استانا قالاسى ستاتيستيكا دەپارتامەنتىنىڭ مالىمەتى بويىنشا, ەلوردادا وتكەن جىلدارى, اتاپ ايتقاندا 2011 جىلى – ءجۇز ون جەتى, 2012 جىلى – ءجۇز ون سەگىز, ال بيىل ءجۇز وتىز ءتورت جانار-جاعار ماي قۇيۋ ستانساسى تىركەلگەن. سونىڭ ءجۇز جيىرما ءتورتى – تۇراقتى, ۇشەۋى – كونتەينەرلىك, جەتەۋى – جىلجىمالى ستانسا.
استاناعا بەنزين شىمكەنت, اتىراۋ, پاۆلودار مۇناي زاۋىتتارىنان اكەلىنەدى. سونىمەن قاتار, جەكە مەنشىك جانار-جاعار ماي قۇيۋ ستانسالارى ۋفا, ومبى, چەليابى, ورسك, تاعى دا باسقا رەسەي قالالارداعى مۇناي وڭدەۋ زاۋىتتارىنان بەنزين الۋ جونىندە كەلىسىمدەر جاساسقان.
جاڭا جىلدان باستاپ ەلىمىزدە مۇناي ونىمدەرى بويىنشا باعا ساياساتى ۇيلەستىرىلەدى. قر ەنەرگەتيكا ءمينيسترىنىڭ ءبىرىنشى ورىنباسارى ۇزاقباي كاراباليننىڭ ايتۋىنشا, «اي-92» بەنزينى 128 تەڭگەدەن 115 تەڭگەگە, ال, ديزەلدى جانار-جاعارمايدىڭ باعاسى 115 تەڭگەدەن 107 تەڭگەگە ارزانداماق. «اي-80» ماركالى بەنزيننىڭ باعاسى وزگەرىسسىز قالادى.
ەلىمىزدە «اي-92», «اي-80» جانە ديزەل وتىنىنىڭ بولشەك ساۋداداعى باعالارىن ۇكىمەت بەلگىلەيدى.
«قازىرگى كەزدە مۇناي ونىمدەرىنىڭ وسى تۇرلەرىنە شەكتى باعالاردى بەلگىلەۋ ەرەجەلەرى ازىرلەنىپ جاتىر, وندا رەسەيلىك نارىقتاعى باعالاردىڭ اۋىتقۋى ەسكەرىلەتىن بولادى جانە 2015 جىلعى 1 قاڭتاردا بەنزيننىڭ شەكتى باعاسىن ۇلتتىق ەكونوميكا مينيسترلىگىمەن كەلىسە وتىرىپ, ەنەرگەتيكا مينيسترلىگى اي سايىن بەلگىلەيتىن بولادى. بۇل رەسەيدە مۇناي باعاسى كونيۋنكتۋراسىنىڭ وزگەرۋىمەن بايلانىستى قىمباتشىلىقتان قورعاۋعا مۇمكىندىك بەرەدى» دەدى ۆيتسە-مينيستر.
جۇما عازيەۆ
