ÄLEM ASTANANY TAŊDADY
Törtkül dünienı törınde toǧystyratyn aituly «EHRO – 2017» — halyqaralyq körmesı Qazaqstan astanasynda ötetın boldy. Mūny bükıl älemnıŋ taŋdauy dep bılgen jön.Künı keşe Parij qalasynda ötken Halyqaralyq körmeler biurosy Bas Assambleiasynyŋ 152-şı sessiiasynda, qatysuşy 161 memlekettıŋ 103-ı Astanany qoldap, dauys berdı. Osylaişa, aqtyq bäsekede Belgiiamen «beldesken» Qazaqstannyŋ bäsı biık tüstı.
JAQSYLYQ JORALǦYSY
Ümıtker qalalar arasyndaǧy bäseke qyzǧan tūsta jurnalister tarapynan «Halyqaralyq körmenı ötkızude qarsylasyŋyzdyŋ qandai basym tūsyn moiyndaisyz?» degen saual qoiylǧan. Qazaqstan Belgiianyŋ halyqaralyq körme ūiymdastyrudaǧy köpjyldyq täjıribesın, alpauyt eldermen diplomatiialyq qarym-qatynasynyŋ tereŋdıgın alǧa tartsa, Belgiia delegattary Euraziia kındıgınde ornalasqan Qazaqstannyŋ batys pen şyǧysty jalǧastyruşy «altyn köpır» ekendıgıne erekşe män berdı.
«Eger, körme Qazaqstanda ötse, bızge basqa älemdı köruge mümkındık tuatyn edı» degen ışkı qalaularyn da jasyrmady.
Rasynda da, mūndai halyqaralyq şara TMD aumaǧynda tūŋǧyş ret bızde ötkızılgelı otyr.
Osy künge deiın Aziia aumaǧynan ūzyn-sany 16 memleket körmenı öz elderınde ötkızuge niet bıldırıptı. Bıraq, mūndai jauapty şaruany atqaru tek Qytai, Japoniia, Oŋtüstık Koreia sekıldı jetekşı elderdıŋ ǧana maŋdaiyna būiyrdy.
Bırneşe jyl qatarynan jalpyǧa tanymal ırı aimaqtyq forumdardy ötkızıp, sol arqyly özınıŋ halyqaralyq bedelın nyǧaitqan Qazaqstan osy üştıkten keiın jauapty şaruany öz moinyna alyp otyr.
EKSPO bızge ne beredı?
Ekspo – elderdıŋ ekonomika, ǧylym, tehnika, mädeniet, öner jäne özge de qoǧamdyq salalardaǧy jetıstıkterdı jariialap körsetetın jäne olardyŋ ädıl ärı aşyq bäsekelesuıne arnalǧan älemdık eŋ bedeldı alaŋ.
Körmenı milliondaǧan turister tamaşalaityndyqtan, ärbır el öz mädenietındegı ūlttyq özındık erekşelıkterın tanytatyn jäne özderınıŋ ekonomikalyq jäne tehnologiialyq damuynyŋ deŋgeiın bükıl älemge körsetetın bıregei pavilon qūruǧa ūmtylady.
Körmenıŋ esep-qisaby milliardtaǧan teŋgege şaqtalǧan. Az aqşa emes, ärine. Bıraq, öteuı bar ekenın ūmytpaǧan abzal.
Mäselen, körmenıŋ Qazaqstanda ötkızıluı elımızdegı öndırıstık quattar men ǧylymi bazany jaŋǧyrtuǧa, elımızge jaŋa tehnologiialar men investisiialardy tartuǧa yqpal etedı.
Körme nysandary men elordanyŋ infraqūrylymyn jaqsartuǧa investisiia tartuǧa da ülken mümkındık tuady.
Şaraǧa älemnıŋ jüzge tarta elınen 5 milliondai adam kelmekşı.
Būl eŋ aldymen, Astanadaǧy şaǧyn jäne orta biznestı, qonaqüi biznesı men ışkı turizmdı damytuǧa eleulı äser eterı sözsız.
«EKSPO – 2017» arqyly bız şet memlekettermen saiasi häm äleumettık integrasiiamyzdy arttyryp, turizmnıŋ tasyn örge domalatamyz.
Körme älemdı qazaqstandyqtardyŋ köpūltty mädenietımen, köne tarihymen, önerımen, dästürımen jäne qonaqjai mınezımen tanystyruǧa jol aşyp, elımızdıŋ älemdık qauymdastyq aldyndaǧy tanymaldylyǧy men tartymdylyǧyn arttyrady.
Mausym-qyrküiek ailary aralyǧynda ötetın şara barysynda elordada dünienıŋ tört būryşynan kelgen elderdıŋ mädenietı toǧysqan kün retınde de este qalatyn bolady.
Bolaşaq energiiasy»
Qazaqstan jahandyq körmege osyndai taqyryp ūsynyp otyr.
Būl älemdık qoǧamdastyqty tolǧandyryp otyrǧan qazırgı zamanǧy eŋ özektı jäne maŋyzdy mäselelerdıŋ bırı.
Ekologiialyq taza, qauıpsız jäne jaŋartylatyn energiia közderın paidalanudyŋ özektılıgı jyl saiyn artyp keledı.
Elımız energiianyŋ jaŋa közderın engızu jönındegı Halyqaralyq pıkırtalastardyŋ belsendı qatysuşy retınde tanymal.
Būl taqyryp eŋ üzdık älemdık energiia saqtau tehnologiiasyn, kün, jel, teŋız, mūhit jäne termaldy su tärızdı balamaly energiia közderın paidalanuda jaŋa äzırlemeler men tehnologiiany keŋınen ūsynuǧa mümkındık beredı. Astana osy saladaǧy eŋ üzdık älemdık äzırlemeler men trendter körsetu üşın tiımdı alaŋǧa ainaluy mümkın. Körme sondai-aq eldıŋ öndırıstık quaty men ǧylymi bazasyn tehnologiialyq jaŋǧyrtu jäne ekonomikany jüielı ärtaraptandyru üşın quatty serpın beredı.
Qala ışındegı qala
Halyqaralyq körmeler biurosynyŋ talaptaryna sai körme ötkizuşi qalanyŋ äleueti üş ai köleminde kemı 3-4 mln halyqty qabyldauǧa därmendi boluy tiis eken.
Talapqa sai şahardyŋ oŋtüstık-şyǧys bölıgınde halyqaralyq şarany ötkızuge arnalǧan tūtastai jaŋa qalaşyq tūrǧyzu josparlanuda. Būl maqsatqa Astana qalasy äkımdıgı tarapynan 113 gektar jer böldı. Onyŋ 25 gektary – keşennıŋ özı, qalǧan bölıgı avtotūraqqa, syrtqy qūrylǧylarǧa jäne EXPO – 2017 qalaşyǧyna arnalǧan.
EXPO – 2017 alaŋy Şämşı Qaldaiaqov köşesı men 1-Köpır ainalmaly jolynyŋ qiylysynda ornalasady. Qalaşyq qūrylysyna şamamen, 1,5 mlrd dollar qarjy jūmsalmaqşy.
Memleket basşysy Nūrsūltan Nazarbaevtyŋ aituynşa, qalaşyq özındık säuletımen daralanyp, elordanyŋ üzdık brendınıŋ bırıne ainalmaq. EHRO keşenınıŋ ışınde 97 pavilon ornalastyrylady dep josparlanǧan. Olar kiız üi pışınınde boi kötermekşı. Sonymen qatar, qalaşyq ışınde qonaqtarǧa arnap mūrajai, meiramhana, qonaqüi, tıptı mädeni şaralarǧa arnalǧan ǧimarattar salynady.
Tarihtan tam-tūm derek
Tehnikalyq jäne tehnologiialyq jetıstıkterdı äigıleitın halyqaralyq körmenıŋ bır jarym ǧasyrdan astam tarihy bar.
Eŋ alǧaşqy ämbebap halyqaralyq körme 1851 jyly Ūlybritaniianyŋ astanasy Londondaǧy Gaid-parkte Albert hanzadanyŋ bastauymen ötkızıledı. Būl körme tarihta Djozef Pakstonnyŋ Hrustal saraiymen tanymal boldy.
London körmesınen keiın EHRO dästürlı türde ūiymdastyryla bastady.
Körme ekı türlı baǧytta, ekı türlı taqyryppen ötkızıledı. Onyŋ bırı – «Älemdık ämbebap körme», ekınşısı – «EHRO – Halyqaralyq mamandandyrylǧan körmesı». Bes jylda bır ret ūiymdastyrylatyn ämbebap körmenıŋ taqyrybyna da, auqymyna da eşqandai şekteu bolmaidy. Al, «EHRO – Halyqaralyq mamandandyrylǧan körmesı» älemdık ämbebap körmelerdıŋ aralyǧynda ötkızıledı. Onyŋ erekşelıgı qamtylatyn taqyrybyna bailanysty. Ämbebap körmenıŋ taqyrybyna eş şekteu bolmasa, EHRO-da arnaiy taqyryp belgılenedı. Mäselen, «EHRO – 1985» Japoniiada – «Adam tūrmysyn jaqsartu üşın ǧylym men tehnologiialardy damytu», «EHRO – 1992» İspaniiada – «Jaŋalyqtar ǧasyry», «EHRO – 1988» Avstraliiada – «Tehnika ǧasyryndaǧy bos uaqyt», «EHRO – 1986» Vankuverde – «Kölık jäne bailanys: qozǧalystaǧy jäne bailanystaǧy älem», «EHRO – 2012» Oŋtüstık Koreiada – «Tırı mūhit pen qūrlyq: resurstardyŋ aluan türı jäne tūraqty damu» taqyrybynda ötkızıldı.
Qazır körmenıŋ düniejüzı boiynşa 160 tūraqty qatysuşysy bar. Qazaqstan būl tızımge 1997 jyly endı.
Elımız EHRO körmelerıne 2005 jyldan bastap qatysyp keledı. İspaniianyŋ Saragosa qalasyndaǧy EHRO – 2008 körmesınıŋ qorytyndysy boiynşa 104 qatysuşy el ışınde, bızdıŋ elımızdıŋ pavilony syrtqy jäne ışkı räsımdeluı boiynşa üşınşı oryndy ielengen bolatyn.
161 jyl ışınde älem boiynşa 63 körme ötkızılıptı. Şarany ötkızuden täjıribesı mol elderdıŋ köşın äzırge AQŞ bastap tūr. Mūnda jahandyq körme künı bügınge deiın baqandai 18 ret ūiymdastyrylǧan. Tızımdı ary qarai Fransiia, Belgiia jalǧastyrady. Aitpaqşy, keşegı bäsekede Qazaqstan aiqyn basymdyqpen basyp ozǧan Belgiia da osal bolmai şyqty. EKSPO körmesı būǧan deiın Belgiiada 7 ret ötkızılgen eken.
Bügınde EKSPO ötkızgen elderde körmenıŋ özındık mūralary, simvoldary paida boldy. Londondaǧy Hrustal saraiy, Parijdegı Eifel mūnarasy, Parijdegı Aleksandr III köpırı, Venadaǧy Rotonda – älemdegı eŋ ülken kümbez astyndaǧy pavilon, Melburndegı patşalyq körme pavilony…. Tıze berseŋ, tıptı, köp. Bolaşaqta Astanada boi köteretın EKSPO qalaşyǧy osy qatardan körınetınıne kämıl seneiık.
Kelesı kezek kımdıkı?
2020 jyly ötetın EKSPO-ny ötkızuge niettı memleketter az emes. Soŋǧy derekterge süiensek, bükılälemdık kelesı bäige Aiutthaia (Tailand), Dubai (BAÄ), İzmir (Türkiia), San-Paulo (Braziliia) jäne Ekaterinburg (Resei) qalalarynyŋ arasynda ötkızılmekşı.
Şynar DOSAN