Astana jastary käsıpkerlıktı damytudyŋ 2021-2025 jyldarǧa arnalǧan ūlttyq jobasy aiasynda jeŋıldetılgen nesie ala alady. Bügıngı taŋda elordada jyldyq 2,5 paiyzben şaǧyn nesieleu jüiesı arqyly jas käsıpkerlerge startap aşu mümkındıgı qoljetımdı bolyp otyr. Sonymen qatar jastardy jūmyspen qamtu boiynşa bırqatar baǧdarlamalar ıske qosylǧan.
Jas käsıpkerlerdı qoldau, olardy jūmyspen qamtu – kün tärtıbınen tüspeitın mäselelerdıŋ bırı. Osy oraida keşe Astana qalasynyŋ Jastar saraiynda elordalyq jastarmen kezdesu ūiymdastyrylyp, jastarǧa şaǧyn nesie beru, jūmyspen qamtu jäne «Jasyl el» memlekettık baǧdarlamasy boiynşa aqparattyq-tüsındıru jūmysy jürgızıldı. Sondai-aq bos jūmys oryndary järmeŋkesı ötıp, 16 jūmys beruşı 300-ge tarta bos jūmys ornyn ūsyndy.
Soŋǧy kezde elordada jas käsıpkerlerdı qoldauǧa barynşa jaǧdai jasaluda. Onyŋ ışınde jyldyq 2,5 paiyzben jeŋıldetılgen şaǧyn nesieleu tetıgınıŋ arqasynda jastarǧa startap aşu mümkındıgı qoljetımdı.
Elorda jastary käsıpkerlıktı damytudyŋ 2021-2025 jyldarǧa arnalǧan ūlttyq jobasy aiasynda jeŋıldetılgen nesie ala alady.
– Şaǧyn nesieler agronesielık korporasiia arqyly jüzege asyrylady. Būl şaǧyn nesie 21 men 35 jas aralyǧyndaǧy jas käsıpkerlerdı qoldauǧa baǧyttalǧan. Ol konkurs negızınde berıledı. Jeŋıldetılgen nesienıŋ şarttary: nominaldy syiaqy mölşerlemesı – jyldyq 2,5 paiyz; nesienıŋ maksimaldy somasy – 5 mln teŋge (kepıldıkpen). Merzımı – 5 jyl. Mal şaruaşylyǧyna – 7 jyl, – dedı Jūmyspen qamtu jäne äleumettık qorǧau basqarmasy basşysynyŋ orynbasary Erlan Jüsıpov.
Ötınış bergen kezde jeke käsıpker retınde tırkelu merzımı 5 jyldan aspauy kerek. Sonymen qatar, mikrokredit beru merzımınıŋ üşten bır bölıgı üşın negızgı boryşty öteu jäne syiaqy töleu boiynşa jeŋıldık kezeŋı qarastyrylǧan. Mındettı şart – kepılzattyŋ boluy. Kepıl retınde jyljymaly da, jyljymaityn mülık te qabyldanady. Olar bolmaǧan jaǧdaida, kepıl beruşını tartu közdeledı. Kepıl beruşı jastardyŋ ata-anasy, tuystary jäne basqa da senımdı adamdar boluy mümkın. Sonymen qatar soŋǧy ekı jylda nesie tarihy boiynşa 180 künnen artyq keşıktırudıŋ bolmauy qajet.
Astana qalasy Jūmyspen qamtu jäne äleumettık qorǧau basqarmasy basşysy orynbasarynyŋ aituynşa, biyl būl maqsatta 562 mikrokredit qyzmetın aluşyǧa respublika biudjetınen 2,8 mlrd teŋge qarastyrylǧan. Sondai-aq kepılge qoiylǧan mülıktıŋ Astana qalasynyŋ aumaǧynda boluy mındettı emes jäne ony Qazaqstan Respublikasynyŋ bükıl aumaǧynda tırkeuge bolady. Jastardy jūmysqa tartu boiynşa Jūmyspen qamtu ortalyǧy «Qoǧamdyq jūmystar», «Jastar praktikasy», «Äleumettık jūmys oryndary», «Alǧaşqy jūmys orny», «Ūrpaqtar kelısımşarty» sekıldı jūmysqa ornalastyru baǧdarlamalarynyŋ talaptarymen de tanystyrdy.
«Agrarlyq nesie korporasiiasy» AQ elordadaǧy filialy direktorynyŋ nesieleu jönındegı orynbasary Oljas Baimahanov mikrokredit alu üşın ötınış beruşı bırneşe qūjat tapsyruy kerek ekenın atap öttı.
– Ötınış beruşı aldymen, jeke basyn rastaityn kuälıgı men biznes josparyn tapsyruy qajet. Sodan soŋ onyŋ jeke şoty bar ekenın rastaityn bank anyqtamasy boluy kerek. Eger ötınış beruşı azamattyŋ atynda nesieler bolǧan jaǧdaida, nesie bereşegınıŋ, onyŋ ışınde merzımı ötken bereşegınıŋ bar nemese joq ekenı turaly anyqtama talap etıledı. Ötınış beruşı jūmys ısteitın azamat bolsa, onda jalaqysy men basqa da tabysyn rastaityn qūjatty körsetuı kerek. Sondai-aq kepılge berılgen mülıktı baǧalau turaly esep jäne basqa da qūjattar boluy qajet, – dedı Oljas Baimahanov.
Jiyn barysynda «Studenttık qūrylys jäne jastar otriadtarynyŋ respublikalyq qozǧalysy» qoǧamdyq qory töraǧasynyŋ orynbasary Asylbek Äbdıräşitov elordada «Jasyl el» jastar eŋbek jasaqtarynyŋ HIX eŋbek mausymy bastau alǧanyn aityp, jūmys ısteuge qyzyǧuşylyq tanytqan jastardy memlekettık baǧdarlamaǧa qatysuǧa şaqyrdy. Biyl 4200 jasöspırım men jastardy jūmyspen qamtu közdelgen. Olardyŋ qatarynda jasy 14-ten asqan mektep oquşylary, studentter, köpbalaly jäne äleumettık az qamtylǧan otbasylardyŋ balalary, 35 jasqa deiıngı jūmyssyz jastar da bar.
Jastardy jūmyspen qamtuda kezektı bos jūmys oryndary järmeŋkesı ūiymdastyrylyp, jūmyssyz jastarǧa 273 bos jūmys orny ūsynyldy. Järmeŋkege 910 jūmyssyz jas qatysty. 16 jūmys beruşınıŋ qatarynda «Qazpoşta» AQ, «Jusan Bank» AQ, «Retro Retail» JŞS jäne qalalyq Polisiia departamentı, Jūmyspen qamtu jäne äleumettık qorǧau basqarmasynyŋ ökılderı qatysyp, mekemeler jūmys ızdep jürgen azamattarǧa aqparattyq-tüsındıru jūmysyn jürgızıp, tüiındemesın qabyldady. Osylaişa elordalyq jastar bırneşe jūmys beruşılermen bır jerde tıkelei söilesuge tamaşa mümkındık aldy.
