تەاتردان شىعىپ جاتقان كورەرمەننىڭ قاراسى مول. شات-شادىمان كۇيگە بولەنگەن جاستار قيقۋلاپ, «مىسىقتاي مياۋلاپ» بارادى. «مىسىقتاي مياۋلاعانى نەسى؟» دەپ تاڭ قالماڭىز. بۇل 25 قازاندا اكتەر داۋرەن سەرعازيننىڭ رەجيسسەر رەتىندەگى ەكىنشى تۋىندىسى «العاشقى ماحاببات» كومەدياسىنىڭ ەستەن كەتپەس ەپيزودىنىڭ ءبىرى ەدى.
تەاتردىڭ سەگىزىنشى ماۋسىمىنىڭ اشىلۋىن اسىعا كۇتكەن كورەرمەن قاۋىم ءۇشىن استانا قالالىق جاستار تەاترىنىڭ ساحناسىندا قالامگەر قانات ءجۇنىسوۆتىڭ شىعارماسىنىڭ قويىلۋى ۇلكەن جاڭالىق بولدى. قويىلىمدى كورگەن ادام باسىنان كەشكەن بال كۇندەرىنە, وقۋشى كەزىندەگى ورالماس ساتتەرىنە قايتا ساپار شەككەندەي اسەر الارى ءسوزسىز. جاس رەجيسسەر داۋرەن سەرعازين جازۋشى شىعارماسىن كوكىرەك كوزىنەن, جۇرەكتەن وتكىزىپ, وعان وزگەشە بوياۋ, كوركەم ناقىش بەرگەن.
الدىمەن كوڭىل اۋدارار وبراز – قانات. ول شىعارمانىڭ جۇگىن ارقالاپ تۇرعان نەگىزگى كەيىپكەر. وقۋشىلاردىڭ ىشىندەگى ەڭ بۇزاقىسى سول بولعانىمەن, اقىنجاندى, جۇرەگى نازىك, عاشىق بولعان ادامى ءۇشىن ءومىردىڭ قاي توسقاۋىلىنا دا قارسى تۇراتىن تاۋەكەلشىل جىگىت. قانات ءرولىن كەيىپتەگەن نۇرلىبەك تولەگەن ءوزىنىڭ وزگەشە ويىنىمەن, عاشىق اتاۋلىعا ءتان البىرت سەزىممەن بوزوكپە بوزبالانىڭ مىنەزىن جاقسى اشىپ بەرگەن. سودان با, جەڭىل كومەديا كوپشىلىك نازارىن وزىنەن الىستاتپاي, ءبىر ەندىكتە ۇستاپ, ساحناعا ۇمسىندىرا ءتۇستى.
ءمادينا ماي ويناعان گۇلزات بەينەسى دە قىزۋ دايىندىقتىڭ جەمىسى. بوزبالا سەزىمىن باۋراپ الاتىن تىلسىم كۇش, جاقسى قاسيەتتەرمەن كومكەرىلگەن اجار ايەلدىڭ تال بويىنا توعىسقانداي. ءدال وسىنداي ءساتتى شىققان بەينەلەرگە مەكتەپ ديرەكتورىن (ب.قۇسانباەۆ), قايروشتى (ە.تىلەۋكەنوۆ), باتىردى (ە.شايكەنوۆ) جاتقىزعان ءجون بولار.
ال, ءبىز باسىندا ايتىپ وتكەندەي, تەاتردان تىنىس الىپ شىققان كورەرمەننىڭ كوكەيىنەن كەتپەي, اڭگىمەلەرىنە ارقاۋ بولىپ, كەيىپكەرىن دە, كورەرمەنىن دە «مىسىقشا مياۋلاتقان» كەلەسى بەينە – بەلگىلى اكتەر ءادىل احمەتوۆ جان بىتىرگەن ايبول وبرازى. ساحنانى ەركىن مەڭگەرىپ, ەلدىڭ ىقىلاسىنا ءبولەنگەن اكتەر بۇل جولى ەرەكشە شەبەرلىگىمەن كوزگە ءتۇستى. جاسىراتىنى جوق, ءباسپاسوز بەتتەرىندە ەمىس-ەمىس ءادىلدىڭ اكتەرلىگى بىرسارىندىلىققا, بىرىزدىلىككە سالىنىپ بارا جاتقاندىعىن, كەيىپكەرلەرىنىڭ ءبىرى-بىرىنە ۇقساپ كەتەتىندىگى تۋرالى جازىلىپ تا ءجۇردى. مىنە, بۇگىن وسى ويلاردى ءادىل جوققا شىعاردى. ول وبرازدى بيىك دەڭگەيىنە دەيىن كوتەرە كەلىپ, وسىنداي جاعىمسىز تيپتەردىڭ جادىگويلىگىن جەرىنە جەتكىزە بەينەلەدى. مىسىق مياۋىن كەلىستىرە سالعان ايبولدىڭ ينەنىڭ كوزىنەن وتەتىن ايلاكەرلىگىن مويىنداماسقا ءاددىڭ جوق.
ارينە, ساحناعا شىققان قانداي تۋىندى بولماسىن, اكتەردىڭ سولعىن ويناۋعا قاقىسى جوق. ال, تەاترعا ەندى ەتى ۇيرەنىپ كەلە جاتقان جاس ورىنداۋشىلاردىڭ شەبەرلىگىن ۇشتاۋدا نەمەسە ولاردىڭ ءرول جاساۋ ساتىندەگى العىرلىعىن رەتتەۋدە بۇل قويىلىم الداعى ۋاقىتتا ءوز مىندەتىن تولىعىمەن ورىندايتىنا سەنىمىمىز مول.
جان-جاقتى شىعارماشىلىق ىزدەنىستەرىن, سان الۋان كوركەمدىك بەينەلەۋ تاسىلدەرىن قاراستىرۋدا د.سەرعازين رەجيسسۋراسى ءوزىنىڭ ءوسۋ قارقىنىن ەسەلەپ كەلەدى. وعان قويىلىمنىڭ بەزەندىرىلۋى دە, اۋەن سازبەن ورىندى استاسىپ, بيمەن سەرپىن الۋى, كوركەم تۋىندىنىڭ تۇلەي تۇسۋىنە ءوز سەپتىگىن تيگىزگەن. «العاشقى ماحاببات» – ەلوردالىق تەاتردىڭ ۇلكەن تابىسى. سونىمەن, اكتەر داۋرەن, رەجيسسەر سەرعازين ونەر ورىنە تاعى ءبىر باتىل قادام جاسادى. ۇستاز بەن شاكىرت اراسىنداعى ماحاببات توعىسپاسا دا, ءوز ارناسىن تاۋىپ, وزگەشە شەشىلدى. ال, مەكتەپ ديرەكتورى مەن اۋىل تۇرعىنى ايبولدىڭ مىسىقشا مياۋلاپ قالا بەرۋى كوڭىلگە قونىمدى فينال. قازاقتىڭ ءار اۋىلىندا تىرشىلىگى تاسادا قالىپ, جاستىق شاعى ۇرلانىپ, ۋاقىتى زىمىراپ ءوتىپ جاتقان ءومىر كەيىپكەرلەرى كوپ-اق…
ءبىز جاتاقحاناعا جەتكەن سوڭ دا ستۋدەنتتەر سپەكتاكل تۋرالى ۇزاق تولعاندى. جارايسىڭ, جاستار تەاترى!
ميراس ءابىل ,
قازاق ۇلتتىق ونەر ۋنيۆەرسيتەتىنىڭ 4-كۋرس ستۋدەنتى, تەاترتانۋشى
