كەشەدەن بەرى تولاسسىز جاۋعان قالىڭ قار استانانى اق ۇلپاعا ورادى. قالانىڭ كوممۋنالدىق قىزمەتى قار تازالاۋ جۇمىستارىنا قىزۋ كىرىسىپ كەتتى. كوشەلەر مەن اۋلالارعا 2,5 مىڭعا جۋىق جۇمىسشىلار شىعىپ, مىڭنان اسا ارنايى تەحنيكالار جۇمىلدىرىلدى.
كىرشىكسىز تازا, جىپ-جىلى, جۇمساق جاپالاقتار ءبىرىن-ءبىرى قۋا جارىسىپ, بەتىڭدى ايمالايدى. ەپتەپ قىتىقتايدى ما, قايتەدى؟ ايتەۋىر, ادامعا ايرىقشا اسەرلى سەزىم سىيلايدى. سودان بولار, قار جاۋسا ۇلكەن دە, كىشى دە جاس بالاشا شاتتانىپ, قۋانادى. ويتكەنى قىستىڭ ءبىر قىزىعى قار ەكەنى راس قوي.
تازالىققا جاۋاپتى ماماندار كۇن-ءتۇن دەمەي دامىلسىز قار شىعارۋمەن اينالىسىپ, كوكتايعاقتىڭ الدىن الۋ ماقساتىندا قۇمشاشقىشتاردىڭ كۇشىمەن جولدارعا قۇم مەن تۇز ارالاس ماتەريالدار سەۋىپ الەك.
سى جۇمىستاردى اتقارۋعا ەلوردادا سوڭعى تاۋلىكتە 2,5 مىڭعا جۋىق جول جۇمىسشىلارى مەن ءبىر مىڭنان استام ارنايى تەحنيكا جۇمىلدىرىلدى. ولار ءبىرىنشى كەزەكتە ورتالىق كوشەلەر, جاياۋ جۇرگىنشىلەر جولى مەن ايالدامالاردىڭ ماڭىن تازالاۋدا.
ەلورداداعى كوممۋنالدىق قىزمەتتەردىڭ كۇشىمەن كەشە 5 مىڭ تەكشە مەتردەن استام قار جينالىپ, پوليگوندارعا شىعارىلدى. بۇل 500-گە جۋىق رەيستى قۇرادى.
قىس مەزگىلى باستالعالى بەرى استانا اۋماعىنان بارلىعى 200 مىڭ تەكشە مەترگە جۋىق قار شىعارىلدى, بۇل 15 مىڭنان استام اۋىر جۇك كولىگىنە تەڭ.
جالپى شاھاردا قار شىعارۋ جۇمىستارى دەر كەزىندە قولعا الىنىپ, تازالىق ويداعىداي ورىندالىپ جاتىر.
ءيا, حالقىمىز ىرىسقا بالايتىن, جەر-انانىڭ تامىرىن تولتىرىپ, ىلعالعا اينالاتىن وسى اق ۇلپا قىزىق ءارى ادەمى كورىنگەنىمەن, ماشاقاتى دا جوق ەمەس. تولاسسىز جاۋعان قار كوشەلەردى باسىپ, قالا تۇرعىندارى ءۇشىن قولايسىزدىق تۋدىرماۋى كەرەك. ۇزىن-سونار كەپتەلىستەر قالىپتاسىپ, كوكتايعاقتىڭ كەسىرىنەن اۆتوبۋستار جۇمىس كەستەسىنەن كەشىكپەۋى تاعى بار. وسى باعىتتا قالالىق قىزمەتتەر تىنىم تاپپايدى. قىسقاسى, قالادا قار تازالاۋ قاربالاسى باستالىپ كەتتى.
