Жылдағы дәстүр бойынша қыстың алғашқы күні, Ақорда алдында бас шыршаның шамы жағылды.
Биыл ұйымдастырушылар шырша шамын жағу арқылы балалар мен жастардың спортқа деген қызығушылығын арттырып, салауатты өмір салтын насихаттауды басты мақсат етіпті. Соның бір айғағы ретінде биылғы шырша шырағданын жағу құрметі әуесқой бокстан әлем чемпио-ны, халықаралық спорт шебері Данияр Елеусіновке бұйырды. «Жылан жылы ел спорты үшін жетістіктерге толы болды. Бүгінде дүниежүзі Қазақ елін және қазақстандық спортшыларды жақсы біледі. Толайым табыстарымыз бола берсін. Келер жылдан да үлкен жетістіктер мен жеңістер тілеймін» деп ізгі тілегін жеткізген жас спортшы 25 метрлік шыршаны қол ишарасын жасап, самаладай жарқыратты, іле-шала күллі республикадағы шыршалардың, соның ішінде елордадағы елуден аса жаңажылдық шыршалар жарыққа бөленді.
Салтанатты шараның құрметіне «Көңіл-күй құбылысы» атты театрландырылған қойылым көрсетілді. Жылдың төрт мезгілін бимен бейнелеп, кісі бойымен бірдей қуыршақтар жұршылықты ертегі әлеміне жетеледі.
Аяз ата мен Ақшақардың бейнесіндегі актерлер Ғани Құлжанов пен Анна Бурбукина да жылы лебіздерімен тойдың сәнін аша түсті. Жаңа жыл, ең алдымен, балаларға қызықты. Сондықтан мерекелік қойылымға қызылды-жасылды киінген 4 мыңнан аса елордалық оқушы қатысты. Мерекелік көңіл-күй Медет Шәйкелов, Маржан Арапбаева мен Рүстем Жүгінісовтың орындауындағы «Спорт, спорт, спорт» әнімен қыза түсті.
Шыршаның шамы жағылған соң, 7 минуттай отшашу болды.
Қымбат НҰРҒАЛИ
