«حابار» اگەنتتىگى كورەرمەندەرگە تاعى ءبىر تەلەحيكايا ۇسىندى.
كينونىڭ اتاۋى – «جىگىتتەر حيكاياسى». بالا كەزدەن بىرگە وسكەن ءتورت جىگىتتىڭ تاعدىرى ءتورت تاراپقا ءبولىنىپ, جىلدار وتە قايتا ءبىر ارناعا توعىسادى. ارينە, مۇندا دا ماحاببات, ساتقىندىق, جازاتايىم جاعدايلارعا تاپ بولعان وقيعالار سۋرەتتەلەدى. دەگەنمەن, ەڭ باستىسى, دوستىق دەگەن ۇلى ۇعىم فيلم وزەگىنە ارقاۋ بولعان.
تەلەحيكاياعا تاجىريبەلى اكتەر جانە تەلەجۇرگىزۋشى جان بايجانباەۆ, ازامات شارعىنباەۆ سىندى ازاماتتارمەن قاتار, وليمپيادا چەمپيونى, ۆەل باركەر كۋبوگىنىڭ يەگەرى سەرىك ساپيەۆ ءتۇستى.
15 سەريالى تەلەحيكايا قازاق جانە ورىس تىلدەرىندە جارىق كوردى.
