ەلوردا كۇنى مەرەكەسىنە وراي قالانىڭ بىرقاتار مەديتسينالىق مەكەمەلەرىندە «ءتىسى ساۋدىڭ – دەنى ساۋ» اتتى اكتسيا ۇيىمداستىرىلدى. ەلورداداعى ءتىس دارىگەرلەرىنىڭ قاۋىمداستىعى ايتۋلى مەرەكەگە ءوز ۇلەستەرىن قوسۋ نيەتىمەن قولعا العان يگى شارانى تىلشىلەرىمىز ءوز كوزىمەن كورىپ قايتتى.
– جالپى, بالالار كىشكەنە كەزىنەن باستاپ وزدەرىنىڭ دەنساۋلىقتارىنا كوڭىل بولۋگە داعدىلانۋى كەرەك. مۇنى وتباسىندا اتا-انالار بالالارىنا ايتىپ وتىرسا, ەمحانادا ءبىز, دارىگەرلەر كەز كەلگەن اۋرۋدىڭ الدىن الىپ, ناسيحات-تۇسىنىك جۇمىستارىن ءجيى جۇرگىزۋگە ءتيىسپىز. سونىمەن بىرگە سىرقات ادامعا العاشقى مەديتسينالىق كومەك كورسەتۋ – ءبىزدىڭ باستى مىندەتىمىز, – دەيدى №8 قالالىق ەمحانانىڭ ءتىس دارىگەرى الماز وتەتىلەۋوۆ.
اكتسيا اياسىندا اتالمىش ەمحانادا استانالىق 40 كوپ بالالى وتباسىنا اۋىز قۋىسىن قالاي تازالاپ, ءتىستى قالاي ساقتاۋ كەرەكتىگى جونىندە تەگىن كەڭەس بەرىلىپ, ءتىس كۇتىمىن قىزىقتى يلليۋستراتسيالار ارقىلى تۇسىندىرەتىن, مۋلتفيلمدەردىڭ كەيىپكەرلەرى بەينەلەنگەن ءتۇرلى-ءتۇستى بروشيۋرالار تاراتىلدى.
قالالىق №4 ەمحانادا دا كوپ بالالى, تۇرمىسى تومەن ون ءتورت وتباسىنىڭ كامەلەتتىك جاسقا تولماعان بالالارىن ءتىس دارىگەرى كەزەكسىز, تەگىن قابىلدادى. جالپى, ەمحاناعا كومەك كورسەتىلۋى قاجەت دەپ تانىلعان سەكسەنگە جۋىق بالا تىركەلگەن ەكەن. ءتىس دارىگەرلەرى تيمۋر جارمۇحامبەتوۆ پەن مەرۋەرت ءابجانوۆا مۇنداي اكتسيالاردىڭ پايداسى زور ەكەنىن ايتادى. مۇندا دا اكتسيا قاتىسۋشىلارىنا بالالارعا ارنالعان ءتىس پاستاسى مەن كىتاپشالار تاراتىلدى.
ءتىپتى, كەيبىر مەديتسينا مەكەمەلەرىندە مۇنداي تەگىن ستوماتولوگيالىق كومەك بۇدان بۇرىن دا كورسەتىلگەن ەكەن. ماسەلەن, №2 قالالىق بالالار اۋرۋحاناسىنىڭ مەڭگەرۋشىسى قوڭىرات اقساعاتقىزى 31 مامىر كۇنى وتكەن وسى تەكتەس اكتسياعا 900-گە تارتا بالا كەلگەنىن ايتادى. ال, بۇل جولى تەك جارتى كۇندە 150-دەي جاسوسپىرىمگە اۋىز قۋىسىنىڭ گيگيەناسى اسقازانمەن تىكەلەي بايلانىستى ەكەنى جايىندا ءدارىس وقىلىپ, تەگىن كەڭەستەر بەرىلدى. ءبىر ايتا كەتەرلىگى, اشىلعانىنا كوپ بولا قويماعان اتالمىش اۋرۋحانادا اپپاراتتاردىڭ بارلىعى دەرلىك جاڭا, سوندىقتان مۇندا قىزمەت ساپاسى دا جوعارى سانالادى.
ال, №5 قالالىق ەمحانادا ۇيىمداستىرىلعان ءدال وسىنداي اكتسيانىڭ باسى-قاسىندا جۇرگەن ەمحانانىڭ الەۋمەتتىك قىزمەتكەرى گۇلناز شانباەۆانىڭ ايتۋىنشا, بۇل جەردە تۇرعىلىقتى جەرىنە قاراي بار-جوعى سەگىز كوپ بالالى وتباسى قارالادى ەكەن, دەي تۇرعانمەن, دارىگەرلەر كەلۋشىلەردىڭ سانىنا شەك قويمادى. ءتىپتى, ەمحانا ستاموتولوگى ساپار كۋكيەۆ بالالاردىڭ عانا ەمەس, اتا-انالاردىڭ دا ءوتىنىشىن جەرگە قالدىرمادى. شاراعا «سيبيرسكوە زدوروۆە» كومپانياسى دا اتساسىلىپ, ءوزىنىڭ تابيعي ونىمدەرىن كوپشىلىككە ۇسىندى. سونداي-اق, اكتسيا وتكەن بارلىق جەردە «Colgate», «0ral-B», «Blend-a-med» برەندتى ءتىس پاستالارى تاراتىلدى.
دينارا جاقسىلىققىزى,
ساپارعالي قانات,
ايگۇل وزەكوۆا
