بۇگىندە استاناعا جان-جاقتان جۇمىس ىزدەپ اعىلعان جاستار كوپ. ارينە, ولاردىڭ قاتارىندا جاسى ەگدە تارتىپ قالعان كىسىلەر دە كەزدەسەدى. بارلىعى دا كۇن كورىستىڭ قامىمەن باس قالاعا اتباسىن تىرەيدى.
تاياۋدا اۋىلدان سىنىپتاس دوسىم كەلدى. جىل سايىن جاز باستالىسىمەن قارا كۇزگە دەيىن ەلورداعا كەلىپ جۇمىس ىستەيدى. ءسويتىپ, جاز بويى تاپقان ناپاقاسىن جيناپ اۋىلعا اپارادى. وعان ءشوپ شابادى, وتىن الادى. قالعانىن قىس بويى ازىق قىلادى. جىلدا وسى ادەت قايتالانادى. ايتەۋىر, دوسىم قاتاردان قالماي كۇن كورىپ كەلە جاتقانىنا شۇكىرشىلىك ەتەدى. مۇنداي مىسالداردى جۇزدەپ كەلتىرۋگە بولادى.
ارينە, ەلورداعا جۇمىس ىزدەپ كەلگەندەردىڭ بارلىعىنا ەشكىم بىردەن سىيلى تاباق ۇسىنبايدى. قالاعا تىركەلگەن قۇجاتى بولماعاندىقتان, دۇرىس جۇمىس تابىلا بەرىلمەيدى. تابىلعاننىڭ وزىندە ەڭبەكاقىلارى ۋاقىتىلى بەرىلمەيدى. سوسىن شاقشاداي باسى شاراداي بولىپ, امالسىزدان دىمى قۇريدى. كۇندەلىكتى جۇمىسقا جالدانۋعا ءماجبۇر بولادى. كۇندەلىكتى جۇمىس دەمەكشى, ءبىز استانالىق بازار ماڭايىنان جۇمىس ىستەۋگە جالدانىپ تۇرعان سوقتالداي ازاماتتاردى ءجيى كورەمىز. ولار بىرەۋ ەمەس, ەكەۋ ەمەس, توپ-توبىمەن تۇرادى. جانە ازىن-اۋلاق اقشا ءۇشىن تاڭەرتەڭنەن كەشكە دەيىن تۇرۋعا بار.
ەرتەرەكتە ستۋدەنت كەزىمىزدە سەنبى-جەكسەنبى كۇندەرى وسىلاي جالدانىپ جۇمىس ىستەپ, اۋىلداعى اتا-انامىزعا سالماق سالماۋعا تىرىساتىنبىز. ول كەزدە جۇمىس ىزدەگەندەر قالاداعى فۋرمانوۆ كوشەسى بويىندا تۇراتىن. قازىر ول ايگىلى ءبيشى اپامىز شارا جيەنقۇلوۆا كوشەسى دەپ اتالادى. قىزىق, وتكەن جولى وسى كوشەنىڭ بويىمەن ءوتىپ بارا جاتىپ, سول ورىندا ءبىر توپ ادامنىڭ تۇرعانىن كورىپ, ءالى دە ونىڭ بار ەكەنىنە كوزىم جەتتى. ادەيى توقتاپ, شەتتەۋ تۇرعان ءبىر-ەكى ادامدى سوزگە تارتتىم. ەسىمدەرىن ايتۋدى قالاماعاندىقتان, ءبىز دە تاقاقتاپ سۇرامادىق.
ء–يا, اۋىلدان كەلدىم. قالاعا تىركەلمەگەندىكتەن ورنىقتى جۇمىستىڭ رەتى كەلمەدى. امالسىزدان وسى جەرگە كەلىپ جۇمىس ىستەپ ءجۇرمىن. ەلدە وتباسىم قالدى. اۋىلدا جۇمىس بولماعاندىقتان, جاز بويى ەلورداعا كەلىپ ەڭبەك ەتەمىن. ءار كۇن سايىن ءتۇرلى جۇمىس ىستەيمىز. جەر قازامىز, ۆاگونداعى جۇكتى تۇسىرەمىز. قۇرىلىس جۇمىستارىن اتقارامىز. ءبىزدى جۇمىس بەرۋشىلەر وسى جەردەن الىپ كەتەدى. كۇندەلىكتى تاپقان اقشامىز كۇنكورىسىمىزگە جەتەدى. جالداعان پاتەرگە بەرەمىز. تاماعىمىزعا تولەيمىز. قالعانىن جيناپ, وتباسىما جىبەرەمىن, – دەدى جاسى ەگدە تارتىپ قالعان كىسى.
وسى جەردە ءبىر جاس جىگىت تە قوسىلا كەتتى:
– ارينە, ءبىز بۇل جەرگە ەرىككەننەن كەلمەيمىز. اۋىلدا جۇمىس جوق. سوسىن, قالاعا كەلىپ ەڭبەك ەتكىمىز كەلەدى. بۇل جەردە كۇندەلىكتى جۇمىس بولادى. قالاي ەڭبەك ەتەسىڭ, سولاي اقشاڭىزدى الاسىڭ, – دەپ ءوز پىكىرىن جاسىرمادى.
بۇگىنگى تاڭدا استانا قالالىق جۇمىسپەن قامتۋ ورتالىعى قىزمەتكەرلەرىنەن جاساقتالعان ءموبيلدى توپ مۇشەلەرى ەلوردانىڭ ادامدار كوپ شوعىرلانعان ورىندارىندا بولىپ, اقپاراتتىق شارالار جۇرگىزۋدە.
– ءبىزدىڭ ءموبيلدى توپ مۇشەلەرى ەلورداداعى «حان شاتىر» ساۋدا ورتالىعى, ورتالىق بازار, تەمىرجول ۆوكزالى جانە ساپارجاي اۆتوۆوكزالى سەكىلدى ادامدار كوپ جۇرەتىن ورىنداردا بولىپ, ءتۇسىندىرۋ جۇمىستارىن جۇرگىزىپ, تۇرعىندارعا جولدامالار ۇسىندى. ارينە, ورتالىق بازار اۋماعىندا بولعاندا زاڭسىز جۇمىس ىستەپ جۇرگەن ازاماتتارعا دا باردىق. ماقساتىمىزدى جەتكىزدىك. جۇمىسقا ورنالاسۋ ءۇشىن جولداما بەردىك. كوبىنە وندا تۇراتىنداردىڭ قالالىق تىركەۋى جوق. قالالىق تىركەۋسىز ءبىز ولاردى مەكەمەلەرگە جولداي المايمىز. الايدا, تۇراقتى تىركەۋى بار جاندارعا جۇمىسقا ورنالاسۋعا مۇمكىندىك مول, – دەيدى جۇمىسپەن قامتۋ ورتالىعىنىڭ ءباسپاسوز قىزمەتىنىڭ جەتەكشىسى ديدار سادىقوۆ.
جالپى, مەملەكەت جۇمىسسىزدىق ماسەلەسىن شەشۋگە ءاردايىم قولداۋ كورسەتىپ كەلەدى. «جۇمىسپەن قامتۋ جول كارتاسى – 2020» باعدارلاماسى دا – سونىڭ جاقسى جەمىسى. باعدارلاما اياسىندا باسقا ماماندىق الۋعا تالپىنعان ازاماتتار دايىندىق كۋرسىنان وتەدى. ارنايى كۋالىك الادى. سونىڭ ارقاسىندا قانشاما ادام جۇمىسقا ورنالاسىپ, ءوز وتباسىنا بەرەكە كىرگىزىپ وتىر.
ارينە, ەلىمىز نارىقتىق ەكونوميكادا بولعاندىقتان, اركىم ءوز كۇنىن ءوزى كورۋگە قۇقى بار. سوندىقتان قازاق جاستارى ءبىر ماماندىقتى جەتىك مەڭگەرگەن مامان بولۋ قاجەت. كاسىبي مامانعا سۇرانىس قاشان دا جوعارى. «ەتىكشى بولساڭ دا, ءوز كاسىبىڭنىڭ شەبەرى بول» دەگەن ەكەن دجون كەننەدي. مۇمكىن, سونداي كەزدە جالدامالى جۇمىسشىلاردىڭ سانى ازايىپ, جۇمىسسىزدىق ماسەلەسى دە وڭ شەشىلەر.
ازامات ەسەنجول
