سۋيتسيد وتكىر ماسەلەگە اينالدى. اسىرەسە, جاسوسپىرىمدەر اراسىندا وزىنە قول جۇمسايتىندار كوبەيدى. ماسەلەن, 2024 جىلدىڭ 2 ايىندا استانا قالاسىندا كامەلەتكە تولماعاندار اراسىندا سۋيتسيدتىك مىنەز-قۇلىقتىڭ 26 وقيعاسى تىركەلدى. ونىڭ 3-ىندە ءجاسوسپىرىم وزىنە قول جۇمسادى. ونىڭ ءتۇرلى سەبەپ-سالدارى بار. ەلوردادا 365 مىڭ وقۋشى ءبىلىم السا, ولارعا 100-دەن اسا پسيحولوگ قىزمەت ەتەدى. كەيىنگى كەزدەرى پسيحولوگتاردىڭ جەتىسپەۋشىلىگىنەن ءسۋيتسيدتىڭ الدىن الۋ قيىن دەگەن پىكىردى ەستىپ ءجۇرمىز. سوعان بايلانىستى وتكەن جىلى قازان ايىندا استانانىڭ بەس اۋدانىندا پسيحولوگيالىق-كونسۋلتاتسيالىق كومەك كورسەتۋ كابينەتى اشىلعان-دى. قالالىق ءماسليحات دەپۋتاتتارى وسى ورتالىقتاردىڭ جۇمىسىمەن تانىستى.
دەپۋتاتتار كەندەباي ادامبەك, اسقار سماعۇلوۆ, ماۋلەن سامامبەتوۆ, باۋىرجان قاسىمبەرگەباەۆ جانە بەكزات جولجاقسىنوۆ ءبىرىنشى №36 مەكتەپتە قۇرىلعان پسيحولوگيالىق كابينەتكە باردى.
ەلوردالىق ادىستەمەلىك ورتالىقتىڭ باسشىسى سىندار داۋەشوۆانىڭ سوزىنشە, وقۋ-تاربيە پروتسەسىن ادىستەمەلىك قامتاماسىز ەتۋ, يننوۆاتسيالىق پروتسەستەردى ەنگىزۋ, ءبىلىم بەرۋ ۇيىمدارى پەداگوگتارىنىڭ بىلىكتىلىگىن ارتتىرۋ جانە كاسىبي قۇزىرەتتىلىگىن جەتىلدىرۋ باعىتىندا جۇمىس ىستەيمىز. سونىڭ شەڭبەرىندە وتكەن جىلى قازان ايىندا بەس اۋداندا استانالىقتارعا تەگىن پسيحولوگيالىق-كونسۋلتاتسيالىق كومەك كورسەتەتىن كابينەتتەر قۇرىلدى. اشىلعالى پسيحولوگتار 1171 جەكە كونسۋلتاتسيا وتكىزدى. ونىڭ 483-ءى – اتا-انالار, 445-ءى – بالالار, 243-ءى – پەداگوگتار.
دەپۋتاتتار ارنايى كابينەتكە تۇرعىندار قالاي جازىلاتىنىن, پسيحولوگيالىق كەڭەستى ۇيىمداستىرىپ جۇرگىزەتىن ۋاقىتتى, ءتاسىلى, قۇرالى تۋرالى سۇرادى.
تاجىريبەلى مامان مايرا رۇستەموۆا قىزمەت ەتەتىن پسيحولوگيالىق ورتالىقتىڭ جۇمىسى جۇيەلەنىپ, كەلۋشى ادامدار سانى ارتىپ كەلەدى.
استانا قالاسىنىڭ ءبىلىم باسقارماسى باسشىسىنىڭ ورىنباسارى سەرىك ادىلباەۆتىڭ سوزىنشە, ءبىر پسيحولوگ 500 جاسوسپىرىممەن جۇمىس ىستەپ, ولاردىڭ كوڭىل-كۇيىن, ارمان-ماقساتىن, قىزىعۋشىلىعىن ءبىلىپ, جەكە-جەكە جۇمىس ىستەۋى كەرەك. الايدا استانالىق پسيحولوگتاردىڭ جۇكتەمى تىم اۋىر. وسىنى ەسكەرگەن شاھار باسشىسى جەڭىس قاسىمبەك تاعى 200 پسيحولوگ شتاتىن قاراستىرۋعا جۇمىس ىستەۋدە ەكەن. اكىمنىڭ جوسپارلى جۇمىس شەشىمىن تاباتىن بولسا, وندا ءار مەكتەپتە 3-4 پسيحولوگتان كەلەتىن بولادى
– ءار اپتانىڭ دۇيسەنبى, سەيسەنبى جانە سارسەنبى كۇندەرى قالا تۇرعىندارىن قابىلدايمىز. سارىارقا اۋدانىنىڭ تۇرعىندارى ونلاين جانە تەلەفون ارقىلى جازىلادى. 1 ناۋرىزدان بەرى 67 ادامعا كەلدى. ونىڭ 34-ءى – اتا-انا. ولاردى نە مازالايتىنىن ءبىلىپ, ەمىن-ەركىن اڭگىمەلەسىپ, سۇحباتتاسامىن. سوسىن تىعىرىقتان شىعۋ جولى تۋرالى پسيحولگيالىق كەڭەس بەرەمىن, – دەدى پسيحولوگ م.رۇستەموۆا.
قازىر قوعامداعى وتباسىلىق قۇندىلىقتاردىڭ السىرەۋى, جاستاردىڭ بويىندا ادامگەرشىلىك قاسيەتتەردىڭ جوعالۋى, تاربيەنىڭ تومەندەۋى, ادامدار اراسىنداعى رۋحاني بايلانىستى تومەندەتتى. ناتيجەسىندە دەپرەسسياعا وڭاي تۇسەتىن بالالار سانى كوبەيدى. مۇنداي كەزدە وقۋشىلاردان بولەك, اتا-انالار دا پسيحولوگتارعا جۇگىنگەنى دۇرىس.
استانا قالاسىنىڭ ءبىلىم باسقارماسى باسشىسىنىڭ ورىنباسارى سەرىك ادىلباەۆتىڭ سوزىنشە, ءبىر پسيحولوگ 500 جاسوسپىرىممەن جۇمىس ىستەپ, ولاردىڭ كوڭىل-كۇيىن, ارمان-ماقساتىن, قىزىعۋشىلىعىن ءبىلىپ, جەكە-جەكە جۇمىس ىستەۋى كەرەك. الايدا استانالىق پسيحولوگتاردىڭ جۇكتەمى تىم اۋىر. وسىنى ەسكەرگەن شاھار باسشىسى جەڭىس قاسىمبەك تاعى 200 پسيحولوگ شتاتىن قاراستىرۋعا جۇمىس ىستەۋدە ەكەن. اكىمنىڭ جوسپارى شەشىمىن تاپسا, وندا ءار مەكتەپتە 3-4 پسيحولوگتان كەلەتىن بولادى.
– ۋاقىتتىڭ سۇرانىسىنا ساي پسيحولوگتاردىڭ ەڭبەگى باعالانا باستادى. قازىر ەلوردادا اقىلى كومەك كورسەتەتىن پسيحولوگيالىق ورتالىقتار كوبەيدى. ءبىر قابىلداپ, كەڭەس بەرۋىنىڭ ءوزى – 25-30 مىڭ تەڭگە. ەگەر 1-2 ايعا جازىلسا, وندا 200-400 مىڭ تەڭگە شىعىنداۋعا تۋرا كەلەدى. ءبىزدىڭ كابينەتتەر پسيحولوگيالىق-پەداگوگيكالىق ماسەلەلەر بويىنشا تەگىن كونسۋلتاتسيالىق كومەك كورسەتەدى. ءارى پسيحولوگتارىمىز ۇنەمى ءبىلىمىن جەتىلدىرىپ وتىراتىن تاجىريبەلى ماماندار, – دەيدى سىندار داۋەشوۆا.
ەكىنشى پسيحولوگيالىق كابينەت اقسەلەۋ سەيدىمبەك اتىنداعى №54 مەكتەپ-ليتسەيدە ورنالاسقان ەكەن. دەلەگاتسيامەن بىرگە سوندا باردىق. ايگۇل بارانباەۆا سۇيەمەلدەيتىن كابينەتكە كەلەتىندەر كوپ ەكەن. اشىلعالى 210 ادامدى قابىلداپتى. ونىڭ جارتىسىنا جۋىعى اتا-انا.
ءماسليحات دەپۋتاتى باۋىرجان قاسىمبەرگەباەۆ:
– جاسىراتىنى جوق, سۋيتسيد جاعدايى ءجيى ورىن الاتىن بولدى. وعان ءتۇرلى جاعداي اسەر ەتەدى. سوندىقتان ادامنىڭ جان دۇنيەسىنە اشىپ, سىرلاسىپ, رۋحاني كۇيزەلىسىنىڭ سەبەبىن انىقتاپ, دۇرىس كەڭەس بەرەتىن پسيحولوگتاردىڭ جۇمىسىنا سۇرانىس ارتتى. جالپى پسيحولوگيالىق كەڭەس بەرۋدىڭ تيىمدىلىگى ونى ۇيىمداستىرۋدىڭ كەڭىستىكتەگى ورنى مەن ۋاقىتىنا تىكەلەي بايلانىستى. قاجەت بولسا, وسى باعىتتا دەپۋتاتتارمەن بىرلەسىپ كومەك بەرەيىك, – دەدى.
دەپۋتاتتىڭ ايتقان ءسوزى ءجون. پسيحولوگيالىق كابينەت ادامعا ىڭعايلى, جايلى, قولايلى بولۋى شارت. سوندا عانا پسيحولوگتىڭ جۇمىسى ناتيجەلى بولادى.
ءبىز 17 جىلدىق تاجىريبەسى بار پسيحولوگ ايگۇل بارانباەۆانى اڭگىمەگە تارتىپ, پسيحولوگيالىق-پەداگوگيكالىق كەڭەس بەرۋدىڭ ەرەكشەلىگى, قالاي ىسكە اساتىنى تۋرالى سۇرادىق.
– پسيحولوگيالىق كەڭەس قاراستىرىلاتىن ماسەلە سيپاتىنا قاراي وتباسىلىق, پسيحولوگيالىق-پەداگوگيكالىق, قىزمەتتىك جانە تاعى باسقا بولىپ بولىنەدى. ءبىز جۇگىنۋشى ادامدى تىڭداۋ, اڭگىمەلەسۋ ارقىلى نە مازالايتىنىن ءبىلىپ, عىلىمي قورىتىندى شىعارىپ, تىعىرىقتان شىعۋ جولدارىن بىرلەسە قاراستىرىپ, ناقتى ءىس-ارەكەت ىستەۋگە كەڭەس بەرەمىز. كەيدە ءبىر اداممەن 10 مينۋتتان 2 ساعاتقا دەيىن سۇحبات قۇرامىز. ءتىپتى ءبىر اداممەن 3-4 ايعا دەيىن پىكىرلەس بولامىز, – دەدى پسيحولوگ.
2023 جىلدىڭ 12 ايىندا استانا قالاسىندا كامەلەتكە تولماعاندار اراسىندا سۋيتسيدتىك ارەكەتتىڭ 117 وقيعاسى تىركەلدى. بۇل از ەمەس. مۇنىڭ نەگىزگى سەبەپ-سالدارى نەدەن؟
– وتباسىنداعى جانجال جاسوسپىرىمدەردىڭ پسيحيكاسىنا تەرىس اسەرى كوپ. دوستارىمەن جانجال سالدارىنان دەپرەسسياعا ءتۇسىپ جاتادى. اتا-انالار اراسىندا بالاسىنا شەكتەن تىس تالاپ قويىپ جاتادى. اكەسى مەن ۇلى نەمەسە شەشەسى مەن قىزى اراسىندا رۋحاني بايلانىس بولماۋىنان ورتاق تاقىرىپتاردا سويلەسە المايدى. مۇنداي بالالار ءوزىن قوعامعا كەرەكسىز سەزىنەدى. وتباسىلىق ءداستۇر, وتباسىلىق قۇندىلىق بولماعاندىقتان داستارقان باسىندا جينالىپ, اڭگىمە ايتىپ, ورتاق ماقسات بەلگىلەۋ جاعى كەمشىل بولادى. مۇنداي وتباسىندا تاربيەلەنگەن بالالاردىڭ پسيحولوگياسى ءالسىز بولادى, – دەدى ايگۇل بارانباەۆا.
استانا قالاسى دەپۋتاتتارىمەن بىرگە الماتى, ەسىل, نۇرا اۋدانىنداعى پسيحولوگيالىق كابينەتتەرگە بارىپ, اتقارىلىپ جاتقان جۇمىستاردى بىلدىك. وندا ەربول ءابدىحاميت, ايجامال يسابەكوۆا, تالجىبەك ساتىمبەكوۆا, ەلەونورا قوشاناليەۆا جانە گۇلميرا كاپانوۆا جۇمىس ىستەيدى.
P.S:قازىر جاسوسپىرىمدەردىڭ ءسۋيتسيدتى مىنەز-قۇلقىنىڭ الدىن الۋ ماڭىزدى مىندەتكە اينالدى. پسيحولوگتارمەن تىلدەسۋ باسىندا ءسۋيتسيدتى الدىن الۋدا وتباسىنداعى مەيىرىمدىلىك وڭ اسەر ەتەتىنىن, بالالاردىڭ ءتۇرلى ويىندار, ۆيرتۋالدى انيماتسيا تۇتىنۋىن شەكتەۋ كەرەكتىگىن تۇسىندىك. جالپى پسيحولوگيالىق كەڭەس بەرەتىن كابينەتتەرگە سۇرانىس ارتقانىن بىلدىك.
