استانادا قالاسىنىڭ بارلىق اۋدانىندا جاپپاي تازالىق جۇمىستارى ءجۇرىپ جاتىر, دەپ حابارلايدى astana-akshamy.kz
كوپىرلەر, ماڭدايشالار, قورشاۋلار, ايالدامالار جۋىلىپ, جوندەۋ-قالپىنا كەلتىرۋ جۇمىسى جۇرگىزىلىپ جاتىر, سول سياقتى الاڭقايلار, ساياباقتار, قوعامدىق ورىندار, ت.ب. قوقىستان تازارتىلدى.
جول جۇمىسى دا باستالىپ كەتتى. بيىل 200-دەن استام كوشەنىڭ شۇڭقىرلارىن بىتەۋ جۇمىسى جۇرگىزىلسە, تاعى 50-دەن استام كوشە ورتاشا جوندەۋدەن وتەدى. سونداي-اق تروتۋارلاردى, اۋلالاردى جانە قوعامدىق ورىنداردى اباتتاندىرۋ جۇمىستارى جۇرگىزىلىپ جاتىر.
مىسالى, الماتى اۋدانىندا: 1) تاۋەلسىزدىك داڭعىلى (اقبۇلاق وزەنىنەن ب. مومىشۇلى داڭعىلىنا دەيىن) – جۇمىس اقبۇلاق وزەنىنەن باستالىپ, ق.مۇنايتپاسوۆ كوشەسىنە دەيىن; 2) اقبۇلاق وزەنىنىڭ جاعالاۋى (ابىلاي حان داڭعىلىنان اممان كوشەسىنە دەيىنگى ۋچاسكەلەردە اباتتاندىرۋ جۇمىسى بەلسەندى جۇرگىزىلۋدە) – جۇمىستار ابىلاي حان داڭعىلىنان باستالدى; 3) ت.جۇرگەنوۆ كوشەسى (ايناكول كوشەسىنەن ج.ناجىمەدەنوۆ كوشەسىنە دەيىن) – جۇمىستار ايناكول كوشەسىنەن باستالدى, جۇمىستى ا.بولەكپاەۆ كوشەسىنە دەيىن اياقتاۋ جوسپارلانىپ وتىر. سونداي-اق, 5 سۋبۇرقاق كەشەنىن كونسەرۆاتسيالاۋ جۇمىستارى جۇرگىزىلۋدە.
سارىارقا اۋدانىندا جەلتوقسان كوشەسىنىڭ بويىنداعى (اباي داڭعىلىنان س.سەيفۋللين كوشەسىنە دەيىن) ەسكى اسفالت جابىندىسىن بولشەكتەۋ جۇمىسى باستالدى. بۇل اۋماقتىڭ تروتۋار بولىگى ءساۋىر ايىنىڭ سوڭىنا دەيىن جاڭارتىلادى. وعان قوسا, ورىندىقتار, قوقىس جاشىكتەرى جانە ت.ب. ورناتىلادى.
بايقوڭىر اۋدانىندا بوگەنباي باتىر داڭعىلىندا رەسپۋبليكا داڭعىلىنان ءۋاليحانوۆ كوشەسىنە دەيىن; ءۋاليحانوۆ كوشەسىندە بوگەنباي باتىر داڭعىلىنان س.سەيفۋللين كوشەسىنە دەيىن; تاشەنوۆ كوشەسىندە تاشەنوۆ كوشەسى, 13-تەن رەسپۋبليكا داڭعىلىنا دەيىن جانە ت.ب. قوعامدىق كەڭىستىكتەردى اباتتاندىرۋ جوسپارلانىپ وتىر.
سونىمەن قاتار, قالادا «تازا قازاقستان: استانا – تازالىق پەن ءتارتىپتىڭ ۇلگىسى» ەكواكتسياسى ءوتىپ جاتىر. اۋقىمدى ەكولوگيالىق ناۋقان اياسىندا قالانى, نوسەر جانە ارىق كارىز جەلىلەرىن سانيتارلىق تازالاۋ, كوشەلەردى, تروتۋارلاردى, كۆارتالىشىلىك اۋماقتاردى تازارتۋ جۇمىسى دا جۇرگىزىلىپ جاتىر. سونداي-اق, جاسىل جەلەكتەردى كۇتىپ-باپتاۋ جانە وتىرعىزۋ, ساۋدا نىساندارىنا ىرگەلەس اۋماقتاردى جيناۋ, كوگالدار مەن گۇلزارلاردى ورناتۋ, رۇقسات ەتىلمەگەن پوليگونداردى جويۋ جانە ت. ب. جۇمىستار جۇرگىزىلۋدە.
