Nauryz – meiırım men berekenıŋ meiramy. Būl künı – «Samarqannyŋ kök tasy jıbıp», adamdar erekşe köŋıl küige enedı. Äsırese, köktemdı bet qaryr sarşūnaq aiazy men aq tütek borany tūtqiyldan soǧyp, «kärı qūdaŋ» qys ūzaqtau qytymyrlyq tanytatyn Arqa tösınde jastar airyqşa kütetın siiaqty.
Astana – jastar qalasy. Mūnda bılım quyp kelgenderınen bölek, «ekı qolǧa bır kürek» jūmys ızdep, näpaqa tabudy közdegen jıgıtter men qyzdardyŋ da qarasy az emes. Jas buyn ökılderın qazır Memleket basşysynyŋ özı qoldap, qamqorlyq tanytyp otyr. Äsırese, keiıngı kezde jūmysşy mamandyǧyn meŋgergen jastarǧa degen közqaras aiqyndalyp, olardyŋ eŋbekterıne qūrmetpen qarau kerektıgı basa aityluda.
Bız bügın Ūlystyŋ ūly künı qarsaŋynda bır özı bırneşe mamandyqty igergen, qandai jūmystyŋ da yŋǧaiyn tanyp, jönın keltıre alatyn besaspap maman jıgıt jönınde äŋgıme örbıtpekpız.
Bız tūratyn «Euraziia» tūrǧyn üi keşenıne on jetı jyl bolǧan. Ötken jyly kıreberıske kürdelı jöndeu jūmystaryn jürgızudı ūiǧardyq. Tūrǧyndar kelısıp, aqşa jinap, bır adamǧa senıp tapsyrǧanbyz. Söitsek, sengen adamymyz alaiaq bolyp şyqty. Jūmystyŋ eŋ qiyn jerı edenge kafel töseuge kelgende zym-ziia joǧaldy. «Osy üiden päter satyp alǧanmyn, osy üidıŋ tūrǧynymyn» dep bärımızdı aldapty.
Endı qaittık? Bıreudıŋ bıtırmei orta joldan tastap ketken jūmysyn bıtırıp berudı eşbır brigada mındetterıne almaidy eken. Eŋsemız tüsıp, daǧdara bastaǧanda osy tūrǧyn üi keşenınde elektrmen dänekerleuşı bolyp jūmys ısteitın Asan degen jıgıttıŋ kezdese ketpesı bar ma? Män-jaidy tüsıngennen keiın «aǧalar, qam jemeŋder, kafel töseu menıŋ qolymnan keledı. Būryn talai mūndai şaruamen ainalysqanmyn» dep bolar bolmas tiyn-tebenge tap-tūinaqtai etıp, bükıl №4 kıreberıstıŋ jöndeu jūmystaryn bıtırıp berdı.
Qoly şeber, ısker jıgıttıŋ nyspysy Asan Köşkınov eken. Onyŋ sol alǧyrlyǧy men yjdahattylyǧyna köpşılık süisınıp, «örkenıŋ össın, jūmysyŋnyŋ jemısın kör» dep batasyn berıp jatty.
Bügınde Asan – 373 päterlı «Euraziia» tūrǧyn üi keşenındegı eŋ abyroily da bedeldı jūmysşy. Öitkenı onyŋ qolynan qoǧamdaǧy eŋ köp sūranysqa ie mamandyq elektrmen pısıru men qatar slesar-santehnik, kafelşı, tas qalauşy, sylaqşy-ärleuşı jūmystarynyŋ barlyǧy keledı eken. Ärı ol täulıktıŋ qai uaqytynda da ıske qajet bolsa, tün ūiqysyn tört bölıp, jarylǧan, apat şyqqan jerge bırden attanyp, jūmysty tyndyrǧanşa bır damyl körmeidı.
Būl turaly osy tūrǧyn üi keşenı Mülık menşık ielerı bırlestıgınıŋ töraǧasy Şalqar Jetpısbaev: «Asannyŋ bızge kelıp jūmys ıstei bastaǧanyna ekı jyldan asty. Osy uaqyt ışınde ol özın jan-jaqty körsettı. Bızge mūndai qai ıstıŋ de tetıgın bes sausaǧyndai bıletın alǧyr jıgıtter auadai qajet-aq. Sondyqtan köp şaruada oǧan senım artyp, arqa süieimız. Özı bır mınezı jaily altyn jıgıt. Araq ışpeidı, temekı tartpaidy. Artyq-auys sözı joq. Isıne tyndyrymdy» dedı.
Asan 1997 jyly Özbekstan Respublikasy Taşkent oblysy Bostandyq audanynda düniege kelıptı. Auyldan orta mekteptı oidaǧydai bıtırgennen keiın äke jolyn quyp, elektrmen pısıruşı mamandyǧyn alypty. Öitkenı ol qarşadaiynan äkesı Amantaidyŋ qasynda jürıp, şaruaşylyqtyŋ nauqandyq jūmystarynda tehnikalardy jöndeude nebır kürdelı elektrmen, gazben pısıru, dänekerleu jūmystaryn közımen körıp östı. Sodan täjıribe jinady. Al santehnika men slesarlyqty aǧasynan üirenıptı.
– Bız otbasynda tört aǧaiyndymyz. Bır aǧam, bır ınım, qaryndasym bar. Olar qazır sol Özbekstanda tūrady. Özım Qazaqstannyŋ azamatymyn. Aldaǧy uaqytta osy mamandyqtarymdy tereŋdete meŋgerıp, öz aldyna bölek bır qyzmet körsetuşı kompaniia qūrsam ba degen maqsatym bar. Qazaq «bas ekeu bolmai, mal ekeu bolmaidy» degen. Biyl üilengım keledı. Sosyn osy özım qalaǧan, özıme ūnaityn jūmysymdy barynşa jan-jaqty damytsam ba deimın, – deidı ol bolaşaq josparlary jönınde äŋgımelep.
Osy kezde onyŋ telefony şyr ete tüstı. Köpqabatty üidıŋ jertölesındegı su qūbyrlarynyŋ bırı jarylyp, tūrǧyndar dabyl qaǧyp jatyr eken. Asan qolyna kılt-qūraly men dänekerleu apparatyn ala salyp atalǧan üidıŋ jertölesıne qarai jügıre jöneldı. Būl – onyŋ kündelıktı jūmysy. Ol öz jūmysyn ūnatady. Sodan bolsa kerek, jūrtşylyqtan ünemı alǧys alyp jüredı.
Elordadaǧy osyndai köpqabatty üilerde jas ta ısker jūmysşy Asan Köşkınovtıŋ qoltaŋbasy qalatynyna bız de senımdımız.
