سوناۋ سۇراپىل جىلدارى مايدان دالاسىندا وت پەن وقتىڭ اراسىندا ءجۇرىپ قولىنان قالامىن تاستاماعان جاۋىنگەرلەر قانشاما؟! ولاردىڭ جازبالارى سول قيىن كۇندەردىڭ ايناسى ىسپەتتى. قالامىن قانعا مالىپ, قولى قالت ەتكەندە جازعان كۇندەلىك كەيىنگى ۇرپاققا قۇندى قۇجات بولىپ قالدى.
ءبىزدىڭ مەكتەپتە ۇلى وتان سوعىسىنىڭ ارداگەرى قامبار نۇعىمانۇلىنىڭ ءوز قولىمەن جازعان كۇندەلىگى ساقتاۋلى. كۇندەلىك 1942 جىلى سوعىسقا اتتانعان كۇنىنەن باستاپ 1945 جىلى اياقتالعانعا دەيىن جازىلعان. بۇل جادىگەردى بۇگىنگە دەيىن بويتۇمارداي ساقتاپ جەتكىزگەن مايدانگەردىڭ ءىنىسى – ماناش اعامىز. «1942 جىل. سوعىسقا اتتانىپ بارامىن» دەپ باستالاتىن قويىن داپتەر قامبار اتانىڭ قاندى قاساپتا وتكىزگەن كۇندەرىنەن مول ماعلۇمات بەرەدى.
قولجازبانىڭ تولىق نۇسقاسى مەكتەپتەگى تاريحي ولكەتانۋ مۇراجايىندا ساقتاۋلى تۇر.
ساباق ۇستىندە وقۋشىلارعا ەكىنشى دۇنيە جۇزىلىك سوعىس تۋرالى تۇسىندىرگەندە وسىنداي دۇنيەلەر تاقىرىپقا تۇزدىق بولادى. مايدانگەر كۇندەلىگى سوعىستىڭ ءار ساتىنەن سىر شەرتەدى. اراعا جەتپىس جىل سالىپ قولىمىزعا تيگەن بۇل قولجازبا تاريح ءۇشىن قۇندى ەكەنى ءسوزسىز.
گۇلجان جۇماباەۆا,
تاريح ءپانىنىڭ مۇعالىمى
