ەلوردادا 19-21 قىركۇيەك كۇندەرى تاتارستان رەسپۋبليكاسىنىڭ استاناداعى كۇندەرى وتەدى. وسىعان وراي, قازاقستان استاناسىنا رەسمي تۇلعالار, ىسكەرلىك جانە ءبىلىم بەرۋ سالالارىنىڭ وكىلدەرى باستاعان دەلەگاتسياسى كەلەدى دەپ حابارلايدى استانا قالاسى اكىمى اپپاراتىنىڭ ءباسپاسوز قىزمەتى.
ساپار بارىسىندا قوناقتار قالانىڭ ءوندىرىس ورىندارىن ارالاپ, بيزنەس-فورۋم جۇمىسىنا قاتىسادى. سونداي-اق, قازاقستاننىڭ تاتار دياسپوراسى وكىلدەرىمەن كەزدەسەدى.
بۇعان قوسا, بەيبىتشىلىك جانە كەلىسىم سارايىندا تاتارستان ونەر شەبەرلەرىنىڭ گالا-كونتسەرتى, فوتوكورمە جانە ۇلتتىق قولونەر شەبەرلەرىنىڭ كورمەسى ۇيىمداستىرىلادى.
بۇل كۇندەرى استانادا تاتارلاردىڭ ۇلتتىق مەيرامى سابانتوي تويلانىپ, شارا بارىسىندا تاتارستاننىڭ وندىرىستىك جانە اۋىلشارۋاشىلىق الەۋەتىن كورسەتەتىن كورمەلەر ۇيىمداستىرىلادى. سابانتوي كەزىندە كۇرەستەن اۋىر سالماقتا قازاقستان چەمپيوناتى, سونداي-اق, قازاقستان مەن تاتارستان كوماندالارى اراسىنداعى ماتچتىق كەزدەسۋ وتەدى. جاۋىرى جەرگە تيمەگەن جەڭىمپاز بالۋان جەڭىل كولىككە يە بولادى. توي بارىسىندا بۇدان باسقا, حالىقتىق ويىنداردىڭ 13 تۇرىنەن جارىستار وتكىزىلەدى.
