قر ۇكىمەتى جانىنداعى ورتالىق كوممۋنيكاتسيالار قىزمەتىندە قر ءبىلىم جانە عىلىم مينيسترلىگىنىڭ وكىلدەرى بيىلعى ۇلتتىق بىرىڭعاي تەستىلەۋ قورىتىندىلارى بويىنشا بريفينگ وتكىزدى.
ون ءۇش جىل ىشىندە ۇبت-عا 1 ميلليون 587 مىڭ مەكتەپ ءبىتىرۋشى قاتىسقان. بۇل تۇلەكتەردىڭ جالپى سانىنىڭ 77 پايىزىن قۇرايدى ەكەن. بيىلعى جىلى ۇلتتىق ەمتيحان ەلىمىز بويىنشا 165 پۋنكتتە ءوتتى. مەكتەپ تامامداعان 121 مىڭ وقۋشىنىڭ ىشىندە وعان قاتىسۋعا 87 مىڭ تۇلەك ءوتىنىش بەرگەن. ونىڭ ىشىندە قازاق تىلىندە وقىعاندار – 83 330 بولسا, ورىس تىلىندە ءبىلىم العاندار – 23 984.
– تەستىلەۋگە 84 079 مەكتەپ ءبىتىرۋشى قاتىستى. بىرنەشە رەت ءتارتىپ بۇزعان 38 وقۋشى تەستىلەۋدەن شىعارىلدى جانە ناتيجەلەرى جويىلدى. تەستىلەۋ بارىسىندا شەكتى 50 بالدى 14 252 تۇلەك جيناي المادى. 52 982 بالادان تىيىم سالىنعان زاتتار تابىلدى. ۇبت – ۇيىمداسقان دەڭگەيدە ءوتتى. بيىلعى ورتاشا بالل – 81,2 بالل. وتكەن جىلى 79,4 بالل بولعان ەدى, – دەيدى قر بعم ءبىلىم جانە عىلىم سالاسىنداعى باقىلاۋ كوميتەتى توراعاسىنىڭ مىندەتىن اتقارۋشى ءلاززات بولەباەۆا.
ونىڭ ايتۋىنشا, بيىل ەڭ جوعارى 125 بالدى 19 تۇلەك جيناعان. وتكەن جىلى 5 وقۋشى عانا وسى دارەجەگە كوتەرىلگەن ەكەن. سونىمەن بىرگە ۇلتتىق سىناققا قاتىسقان «التىن بەلگىگە» ۇمىتكەر 4 768 وقۋشىنىڭ 2 371-ءى ءوز بىلىمدەرىن اقتاعان. ال 16 565 بالا 100 باللدان ارتىق كورسەتكىشكە قول جەتكىزگەن.
سونداي-اق, رەسپۋبليكالىق اپپەلياتسيالىق كوميسسياعا تەست تاپسىرمالارىنىڭ مازمۇنى بويىنشا 547 ءوتىنىش تۇسكەن. ونىڭ 141-ءى قاناعاتتاندىرىلعان. «بيىلعى جىلى شەكتى دەڭگەيدەن وتە الماعان تۇلەكتەر جوعارعى وقۋ ورىندارىنىڭ اقىلى بولىمىنە ءتۇسۋ ءۇشىن, قايتا كەشەندى تەستىلەۋدەن وتە الادى. اتالعان تەستىلەۋگە قاتىسۋ ءۇشىن وتىنىشتەر 1-8 تامىز ارالىعىندا قابىلدانادى. تەستىلەۋ 19-24 تامىز ارالىعىندا وتكىزىلەدى» – دەپ, تۇيىندەدى ءسوزىن كوميتەت توراعاسىنىڭ مىندەتىن اتقارۋشى.
ازامات ەسەنجول
