JOLTAP جوباسىنىڭ قىسقا مەرزىمدى تەگىن كۋرستارىنىڭ ارقاسىندا 2 مىڭنان استام جۇمىسسىز استانالىق جاڭا ماماندىق يگەردى, دەپ حابارلايدى astana-akshamy.kz
جوبا جەتەكشىسى ەراسىل ءدىلدايىمنىڭ ايتۋىنشا, بۇل باستاما ەلوردانىڭ جۇمىسسىز تۇرعىندارىن جۇمىسپەن قامتۋ شارالارىنا جاۋاپتى. اتاپ ايتقاندا قىسقا مەرزىمدى وقىتۋ جانە جۇمىسقا ورنالاستىرۋدا ءوزىنىڭ تيىمدىلىگىن كورسەتتى.
«جوبانىڭ ماقساتتى اۋديتورياسى – NEET جاستارى, جۇمىسسىزدار جانە جاڭادان كوشىپ كەلگەندەر. وقىتۋشىلارىمىزدىڭ ايتارلىقتاي تاجىريبەسى بار, ولار – بەلسەندى پراكتيكتەر. وقۋ كابينەتتەرى بارلىق قاجەتتى قۇرالدارمەن جابدىقتالعان. ال كۋرستارعا جازىلۋ ءۇشىن مودۋلدىك پۋنكتەرىمىزدىڭ بىرىنە كەلۋىڭىز كەرەك», – دەيدى مەنەدجەر.
ايتا كەتەيىك, جوبا – استانا اكىمدىگىنىڭ باستاماسى. كووپەراتور – «جاڭا مۇمكىندىك» قوعامدىق قورى. مىنانداي ماماندىقتار بويىنشا قىسقا مەرزىمدى وقۋ باعدارلامالارى قاراستىرىلعان: باريستا, ساتۋشى كاسسير, امبەباپ تاماقتاندىرۋ قىزمەتكەرى, تىگىنشى, سانگەر, ەلەكتر جانە گازبەن دانەكەرلەۋشى. سونىمەن قاتار تسيفرلىق داعدىلاردى الۋعا مۇمكىندىك قاراستىرىلعان – تارگەتينگ, SMM, ۆيدەومونتاج, ماركەتپلەيس, موبيلوگرافيا, گرافيكالىق ديزاين, ۆەب-ديزاين, نەگىزگى تسيفرلىق داعدىلار.
قاتىسۋشىلار تاڭداي الاتىن 15 ماماندىق بار, وقۋ باعدارلامالارى ەڭبەك نارىعىنىڭ سۇرانىسى نەگىزىندە قۇراستىرىلعان جانە ماماندىققا بايلانىستى ەڭ قىسقا مەرزىمدە – 2 اپتادان 1 ايعا دەيىن پراكتيكالىق داعدىلاردى بەرۋگە باعىتتالعان.
قىسقا مەرزىمدى كۋرستاردىڭ وقىتۋشىسى, باريستا تۇرار ءىلياس بۇل ماماندىقتى مەڭگەرگىسى كەلەتىندەردىڭ جەتكىلىكتى ەكەنىن ايتادى.
«مۇندا بازالىق باريستا كۋرستارىن ۇيرەتەمىز. بۇعان كلاسسيكالىق ەسپرەسسو, كاپۋچينو, لاتتە جانە امەريكانو كوفەلەرىن دايىنداۋ كىرەدى. بارمەندىك جۇمىسقا كەلگەن ادام سول ماماندىقتىڭ قاراپايىم داعدىلارىن مەڭگەرىپ, جۇمىس بارىسىندا بىلىكتىلىگىن شىڭدايتىنداي ءبىلىم بەرەمىز», – دەدى.
ونىڭ ۇستىنە مۇنداي كۋرستاردىڭ كومەگىمەن ماماندىعىڭىزدى تۇبەگەيلى وزگەرتۋگە بولادى. شىعارماشىلىق قىزمەتتە ءوزىن سىناۋعا بەل بۋعان دارىگەر گۇلميرا يسمايىلوۆا كۋرسقا قاتىستى. بويجەتكەن تىگىن كۋرستارىنان ءوتىپ, بولاشاقتا كيىم ديزاينەرى بولۋدى ارماندايدى.
«ماعان اتموسفەرا قاتتى ۇنايدى. مۇعالىمدەردىڭ جوعارى دەڭگەيىنە ءتانتى بولدىم, جان-جاقتى جانە انىق تۇسىندىرەدى. ۋاقىت بارىنشا ءتيىمدى وتەدى. وسى ەكى ساعاتتا ءبىز كوپ نارسەگە قول جەتكىزەمىز: ساباقتىڭ تەوريالىق بولىگىن مەڭگەرەمىز, ونى تاجىريبەدە قولدانامىز», – دەيدى جوبا ستۋدەنتى.
ايتا كەتەرلىگى, جوبا جۇزەگە اسىرىلعان ۋاقىتتا بىرقاتار تۇلەكتەر ءوز ءىسىن اشۋ ءۇشىن مەملەكەتتىك گرانتتار مەن شاعىن نەسيەلەرگە يە بولدى, سونىمەن قاتار ءوز بيزنەسىن العا جىلجىتۋ ءۇشىن قاجەتتى تسيفرلىق داعدىلاردى مەڭگەردى. بيزنەس-جوبالارعا كوفەحانالار, اتەلەلەر مەن تۇرمىستىق دۇكەندەر كىرەدى.
