ەلوردادا قالانى سانيتارلىق تازالاۋعا, اباتتاندىرۋعا جانە كوگالداندىرۋعا باعىتتالعان «تازا قازاقستان. استانا – تازالىق پەن ءتارتىپتىڭ ۇلگىسى» اتتى ەكولوگيا سەنبىلىگىنە 115 مىڭنان اسا ادام قاتىستى. تازالىق جۇمىسىنا قالا تۇرعىندارى, ەڭبەك ۇجىمدارى, مەملەكەتتىك ورگانداردىڭ قىزمەتكەرلەرى, شاعىن جانە ورتا بيزنەس سۋبەكتىلەرى, ەرىكتىلەر, وقۋشىلار مەن ستۋدەنتتەر شىقتى.
ەكواكتسيا اياسىندا قالانى سانيتارلىق تازارتۋ, نوسەر جانە ارىق كارىز جەلىلەرى, كوشەلەر, تروتۋارلار, كۆارتالىشىلىك اۋماقتار, قوعامدىق كەڭىستىكتەر مەن اۋلالاردى تازالاۋ جۇرگىزىلدى. سونداي-اق جاسىل جەلەكتەردى كۇتىپ-باپتاۋ جانە وتىرعىزۋ بويىنشا ماۋسىمدىق اگروتەحنيكالىق جۇمىستار, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلاردى تازارتۋ بويىنشا ءىس-شارالار, رۇقسات ەتىلمەگەن پوليگونداردى جويۋ سىندى ءىس-شارالار كەشەنى ءوتتى. پوليگونعا 1000 توننادان استام قوقىس جينالىپ, شىعارىلدى, ايالداما پاۆيلوندارىن, باعدارشام نىساندارىن, جەراستى جانە جەرۇستى وتكەلدەرىن جۋ جانە جوندەۋ جۇرگىزىلدى, 4600 شاقىرىمنان استام ارىق جەلىسى تازارتىلدى. ەكولوگيا اكتسياسى كەزىندە بەس اۋداننىڭ ارقايسىسىندا اعاشتار مەن بۇتالار وتىرعىزىلدى.
تازالىق پەن ءتارتىپتى قامتاماسىز ەتۋگە بەلسەندى ۇلەس قوسۋعا ءار تۇرعىن بىلەك سىبانا كىرىستى. سونداي-اق اۋقىمدى ەكواكتسيادان قالا كاسىپكەرلەرى دە شەت قالمادى. كاسىپكەرلىك نىسانداردىڭ 5 مىڭنان استام وكىلى – كاسىپورىندار, شاعىن جانە ورتا بيزنەس سۋبەكتىلەرى, ساۋدا ورتالىقتارى, سالوندار, كافەلەر, دۇكەندەر, باسقا دا جەكە كومپانيالار مەن ۇيىمدار ءوز نىسانىنا ىرگەلەس اۋماقتاردى قوقىستان تازارتۋعا ۇلەس قوستى.
«عاشىقتار» ساياباعىن تازارتۋعا قالالىق دەنە شىنىقتىرۋ جانە سپورت باسقارماسىنىڭ 100-دەن استام سپورتشىسى مەن قىزمەتكەرى قاتىستى. باسقارما باسشىسى ۆاسيلي لەۆيت مۇنداي ەكولوگيا ءىس-شارالارى سپورتشىلاردىڭ نازارىنان تىس قالمايتىنىن اتادى.
«سەنبىلىك – كوماندالىق رۋحتى كوتەرۋدىڭ جانە كەز كەلگەن ۇجىمداعى پسيحولوگيانى جاقسارتۋدىڭ تاماشا ءتاسىلى. سەنبىلىككە ەلىمىزگە بەلگىلى سپورتشىلار, ونىڭ ىشىندە الەم چەمپيونى – ەلوردالىق اۋىر اتلەت ەدىگە ەمبەردى, سونداي-اق استانا قۇراماسىنىڭ دجيۋ-دجيتسۋدان سپورتشىلارى, ناقتىراق ايتقاندا, ازيا ويىندارىنىڭ التىن جۇلدەگەرى نۇرجان باتىربەكوۆ قاتىستى» دەدى ۆ.لەۆيت.
زەينەتكەرلەر دە قالانىڭ تازالىعىنا ءوز ۇلەسىن قوسىپ, دەمالىس ايماعىن قوقىستان تازارتتى. بەلسەندى ۇزاق ءومىر ءسۇرۋ ورتالىعىنىڭ زەينەتكەرلەرى «بايتاق» جاسىل پارتياسىمەن بىرلەسىپ, رەسپۋبليكا داڭعىلى مەن ماسكەۋ كوشەلەرىنىڭ قيىلىسىندا ورنالاسقان ا.پۋشكين اتىنداعى الاڭدى تازالادى. باس-اياعى 20 زەينەتكەر وزدەرىنە تاپسىرىلعان اۋماقتى تازالاپ, اينالانى بەزەندىرۋگە اتسالىستى.
«نۇرا اۋدانىنىڭ «كۇمىس ۆولونتەرلەرى» ۇجىمىنىڭ بەلسەندى اتالارى مەن اجەلەرى سەنبىلىككە شىقتى. ءبىز وزىمىزگە بەرىلگەن اۋماقتى تازارتتىق. استانا تۇرعىنى بولعاندىقتان, قالامىزدى وتە جاقسى كورەمىز, ونىڭ تازالىعىنا ءوز ۇلەسىمىزدى قوسۋعا تىرىسامىز» دەدى ۆولونتەرلەر ۇجىمىنىڭ جەتەكشىسى ءلاززات وتەعۇلوۆا.
بۇعان دەيىن اكىمدىك قالانىڭ ءۇش جەرىندە «ورەل مەن رەشكا» باعدارلاماسى فورماتىندا دەمەۋشىلەردەن ارقايسىسى 50 مىڭ تەڭگە كولەمىندە اقشالاي سىيلىقتار جاسىرىلعانىن حابارلاعان بولاتىن. اتالمىش سەنبىلىكتە 3 استانالىق اقشالاي سىيلىققا يە بولدى. سولاردىڭ ءبىرى – ەلوردالىق گۇلنار سۇلتانقۇلوۆا ورتالىق ساياباقتا جاسىرىلعان اقشا قوراپتارىنىڭ ءبىرىن تاۋىپ, قۋانىشىمەن ءبولىستى.
«بۇل سەنبىلىك ەرەكشە بولدى, ءوزىم قاتتى قۋاندىم. مەنىڭ 4 نەمەرەم بار. بۇل سىيلىقتى نەمەرەلەرىمە كورسەتىپ, ولارعا تاتتىلەر ساتىپ الامىن. جىل سايىن سەنبىلىككە شىعامىز, قالامىزدىڭ ادەمى, تازا بولعانىن قالايمىز» دەدى جەڭىمپاز.
ەكىنشى جەڭىمپاز – «جاسىل ەل» كومپانياسىنىڭ قىزمەتكەرى قۋانىشبەك جۇماتاەۆ جۇلدەسىن بوتانيكالىق باقتان تاپسا, ءۇشىنشى جەڭىمپاز اتىن اتاماۋدى ءجون كورىپ, جاقسى كوڭىل كۇي سىيلاپ, ەكولوگيا اكتسياسىن ۇيىمداستىرعاندارعا العىسىن ءبىلدىردى.
