Тұңғыш Президент күні Астана салтанатты шаралардың сахнасына айналды. Ең ауқымды мерекелік концерт «Бір ел! Бір тағдыр! Бір Елбасы!» деген атпен елордадағы «Сарыарқа» велотрегінде өтті. Оған он мыңға жуық студенттер мен оқушылар қатысты.
Бір ел – бұл барлығымыз үшін ортақ ұлттық мүддеге жұмылған ортақ Қазақстан. Бір тағдыр – барлығымыз бірге жүріп өткен қиындықтар мен жеңістер. Бір Елбасы – бұл жаңа мемлекет қалыптасуының өтпелі кезеңінде өз тағдырын сеніп тапсырған Қазақстан халқының жауапты таңдауы. Міне, қоғамдық келісімді ұстап тұратын осы үш таған мерекелік концерттің басты арқауына айналды.
Кеш тізгінін ұстаған белгілі әртістер Азамат Сатыбалды, Сырым Қашқабаев және Әділ Ахметов дәстүрге айналған іс-шараның мәні мен мазмұнын жастарға ұғындырды. Олар көпшілікке еліміздің болашақ элитасының қалыптасу үдерісі, саяси-экономикалық реформалардың табыстылығы, еліміздің әлемдік қауымдастық алдындағы беделі туралы баяндады.
Іс-шара барысында елордалық оқушылар арасындағы «Қазақстан – 2050: оқушылар көзімен» байқауының жеңімпаздарын салтанатты марапаттау рәсімі өтті. Тұңғыш Президент күні қарсаңында он мыңнан астам оқушы қатысқан бәйгеде «Үздік эссе» аталымын №66 мектеп-лицейдің 11-сынып оқушысы Әйгерім Балабекова иеленді. «Үздік ғылыми жұмыс» жеңімпазы болып Оқушылар сарайының шәкірті Темірлан Нәби танылды. «Үздік инновациялық жобада» бірлесіп еңбек еткен №48 мектеп-лицейдің оқушылары Қайнар Қаһарман мен Самат Өмірзақ топ жарды. Ал «Үздік сәулет идеясы» №35 мектеп-лицейдің өрені Әрсен Айбасовқа берілді. №50 мектеп-лицейінің түлегі Назгүл Дүйсенбаева «Көшбасшы оқушы» атанды. Олардың барлығына құрмет пен сый-сияпат көрсетілді.
Сонымен қатар, мерекелік шарада шынайы бақыттың формуласы бүлдіршіндер көзімен берілді. «Отбасы бар, елі бар, Елбасы бар берекелі елдің бәрі бақытты!» деген қос балақай бүгінгі бейбіт өмірдің бейнесі іспетті. Көрермендер Оқушылар сарайының, «Ренессанс» балет мектебінің және өскемендік «Флэш» тобының қатысуымен «Бақыт» қойылымын тамашалады. Шарада жастардың рухын көтеретін патриоттық әндер де шырқалды. «Алашұлы» тобы, Мәдина Сәдуақасова, Астана опера және балет театрының әртістері көңіл асқақтататын көтеріңкі әндерін тарту етті.
Мерекелік бағдарламада Қазақстанның ел болып қалыптасу жолы мен 22 жыл ішінде жеткен жетістіктерін айшықтайтын қойылымдар көрсетілді.
Гүлмира АЙМАҒАНБЕТ
