ۆيتسە-پرەمەر, سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنىنىڭ سالدارىن جويۋ جونىندەگى رەسپۋبليكالىق شتاب جەتەكشىسىنىڭ ورىنباسارى قانات بوزىمباەۆ ورالداعى سۋ تاسقىنىنىڭ بەلسەندى كەزەڭىنە دايىندىق بارىسىن تەكسەرىپ, وزەن جاعالاۋلارى مەن قورعانىس بوگەتتەرىن نىعايتۋدى تاپسىردى.
ورالداعى جايىق وزەنىنىڭ سۋ دەڭگەيى ساعات 12:00-دە 7,58 مەتر بولدى. ساراپشىلار سۋ تاسقىنىنىڭ شارىقتاۋ شەگى 20-21 ساۋىردە بولادى دەپ بولجاپ وتىر. جايىق وزەنىنىڭ قالا تۇسىمەن وتەتىن بويى 28 شاقىرىم, ونىڭ 21 شاقىرىمىنا بىلىكتەر مەن بوگەتتەردى نىعايتۋ جانە سالۋ جۇمىستارى جۇرگىزىلىپ جاتىر. بۇل جۇمىستارعا 1300 ەرىكتى مەن 800-گە جۋىق اسكەري قىزمەتكەر, 300-دەن استام ارنايى تەحنيكا تارتىلعان.
ۆيتسە-پرەمەر جەر بىلىكتەرىنىڭ دەڭگەيىن 12 مەترگە دەيىن كوتەرۋدى تاپسىردى (قازىر قالا بويىنشا قاۋىپتى مەجە – 8,5). سونداي-اق ورالدى شاعان وزەنىنىڭ جايىلماسى جاعىنان قورعاۋ تۋرالى شەشىم قابىلداندى. سۋ باسۋ قاۋپى جوعارى اۋماقتار – قالانىڭ ساياجاي ماسسيۆتەرى, ءبورلى, تەرەكتى, اقجايىق جانە بايتەرەك اۋداندارىنداعى ەلدى مەكەندەر. وزەن الابى بويىنداعى باۋ-باقشا سەرىكتەستىكتەرىنىڭ تۇرعىندارى ەۆاكۋاتسيالاندى. ورالدا 18 جەدەل-ەۆاكۋاتسيا پۋنكتى اشىلدى. مۇندا 1690 ادام ورنالاسقان.
