استانادا شىعارماشىل جاستاردىڭ حالىقارالىق «شابىت» فەستيۆالى شىمىلدىعىن ءتۇردى. ون جەتىنشى رەت وتكەلى وتىرعان بايراقتى دودا كۇنى كەشە تەك رەسپۋبليكامىزدىڭ عانا ەمەس, الەمنىڭ بىرنەشە ەلىنىڭ تالانتتارىنىڭ باسىن قوستى. ۇيىمداستىرۋشىلاردىڭ مالىمەتىنشە, 8 قاراشاعا دەيىن سوزىلاتىن ونەر باسەكەسىنە رەسەي, قىرعىزستان, وزبەكستان سىندى مەملەكەتتەردەن 500-گە جۋىق جاس ونەرپاز كەلگەن.
بەيبىتشىلىك جانە كەلىسىم سارايىندا وتكەن حالىقارالىق شارانىڭ اشىلۋ سالتاناتىندا استانا قالاسى مادەنيەت باسقارماسى باسشىسىنىڭ ورىنباسارى ناريما مۇحامبەتالينا ءسوز سويلەپ, بارلىق ۇمىتكەرلەرگە ساتتىلىك پەن جەڭىس تىلەدى.
دودانىڭ بيىلعى قاتىسۋشىلارى «كلاسسيكالىق مۋزىكا», «جۋرناليستيكا», «بەينەلەۋ ونەرى», «تسيرك ونەرى», «بالەتتىڭ جاس ءارتىستەرى بايقاۋى», «ۇزدىك ادەبي شىعارما» جانە جاڭادان قوسىلعان «حالىق مۋزىكاسى» مەن «كامەرالىق مۋزىكا» اتالىمدارى بويىنشا سىنعا ءتۇسىپ, جەڭىمپازداردى انىقتايتىن بولادى.
وسىلاردىڭ ىشىندە «ۇزدىك ادەبي شىعارما» اتالىمى (پوەزيا) بويىنشا العاشقى كەزەڭ 15 قازانعا دەيىن ءوتىپ كەتتى. بۇل سىنعا قاتىسقان 150 ۇمىتكەردىڭ ىشىنەن 100 اقىن ىرىكتەۋدەن ءوتتى. اقىنداردىڭ ءتىزىمىن «adebiportal.kz» سايتى جاريالادى. ولاردىڭ قاتارىندا ۇلاعات حانزادا, دينارا مالىك, حاميت ەسامان سىندى ەسىمدەرى ەلگە تانىس بولىپ قالعان جىر دۇلدۇلدەرى دە بار.
«بيىلعى «شابىتتىڭ» «ۇزدىك ادەبي شىعارما» اتالىمىنىڭ ەرەكشەلىگى – ۇمىتكەرلەردىڭ ولەڭدەرى «ادەبيەت» پورتالىندا ونلاين تۇردە اشىق جاريالانۋىندا. بۇرىن اقىنداردىڭ ولەڭدەرى تىكەلەي قازىلار القاسى نازارىنا ۇسىنىلاتىن. جابىق تۇردە وتەتىندىكتەن, تالانتتى جاستار ەلەنبەي قالىپ جاتاتىن. بيىل «قازكونتەنت» اق «ادەبيەت پورتالى» ينتەرنەت-جوباسى مەن استانا قالاسى اكىمدىگى مادەنيەت باسقارماسى ءوزارا كەلىسىپ, ۇمىتكەرلەردىڭ ولەڭدەرىن اشىق تۇردە حالىق الدىنا ۇسىندى. ونىڭ ۇستىنە, بيىلعى فەستيۆالگە قاتىساتىن جاستار ەكى ەسە كوپ بولدى: 150-دەن اسا اقىننان ءوتىنىش ءتۇستى. ىشىنەن قازىلار القاسىنىڭ اقىلداسۋىمەن 100 اقىندى ىرىكتەدىك» دەيدى قازىلار القاسىنىڭ مۇشەسى, «ادەبيەت» پورتالىنىڭ جەتەكشىسى باۋىرجان قاراعىزۇلى.
«ۇزدىك ادەبي شىعارما» اتالىمىنىڭ قاتىسۋشىلارى ءۇشىن مادەنيەت قايراتكەرى ناعيما وتەپوۆا, حالىق اقىنى فاريزا وڭعارسىنوۆا, اقىن, ادەبيەت سىنشىسى ءامىرحان بالقىبەك اتىنداعى ارنايى سىيلىقتار تاعايىندالىپ وتىر.
ۇيىمداستىرۋشىلاردىڭ ايتۋىنشا, «شابىت» فەستيۆالىنىڭ «حالىق مۋزىكاسى» اتالىمى بويىنشا ەڭ كوپ ءوتىنىش كورشى قىتاي مەملەكەتىنەن كەلىپ تۇسكەن. دارىندى مۋزىكانتتار سازسىرناي, جەتىگەن, سىبىزعى سىندى اسپاپتاردا شەبەر وينايدى. ال وتاندىق قاتىسۋشىلاردىڭ باسىم بولىگى – وڭتۇستىك جانە سولتۇستىك قازاقستان وكىلدەرى.
بايقاۋ كورسەتىلىمدەرىنەن بولەك, قوسىمشا ءىس-شارالار ۇيىمداستىرىلادى. قازىلار القاسى مۇشەلەرىنىڭ كونتسەرتى, مۋزىكالىق-كوڭىل كوتەرۋ شوۋى, ارت-كلۋب – تانىسۋ كەشى, فەستيۆال لاۋرەاتتارىنا ارنالعان قالا اكىمدىگىنىڭ بالى وتەدى دەپ جوسپارلانۋدا. سونىمەن قاتار, ۇيىمداستىرۋشى كوميتەت شتابىندا مادەني پروبلەمالار مەن وزگە دە وزەكتى تاقىرىپتاردا «دوڭگەلەك ۇستەل» وتكىزىلمەك. جانە حالىقارالىق دەڭگەيدەگى ونەر جۇلدىزدارىنىڭ شەبەرلىك ساعاتتارى جاستار ءۇشىن اسا ماڭىزدى ۋاقيعا بولماق. ال بايقاۋ جەڭىمپازدارى مەن لاۋرەاتتارىن ماراپاتتاۋ گالا-كونتسەرتپەن اياقتالادى.
حالىقارالىق ونەر دوداسىن ءوتكىزۋگە استانا قالاسى اكىمدىگى مەن استانا قالاسى مادەنيەت باسقارماسى جانە قازاق ۇلتتىق ونەر ۋنيۆەرسيتەتى قولداۋ كورسەتۋدە. شارا سوڭىندا ءداستۇر بويىنشا پرەزيدەنت كۋبوگى تابىستالادى.
اسحات رايقۇل
