Астана қаласының көркін келтіріп тұратын нысандардың бірі – көпірлер. Елорда болғалы Есіл өзені үстінен бірнеше көпір салынды. Бұл көпірлер, бір жағынан, қаланың сәулетін ашып тұрса, екінші жағынан, елордадағы өзекті мәселенің бірі – көлік кептелісінің алдын алып тұрған маңызды инфрақұрылымға айналды. Алдағы жылы Тәуелсіздік даңғылы тұсынан тағы бір көпір ашылады. Бұл жөнінде Астана әкімі Алтай Көлгінов мәлім етті.
«Жыл сайын қала тұрғындарының қатары көбейіп, көлік нөпірінің артуына байланысты жол-көлік желісін дамытуға тиісті көңіл бөліп келеміз. Трафикті жеңілдету және аудандар арасындағы қосымша байланысты қамтамасыз ету үшін көпірлер, көшелер саламыз, сол сияқты жолдарды кеңейту жұмысын жүргіземіз.
Есіл өзені арқылы өтетін Тәуелсіздік даңғылындағы көпір құрылысының барысымен таныстым. Бұл көпір Тәуелсіздік даңғылы, жаңа теміржол вокзалы, Қошқарбаев даңғылы, Нәжімеденов көшесі, Әзірет Сұлтан мешіті, Байтұрсынов көшесі, Қордай, Айнакөл, Момышұлы даңғылы мен сол жағалау арасындағы қосымша байланысты қамтамасыз етеді. Бұл көпірді 2023 жылы аяқтауды жоспарлап отырмыз.
Осы жылдың тамыз айында Ұлы дала даңғылындағы жаңа көпір үстіндегі қозғалысты аштық. Көпір Мәңгілік ел даңғылына, А.Байтұрсынов, Р.Қошқарбаев, Ж.Нәжімеденов көшелеріне, Nova City ауданында, «Мыңжылдық» аллеясында көлік ағынын сейілтуге, «Нұрлы жол» жаңа вокзалына, «Тельман» және «Промышленный» елді мекендеріне, Метро гипермаркетіне, Жұмабаев даңғылына, Жүргенов көшесіне және т.б. қолжетімділікті арттырады.
Сол сияқты осы айда А62 көшесінде (А91 көшесінен Астана-Қарағанды тас жолына дейінгі аралық) қозғалысты ашуды жоспарлап отырмыз. Бұл көше Қарағанды тас жолы, «Нұрлы жол» теміржол вокзалы және қаланың сол жағалауы арасындағы көлік қатынасын қамтамасыз етеді.
Сонымен қатар соңғы жылдары 400-ден астам көше жөнделді, олардың жартысы елді мекендерде орналасқан. Осыған дейін біз кешенді көлік схемасы (ККС) тұжырымдамасын бекіттік. ККС тұрғындардың жыл сайынғы өсімін және жолдардағы трафиктің ұлғаюын ескере отырып, қалалық көліктің 10 және одан да көп жылға бірыңғай техникалық пайымын әзірлеуге мүмкіндік береді» деп жазды елорда әкімі.
