قازىرگى كەزدە ەلوردانىڭ كەلبەتىنە كەرى اسەرىن تيگىزەتىن نەگىزگى تۇيتكىلدى ماسەلەلەردىڭ ءبىرى اۋماقتى ءوز بەتىنشە قورشاۋ, ماڭدايشا جازۋلار ورناتۋ, ۆيترينالار مەن تەرەزەلەردى بەزەندىرۋ بولىپ تابىلادى.
بۇگىن استانا ءماسليحاتىندا اكىمدىك ازىرلەگەن قالا اۋماعىن دامىتۋ, سانيتارلىق كۇتىپ ۇستاۋ, تازالاۋدى ۇيىمداستىرۋ مەن تازالىقتى قامتاماسىز ەتۋ ەرەجەسىنە ەنگىزىلەتىن وزگەرىستەر مەن تولىقتىرۋلار بەكىتىلدى. وسى ەرەجەگە سايكەس, جوعارىدا اتالعان نىسانداردىڭ اتاۋلارى, ماڭدايشا جازۋلارى, سورەلەر مەن تەرەزەلەردەگى كورنەكى اقپاراتتاردىڭ جازىلۋى مىندەتتى تۇردە قالالىق ساۋلەت جانە تىلدەردى دامىتۋ باسقارمالارىمەن كەلىسىلۋى كەرەك, ال, بۇل تالاپ بۇزىلعان جاعدايدا قۇقىق بۇزۋشىلارعا ايىپپۇل سالىنىپ, اكىمشىلىك جاۋاپكەرشىلىككە تارتىلادى.
سونىمەن قاتار, ەلوردانى ودان ءارى دامىتۋ جونىندەگى جىل سايىنعى كەڭەستەردە تۇرعىن ءۇي كەشەندەرى, اكىمشىلىك عيماراتتار اينالاسىنداعى قورشاۋلار جانە عيماراتتار مەن قۇرىلىستارداعى ماڭدايشا جازۋلار قالانىڭ ەستەتيكالىق قالپىن ساقتاۋى كەرەكتىگى ۇنەمى ايتىلىپ ءجۇر.
بۇدان بولەك, «استانا قالاسىنىڭ اۋماعىن كەشەندى اباتتاندىرۋ نورمالارى مەن ەرەجەلەرىنە» سايكەس مەملەكەتتىك باسقارۋ ورگاندارى, ۇيىمداردىڭ كەڭسەلەرى, كوپ قاباتتى تۇرعىن ۇيلەردىڭ اۋماقتارىنا قورشاۋلار ورناتۋعا تىيىم سالىنادى. قۇجات بويىنشا قورشاۋ ورناتۋ جانە ونىڭ ساۋلەتتىك-كوركەمدىك شەشىمى نىساننىڭ جوباسى ۇسىنىلاتىن استانا قالاسىنىڭ ساۋلەت جانە قالا قۇرىلىسى باسقارماسىمەن كەلىسىلۋى ءتيىس.
جۇما قازيەۆ
