسەر ەتكەنىن كوردىم. ءتىل-كوزدەن ساقتاسىن, ونەرلەرى ءوسسىن دەيمىن. 200 ورىندىق مەكتەپ زالى تولىپ وتىردى, بۇل ءبىر يگى باستاما ەكەن, العىسىمىز شەكسىز».
استانانىڭ ءار مەكتەبىن ارالاپ, وتانسۇيگىشتىك رۋحقا ادال كونتسەرتتەر قويۋدى سۇيىكتى ءانشىمىز داستۇرگە اينالدىرعىسى بار.
ايگۇل كەمەلباەۆا,
جازۋشى
