ەلوردادا «تازا قازاقستان: استانا – تازالىق پەن ءتارتىپتىڭ ۇلگىسى» اتتى اۋقىمدى ەكولوگيالىق اكتسياسى ءوتىپ جاتىر, دەپ حابارلايدى astana-akshamy.kz
بۇل اپتا «كيەلى مەكەن» ۇرانىمەن ءوتىپ, تاريح جانە مادەنيەت ەسكەرتكىشتەرىنىڭ اۋماعىن اباتتاندىرۋعا ارنالعان.
مادەنيەت ۇيىمدارى قىزمەتكەرلەرىنىڭ, ءماسليحات دەپۋتاتتارىنىڭ, وقۋشىلار مەن ستۋدەنتتەردىڭ, سپورتشىلاردىڭ, «جاس سارباز» قوزعالىسىنىڭ ستۋدەنتتەرىنىڭ, اۋعان سوعىسى ارداگەرلەرىنىڭ, مەملەكەتتىك مەكەمە قىزمەتكەرلەرىنىڭ جانە ت.ب. بىرلەسكەن كۇش-جىگەرىمەن ءوتىپ جاتىر.
ەكولوگيالىق اكتسيا اياسىندا مادەني مۇرا نىساندارىنىڭ قاسبەتتەرىن, ەسكەرتكىشتەر مەن ىرگەلەس اۋماقتاردى رەتكە كەلتىرۋ بويىنشا تازالىق جۇمىستارى جۇرگىزىلۋدە.
ءساۋىردىڭ 19-ى تاڭعى ۋاقىتتان باستاپ مادەنيەت ۇيىمدارىنىڭ قىزمەتكەرلەرى مەن «جاس سارباز» پاتريوتتىق قوزعالىسىنىڭ ستۋدەنتتەرى سارىارقا داڭعىلىندا ورنالاسقان كەڭەس وداعىنىڭ باتىرى, اتى اڭىزعا اينالعان ۇشقىش تالعات بەگەلدينوۆتىڭ ەسكەرتكىشىنە جانە اينالاسىنا تازالىق جۇمىستارىن جۇرگىزدى.
«جاس سارباز» بالالار مەن جاسوسپىرىمدەر اسكەري-پاتريوتتىق قوزعالىسىنىڭ استانا قالاسى بويىنشا فيليالىنىڭ توراعاسى اسحات نالشىبەكتىڭ ايتۋىنشا, ەكواكتسيا وسكەلەڭ ۇرپاقتىڭ بويىنا جاقىندارىنا دەگەن قامقورلىق, قۇرمەت سەزىمىن قالىپتاستىرۋدىڭ ۇلگىسى بولىپ سانالادى. بارلىعى 50-دەن استام جاس سارباز جاۋىنگەرى قاتىسۋدا.
«ءبىز بۇل اكتسيانى قالامىزدىڭ بارشا تۇرعىندارىنا ۇندەۋ رەتىندە وتكىزىپ جاتىرمىز. ءبىز جاستاردى, ەرىكتىلەردى جانە بارلىق مۇددەلى ادامداردى استانامىزدىڭ اۋلالارى مەن كوشەلەرىن قوقىستان تازارتۋعا جانە ەكولوگيالىق جاعدايىن جاقسارتۋعا شاقىرامىز. جۇمىس ەرتەڭ دە جالعاسادى, ءار اپتا بەلگىلى ءبىر تاقىرىپقا ارنالادى», – دەدى اسحات نالشىبەك.
«كيەلى مەكەن» اپتالىعى باستالعالى 40-تان استام ەسكەرتكىش تازارتىلدى. ەلوردادا بارلىعى 117 ەسكەرتكىش بولسا, ونىڭ 46-سى – مەملەكەت قورعاۋىندا.
ايتا كەتۋ كەرەك, استانادا اۋقىمدى ەكولوگيالىق ناۋقان جالعاسۋدا. ول بەس اپتاعا سوزىلادى, ولاردىڭ ارقايسىسى بەلگىلى ءبىر تاقىرىپقا ارنالعان. بۇل اپتا «كيەلى مەكەن» دەپ اتالادى.
«جاسىل ايماق» دەپ اتالاتىن ءۇشىنشى اپتا اعاش وتىرعىزۋ مەن كوشەتتەردى اكتەۋگە ارنالادى.
4 مامىرعا دەيىنگى ۋاقىت – «ونەگەلى ۇرپاق» دەپ اتالادى. بۇل اپتالىق ارداگەرلەر تۇراتىن اۋلالار مەن قارتتار ءۇيىنىڭ اۋماعىن تازالاۋعا جانە اباتتاندىرۋعا ارنالعان.
«ءمولدىر بۇلاق» دەپ اتالاتىن سوڭعى بەسىنشى اپتادا وزەن-كولدەردىڭ ماڭايى قوقىستان تازارتىلادى.
