Кеше елорданың үкіметтік емес ұйымдары «Қазақстан» ОКЗ жиналып, қаладағы азаматтық қоғамның жай-күйін талқылады. Үкіметтік емес ұйымдардың қалалық форумына Астана әкімінің орынбасары Аида Балаева, ҚР Парламент Мәжілісінің депутаттары, аталған саланың өкілдері қатысты. Форумның модераторы Аида Балаева «бұл жиын атқарылған істі пысықтап, алдағы жұмыстың жоспарын бағдарлау үшін қажет» екенін айтты. Сондай-ақ қоғамдағы көкейтесті мәселелерді және оны бірлесіп шешу жолдарын ортаға салуға мүмкіндік беретін ашық сұхбат алаңы екенін жеткізді.
ым қызмет етеді. Соңғы екі жылда солардың көмегімен мемлекеттік әлеуметтік тапсырыс бойынша жалпы құны 120 млн теңгеге 50-ден астам жоба жүзеге асырылды. Бұл мәліметті тілге тиек еткен Ішкі саясат басқармасының бастығы Болат Тілепов аталған саланың өзекжарды мәселелеріне тоқталды. Бұған дейінгі форумдарда айтылып келген «Мемлекеттік әлеуметтік сатып алу туралы» заңның кемшін тұстарын тағы бір мәрте еске түсіруге тура келді.
– Ішкі саясат басқармасы – үкіметтік емес ұйымдар үшін конкурс жариялайтын бірден-бір орган болғандықтан, қоғамдық ұйымдар тарапынан наразылыққа жиі ұшырайды. Жиі көтерілетін мәселе – әлеуметтік тапсырыс конкурсына қатысты. Мемлекеттің қоғамдық ұйымдардың жобаларын қаржыландырып келе жатқанына 6 жылдан асты. Нәтижесі көз алдымызда. Әйтсе де, мемлекеттік қаржыландыру – сұраныс білдірген ҮЕҰ-ның есеп шотына ақшаны аудара салу емес. Бұл саланы реттейтін тиісті заңдар мен белгіленген тетіктер бар. Өздеріңізге белгілі, жақында аталмыш заңға өзгеріс енгізілді. Оған тек ұйымдардың ғана емес, біздің де келіспейтін тұстарымыз бар, – деді Б.Тілепов.
Оның айтуынша, бірінші мәселе конкурстық процедураларға қатысты. Екіншіден, кейбір ұйымдар қоғамдық мүддеден гөрі, өзінің жеке мүддесін жоғары қойып, бастапқы бағытынан жаңылып жатады. Үшіншіден, ұйымдардың тақырыптық шеңбері тар болып тұр. Нақты жұмыс атқарып отырған ұйымдардың дені гендерлік саясат, салауатты өмір салтын қалыптастыру, жастар мәселесіне дендеп жүр. Халықтың белгілі бір деңгейде сауатын ашуға ауадай қажет болып тұрған ұйымдар жоқтың қасы. Мәселен, жұмыссыздық, еңбек дауын шешу, тұрғын үй-коммуналдық саласындағы жаңашылдықты елге егжей-тегжей түсіндіруге қол ұшын беретін ұйымдар болса құба-құп. Түптеп келгенде, бұл үкіметтік емес ұйымдар тарапынан кейбір салалар елеусіз қалып отыр дегенге саяды. Сондықтан, оларға мемлекеттік органдармен бірлесе жұмыс істеу қажет-ақ.
Форумда азаматтық шығармашылықты дамыту қажеттілігі де сөз болды. «Нұр Отан» ХДП Парламентаризм институтының директоры Болат Байқадамов азаматтық қоғамды қалыптастырып, дамыту тек мемлекеттің ғана емес, үкіметтік емес ұйымдардың да міндеті екенін баса айтты. «Оны дамытуға билік емес, бұқараның өзі мүдделі болуы керек» дейді ол. Ал «Қазақстанның азаматтық альянсының» бірінші вице-президенті Салтанат Рахымбекова жиналғандарға «Қазақстанның әлеуметтік модернизациясы арқылы тұрғын үй қатынастарын дамыту» тақырыбында баяндама жасап, әріптестерін аталған саланы дамытуда белсенділік танытуға шақырды. Бұдан бөлек, еңбек адамдарының әлеуметтік қолдаудағы кәсіподақтың рөлі мен ҮЕҰ мемлекеттік органдармен әріптестігін жандандыру туралы айтылды. Форум соңында әлеуметтік жобалар сайысының жеңімпаздарын марапаттау салтанаты өтіп, үздік танылғандарға ұйымдастырушылардың сый-сияпаты табысталды.
Айнұр ШОШАЕВА
