Äsırese, Astana qalasynda kün raiy kürt suyǧaly tūmau auruyna şaldyqqandar qatary jiıledı. Jūqpaly sanalatyn derttıŋ aldyn almasa, asqynǧan türınıŋ dauasyn tabu qiynǧa soǧatyny bärımızge mälım. Jauapty mekemeler būl baǧytta qol qusyryp otyrǧan joq, naqty şaralardy qolǧa aluda. Biylǧy epidemiialyq mausym aldynda biudjetten naqty qarajat bölınıp, maqsatty igerılu üstınde. Ūlttyq ekonomika ministrlıgı Tūtynuşylar qūqyǧyn qorǧau komitetı töraǧasynyŋ orynbasary – elımızdıŋ bas sanitarlyq därıgerı Jandarbek Bekşinmen arada örbıgen äŋgıme būl sözımızdı rastai tüsedı.
– Biylǧy epidemiialyq mausymda qandai naqty şaralardy qolǧa aldyŋyzdar?
– Aǧymdaǧy jyldyŋ 1 qazanynan bastap tūrǧyn halyqty tūmauǧa qarsy immundau nauqany bastaldy. Tūmaudyŋ aldyn alu üşın eŋ tiımdı ädıs – halyqty vaksinalau bolyp tabylatyny ras. Aita ketu kerek, 2014-2015 jyldyŋ epidemiialyq mausymy aldynda tūmauǧa qarsy 1,2 millionnan astam vaksina dozasy 874 million teŋgege satyp alyndy. Al byltyr 549 million teŋgege 798 myŋ doza alǧan edık.
– Memlekettık biudjet qarajatyna alynǧan būl därmek eŋ aldymen tūrǧyndardyŋ qai sanatyna egıledı?
– Jūqpaly aurularǧa şaldyǧu qaupı eŋ joǧary degen äleumettık toptarǧa egıledı. Mäselen, sozylmaly ökpe, jürek-qan tamyrlary aurularymen auyratyn, immunitetı naşar jäne jiı auyratyn balalar, medisina qyzmetkerlerı men jüktı äielder…
– Astanalyq tūrǧyndar arasynda ekpenı aqyly türde alǧysy keletınder de bar. Olarǧa qandai mekemeler qyzmet körsete alady?
– Tūmauǧa qarsy aqyly vaksinasiia jekemenşık medisinalyq ortalyqtarda, emhanalardyŋ ekpe kabinetterınde jürgızıledı. Onyŋ qūny är öŋırde 2200 teŋgeden 3000 teŋgege deiın bolady
– Bıle jüreiık, elımızde jyl saiyn neşe adam tūmauratady?
– Jyl saiyn Qazaqstanda tūmau men JRVİ auruyn 600-den 1 million adamǧa deiın jūqtyrady. Būl el halqynyŋ 3,5-nan 10 paiyzǧa juyǧy degen söz.
Eskerte keteiın, vaksina egılgennen keiın 14 künnen soŋ küşıne enedı, onyŋ qorǧanyş belsendılıgı 6-dan 12 aiǧa deiın sozylady.
Ashat RAIQŪL
