قازاقستاندىق «ەلەكتروندىق ۇكىمەت» قىزىقتىرادى
پرەزيدەنت نۇرسۇلتان نازارباەۆ ەلىمىزدى الەمنىڭ دامىعان 30 ەلىنىڭ قاتارىنا قوسۋ جولىندا بىرەگەي ىستەرگە قادام باسۋدا. اسىرەسە, قازاقستاندا ءبىلىم بەرۋ مەن اقپاراتتىق تەحنولوگيا سالالارىن جەتىلدىرە ءتۇسۋ ءۇشىن ىرگەلى شارالار قولعا الىنۋدا. اتقارىلعان شارۋالار دا ناتيجەسىز ەمەس, بىزدەن كورشى ەلدەر ۇلگى الاتىن دارەجەگە دە جەتىپ ۇلگەردىك. ايتالىق, جاقىندا تاجىكستان وكىلدەرى ەلەكتروندىق ۇكىمەتتى قۇرۋدىڭ قازاقستاندىق تاجىريبەسىن ۇيرەنۋ ماقساتىمەن استاناعا كەلدى. بۇل جونىندە گازەت تىلشىسىنە «ۇلتتىق اقپاراتتىق تەحنولوگيالار» اق باسقارما توراعاسى رۋسلان ەڭسەباەۆ اڭگىمەلەپ بەردى.
– الىستان ات تەرلەتىپ كەلگەن اعايىنعا الدىمەن قاي جەتىستىكتەرىڭىزدى كورسەتتىڭىزدەر؟
– قازاقستانداعى «ەلەكتروندىق ۇكىمەت» قۇرۋ تاجىريبەسىن ۇيرەنۋ ءۇشىن استاناعا تاجىكستان رەسپۋبليكاسى مەملەكەتتىك ورگاندارىنىڭ وكىلدەرى كەلدى. تاجىكستان دەلەگاتسياسىمەن كەزدەسۋ اياسىندا, «ۇلتتىق اقپاراتتىق تەحنولوگيالار» اق وكىلدەرى «ەلەكتروندىق ۇكىمەت» پورتالى, ەلەكتروندىق قۇجات اينالىمى جۇيەسى, «ە-ليتسەنزيالاۋ» جۇيەلەرى جانە «e-Learning» جۇمىسىن جان-جاقتى كورسەتتى. سونداي-اق قازاقستان رەسپۋبليكاسىنىڭ اقپاراتتاندىرۋ سالاسىنداعى بىرىڭعاي تەحنيكالىق ساياساتىن ىسكە اسىرۋ جونىندەگى ءتاجىريبەمىزبەن بولىستىك. سونىمەن قاتار, استانانىڭ قوناقتارىنا وسىنداعى حالىققا قىزمەت كورسەتۋ ورتالىقتارىنىڭ ىقپالداستىرىلعان اقپاراتتىق جۇيەسى قالاي جۇمىس ىستەيتىندىگى تۋرالى ءتۇسىندىرىلدى.
– شەتەلدىكتەر پىكىرى جونىندە ايتا الاسىز با, ماسەلەن, بىزدەگى اقپاراتتىق تەحنولوگيا جۇيەسى ولاردىڭ كوڭىلىنەن شىقتى ما؟
– البەتتە, ءبىزدىڭ تاجىريبەمىز, جۇمىس جۇيەمىز ولارعا ۇنادى دەپ ويلايمىن. ويتكەنى, تاجىكستان رەسپۋبليكاسى پرەزيدەنتى جانىنداعى مەملەكەتتىك باسقارۋ ينستيتۋتىنىڭ عىلىم جانە حالىقارالىق قاتىناستار جونىندەگى رەكتور ورىنباسارى اكمالدجون ابدۋحاليكوۆ قازاقستاندىق اقپاراتتىق تەحنولوگيانىڭ قارقىندى دامۋىنا تاڭعالىسىن جاسىرمادى. «تاجىكستاندا قازاقستانداعى سياقتى كوپتەگەن ە-ۇكىمەت قىزمەتىن قامتاماسىز ەتەتىن زاڭنامالىق جانە نورماتيۆتىك-قۇقىقتىق قۇجاتتار قابىلدانعان, الايدا ولاردى ىسكە اسىرۋ مەحانيزمى ازىرشە دۇرىس جولعا قويىلماعان. قازاقستان, بۇل جونىندە ايتارلىقتاي ناتيجەلەرگە جەتكەن ەكەن. ءبىز دە سىزدەردىڭ تاجىريبەلەرىڭىزدى قابىلدايمىز دەپ ۇمىتتەنەمىن» دەپ اعىنان جارىلدى ول.
– مۇنداي شارالار الداعى ۋاقىتتا دا جالعاسۋى مۇمكىن بە؟
– ەگەر ءبىزدىڭ تاجىريبەمىزدى ءۇيرەنگىلەرى كەلىپ, ۇسىنىس جاسايتىندار بولسا, ءاردايىم دايىنبىز. «ۇلتتىق اقپاراتتىق تەحنولوگيالار» اق كورشى ەلدەرگە ەلەكتروندىق ۇكىمەتتى قۇرۋدا جانە دامىتۋدا ادىستەمەلىك كومەك كورسەتۋدەن باس تارتپايدى.
اسحات رايقۇل