Astanada Disney studiiasynyŋ «Alisa ainanyŋ arǧy betınde» animasiialyq filmı körermenge jol tartty. İä, iä, būl tek multfilmnıŋ tärjımalanǧan atauy ǧana emes. Erekşelıgı sol, jūrtşylyq kinonyŋ älemdık premerasyn qazaq tılınde tamaşalady.
Būl – «Bolaşaq» qauymdastyǧynyŋ bastamasymen qazaqşalanǧan on besınşı tuyndy. 2011 jyldan jalǧasyp kele jatqan ıs «Mäŋgılık el» ideiasyn jüzege asyryp, qazaq tılınıŋ märtebesın köterıp, onyŋ qoldanys aiasyn keŋeitude.
Gollivud kartinasyn qazaq tılıne dubliaj jasaǧan rejisser – Aijan Jämşitova. Dubliaj elordalyq «Aray Media Group» studiiasynda jürgızıldı. Al aqtyq dubliaj jūmystary Londondaǧy «Shepparton» studiiasynda jazyldy. Keiıpkerlerdı dybystauǧa astanalyq akterler atsalysty. Atap aitsaq, essız Qalpaqşy Tarrant Haitopty – Däuren Serǧazin, Uaqytty – Nartai Saudanbekūly, Aq patşaiym Miranany – Sändı Qarşalova, onyŋ äpkesı İrasebetany – Ainūr Bermūhamedova, aq qoian Maktvisptı – Beibıt Qūsanbaev, sūr qoian Tekeridı – Şah-Mūrat Ordabaev dybystady. Akterlerdıŋ dauystary özınıŋ keiıpkerımen ündesıp, mınezın aşa tüstı.
Filmnıŋ aldyn-ala körsetılımınde akterlerdıŋ atynan Nartai Saudanbekūly söz söiledı:
– Men bügınde «Qazaqtyŋ tılı damysyn, qazaqtyŋ tılı örkendesın!» degen jai ǧana jalaŋ söz emes, naǧyz ıs-ärekettıŋ kuäsı bolyp tūrmyn. Ökınışke qarai, bız köptegen tuyndylardy tek orysşa köruge üirenıp qaldyq. Qazaq tılın ülken ekranǧa alyp şyqqanymyz, jetıstık. Būdan da auqymdy jobany qolǧa alsaŋyzdar, akterler qauymy ärqaşan jankeştılıkpen jūmys ısteuge äzır.
«Alisa ainanyŋ arǧy betınde» şytyrman oqiǧaly filmı körermendı Liuis Kerroll qalamynan şyqqan süiıktı keiıpkerlermen qaita qauyştyrady. Dosy essız Qalpaqşyny qūtqaru üşın Alisa Uaqyt keŋıstıgıne sapar şegedı. Keiıpker qyz kütpegen ǧajaiyp oqiǧalardy bastan keşedı. Otbasylyq qūndylyqtardy därıpteitın Disney būl joly da öz ideiasynan ainyǧan joq.
«Ötkendı özgerte almaisyz, bıraq odan ǧibrat aluǧa bolady», «Uaqyttan ozamyn deme, bärıbır quyp jetedı» syndy jauyr bolǧan sözderge män kıredı. Jalpy, multfilm qūlaq qūryşyn qandyratyn qazaq tılındegı sapaly audarma qataryn tolyqtyrdy.
Güldana TALǦATQYZY
