لوندوندا شىلدەنىڭ 27-سىندە الاۋى تۇتانعان XXX جازعى وليمپيادا دا ءوز مارەسىنە جەتتى. بۇل بايراقتى باسەكەدە قازاق ەلى بۇرىن-سوڭدى جەتپەگەن جەتىستىككە قول جەتكىزدى. قازاق ەلىنىڭ قورجىنىندا – 7 التىن, 1 كۇمىس, 5 قولا مەدال! ون ءۇش مەدال ەنشىلەگەن قازاقستان جالپى ەسەپتە 12-ورىننان كورىندى. بۇل قازاق سپورتىنىڭ دامىپ كەلە جاتقانىن كورسەتەدى. لوندون وليمپياداسى قازاقستان ءۇشىن وتە ءساتتى ءوتتى. وليمپيادانىڭ سوڭعى كۇندەرىندە تۇسەتىن مەدالدار بۇل جولى الامان باستالعاننان-اق بىرىنەن كەيىن ءبىرى كەلە باستادى.
تورتجىلدىقتىڭ باستى باسەكەسى باستالىسىمەن ۆەلوسپورتشىمىز الەكساندر ۆينوكۋروۆ 250 شاقىرىمدى 5 ساعات 45 مينۋت 57 سەكۋند ۋاقىتتا ءجۇرىپ ءوتىپ, العاشقى التىندى ولجالادى. الەكساندر 2000 جىلى سيدنەيدە وتكەن وليمپيادادا كۇمىس مەدال العان بولاتىن. ەندى مىنە 12 جىلدان سوڭ وليمپيادا التىنىن ەنشىلەدى. ۆينوكۋروۆتىڭ جەڭىستى جولىن اۋىر اتلەتشىلەرىمىز تاماشا جالعاستىرا ءبىلدى. زىلتەمىر كوتەرۋدەن 53 كەلى سالماقتا سىنعا تۇسكەن زۋلفيا چينشانلو الەم جانە وليمپيادا رەكوردىن جاڭارتىپ, وليمپيادا چەمپيونى اتاندى. لوندون وليمپياداسىنىڭ ءۇشىنشى التىنىن 63 كەلىدە كۇش سىناسقان مايا مانەزا جەڭىپ الدى. ول جۇلقا جانە سەرپە كوتەرۋدىڭ قورىتىندىسى بويىنشا 245 كەلىنى كوتەرىپ, وليمپيادا رەكوردىنا تۇزەتۋ ەنگىزدى. ال 75 كەلى سالماقتا سۆەتلانا پودوبەدوۆا جالپى ەسەپتە 291 كەلىنى باعىندىرىپ, ححح جازعى وليمپيادا ويىندارىنىڭ جەڭىمپازى اتاندى.
سونداي-اق, 69 كەلىدە باق سىناعان اننا نۇرمۇحامەدوۆا قوس جاتتىعۋدىڭ قورىتىندىسىندا 251 كەلىنى كوتەرىپ, بەسىنشى ورىنعا تابان تىرەدى.
اۋىر اتلەتيكادان ەرلەر اراسىنداعى 94 كەلى سالماقتاعى سايىسقا قوس سپورتشىمىز قاتىستى. بۇل سىندا يليا يلين كەرەمەت ونەر كورسەتتى. جۇلقا كوتەرۋدە 185, سەرپە كوتەرۋدە 233 كەلىنى باعىندىرعان يليا وليمپيادا چەمپيونى بولىپ قانا قويماي, كوپتەن بەرى كوبەسى سوگىلمەي كەلگەن الەم رەكوردىن دا جاڭارتتى. ول سونىمەن قاتار قازاق ەلىنىڭ تاريحىندا وليمپيادادا ەكى رەت چەمپيون بولعان العاشقى ساڭلاق. وسى سالماقتاعى ەكىنشى سپورتشىمىز الماس وتەشوۆ 7-ورىنعا تۇراقتادى.
التىنشى التىندى ەل قۇراماسىنا جەڭىل اتلەتشى ولگا رىپاكوۆا سىيلادى. ولگا ءۇش قارعىپ سەكىرۋدە 14.98 م-گە سەكىرىپ, قارسىلاستارىنان قارا ءۇزىپ كەتتى.
وليمپيادانىڭ سوڭعى كۇنى قازاق حالقى ءۇشىن ءساتتى بولدى. بۇل كۇنى جەتىنشى التىندى قازاق ەلىنىڭ قورجىنىنا بوكستان 69 كەلى سالماقتا ەل نامىسىن قورعاعان بوكسشىمىز سەرىك ساپيەۆ سالدى. فينالدا اعىلشىن بوكسشىسى فرە د د ي ەۆانستى 17:9 ەسەبىمەن جەڭگەن سەرىك ەڭ ۇزدىك بوكسشىعا بەرى لەتىن ۆەل باركەر كۋبوگىن دا يەلەندى. ول – وسى كۋبوكتى العان ءۇشىنشى بوكسشىمىز. بۇعان دەيىن 1996 جىلى ۆاسيلي جيروۆ, 2004 جىلى باقتيار ارتاەۆ ۆەل باركەر كۋبوگىن جەڭىپ العان بولاتىن. ال 81 كەلىدە ادىلبەك نيازىمبەتوۆ اقتىق سايىستا رەسەيدىڭ سوڭعى ءۇمىتى ەگور مەحونتسەۆتەن ۇتىلىپ, كۇمىس مەدالدى كەۋدەسىنە تاقتى. 91 كەلىدەن جوعارى سالماقتا جۇدىرىقتاسقان يۆان دىچكو قولا مەدالگە يە بولدى.
سونداي-اق, گرەك-ريم كۇرەسىندە 84 كگ بەلدەسكەن بالۋاندارىمىز دانيال گادجيەۆ, ەركىن كۇرەستەن 66 كەلى سالماقتا بوز كىلەمگە شىققان اقجۇرەك تاڭاتاروۆ, ايەلدەر كۇرەسىندە 72 كەلى سالماقتا باق سىناعان گۋزەل مانيۋروۆا مەن بوكستان ايەلدەر اراسىندا 75 كەلىدە جارىسقا تۇسكەن مارينا ۆولنوۆا قولا مەدالدى قاناعات تۇتتى.
ال ەل سەنىم ارتقان سپورتشىلارىمىز نۇرماحان تىناليەۆ, المات كەبىسپاەۆ, ماكسيم راكوۆ سىندى سپورتشىلارىمىز جۇلدەگەرلەر قاتارىنا جەتە الماي, جارىستان شىعىپ قالدى.
2016 جىلى برازيليانىڭ ريو- دە-جانەيرو قالاسىندا وتەتىن وليمپيادادا قازاق حالقىنىڭ سايىپقىراندارى نامىستى قولدان بەرمەيدى دەپ سەنەمىز.
ولجاس سۇلەيمەنوۆ
