Kün men tünnıŋ teŋeler uaqyty, «Samarqannyŋ kök tasyn erıtetın» jaimaşuaq köktemnıŋ kelgenın bıldıretın jyl basy – Nauryz meiramy esıgımızdı qaǧyp, ışke engelı tūr. Ony bosaǧamyzdan bar qūrmetımızben kütıp alyp ta jatyrmyz. Elımızdıŋ batys öŋırınde Körısu nemese Amal künı syndy igı dästür bastauyn alsa, elordamyz – Astanadaǧy şaralar da ūlyq meiramymyzǧa arnaluda. Sondai bır şaralardyŋ ışınde erek atap öterlıgı – «Kongress-Holl» saraiynda ötken «Armysyŋ, äz Nauryz!» konsertı.
Astana qalasynyŋ Tılderdı damytu basqarmasy jyl saiyn osyndai ataumen qalalyq baiqau ötkızedı. Oǧan aumaqtyq, jergılıktı jäne qūrylymdyq memlekettık organdar, densaulyq, mädeniet, sport mekemelerı, sauda ortalyqtary, qoǧamdyq, tūrmystyq jäne qyzmet körsetu salalarynda eŋbektenıp jürgen adamdar, joǧary jäne arnauly orta oqu oryndary qatysyp keledı. Olardyŋ arasynda üzdık bolyp tanylǧandar arnaiy qūrylǧan komissiia şeşımımen qala äkımdıgınıŋ atynan diplomdar jäne baǧaly syilyqtarmen marapattalady. Al, joǧarydaǧy konsert osy baiqaudyŋ bastauy ıspettes boldy.
Merekelık dumandy «Naz» memlekettık bi teatry «Qys pen köktem» kompozisiiasymen aşyp, ejelgı jaqsy dästürımız – alastau räsımın ötkızdı. Tättılerden şaşu şaşylyp, Qyzyr baba bata berdı. Qazaqstannyŋ eŋbek sıŋırgen qairatkerı Säule Jeldıbaeva «Nauryz duman» änımen mereke körkın qyzdyra tüstı. «Şabyt» festivalınıŋ laureaty Daniiar Mūqanov «Bazaryŋ qūtty bolsyn, ardaqty elım!..» dep Bırjan saldyŋ «Aitbaiyn» şyrqau kögıne jetkızdı. Dombyra ünı qobyz sarynymen jalǧasty. Belgılı änşı Klara Tölenbaeva «Aqqu arman» änın syzyltty.
Keştı jarasymdy jürgızgen Q. Quanyşbaev atyndaǧy memlekettık akademiialyq qazaq muzykalyq drama teatrynyŋ ärtısterı Quandyq Qystyqbaev pen Altynai Nögerbek salt-dästürlerımızge negızdelgen qyzyqty oiyndardy oinatty. Sahnaǧa şyǧuǧa niet tanytqandar toibastardy aityp, besık pen tūsaukeser jyrlaryn qanşalyqty bıletınderın körsettı. Körermenderder arasynda alǧaşqy bolyp suyrylyp şyǧyp, Jūban Moldaǧalievtıŋ «Men qazaqpyn» öleŋın şyǧarmanyŋ ör ruhyna sai oqyp bergen Nūrbolat esımdı bala jinalǧandardy erekşe täntı qyldy. Oiyndarǧa qatysqandardyŋ ışınde äzıl-qaljyŋdy boratqan satirik aǧamyz da, Nauryz merekesıne jyryn arnaǧan aqyn da tabyldy. Önerın tanytqandardyŋ barlyǧy da syi-syiapatsyz qalǧan joq.
Dästürlı jas änşılerdıŋ arasynda eŋ tanymaly Erlan Rysqali desek, qatelese qoimaspyz. Qazır Astana memlekettık filarmoniiasynda qyzmet etıp jürgen ol Jaiau Mūsanyŋ «Aq sisasyn» qūiqyljytty. Ūly Abaidyŋ «Segız aiaǧyn» şyrqady.
«Naz» memlekettık bi teatrynyŋ önerpazdary «Köŋılaşar» biımen sahnany dübırlettı. Jaŋabai Ötegenov elge süiıktı «Aiala» änın salyp, körermenderge du qol şapalaq soqtyrdy. «Serper» dombyraşylar toby qazaq küilerınen popurri ūsyndy.
Osyndai än, bi, küilerden soŋ sahnaǧa söz önerınıŋ saŋlaqtary köterıldı. Qyz ben jıgıt aitysyn jasaǧan Balǧynbek İmaşev pen Aisäule Beisenhan jan-jaqtan qiqu tuǧyzdy.
Nauryzda ekı aqyndy tyŋdatasyŋ,
Jyrynan közdıŋ jasyn qūrǧatasyŋ.
Äz Nauryz – özımnıŋ töl merekem
Qūşaqty aitysqa aşpai, kımge aşasyŋ?!
Aldyna qyz-jıgıt bop kelıp qaldyq
Halyqtyŋ alaiyq dep bır batasyn – dep bastaǧan Balǧynbek Nauryz merekesınıŋ aityssyz ötpeitının eske saldy. Odan keiın jylda «podrujkasy» Ainūr Tūrsynbaevamen aitysatynyn aityp, osy jolǧy Aisäulemen aitysyn Jylqy jylynyŋ «jaŋalyǧy» retınde baǧalady. Zalda otyrǧan keştı ūiymdastyruşy, Tılderdı damytu basqarmasynyŋ basşysy Erbol Tıleşovke aq tılegın arnady. Aisäulege baǧyttalǧan sözınde: «Serıdei bereiın men seltetkızer, Dämdı qyp ūiqyaşar daiyndasaŋ» dep ūlyq mereke kezınde bozbala men boijetkenderdıŋ bır-bırıne syilar syilyqtaryn atap öttı.
Aisäule bolsa: «Köktem keldı qūlpyrtyp kök pen jerdı. Jarqyrap Jaŋa jylym qūşaq jaisa, Ötkennen ūmytarsyŋ ökpeŋdı endı» dep Nauryzdyŋ tatulyq-bırlık merekesı ekenın jyr tılımen kestelep öttı.
Jaqsylyqqa köŋıldı telıgen kün
Jamandyqtan jer betı jerıgen kün.
Aǧaiyn, äz Nauryz qūtty bolsyn! –
Samarqannyŋ kök tasy erıgen kün – dep būl mereke jaqsylyqtyŋ bastauy ekenın de aitty.
Aiylyn tartyp mınıp at kölıktıŋ,
Ūltyma tıl basqarma jaq bolypsyŋ.
Jalauyn ana tıldıŋ jelbıretıp,
Ükısın ülbırettıŋ aq börıktıŋ – degen ol da ädemı teŋeulerımen Tılderdı damytu basqarmasynyŋ atqaryp kele jatqan eŋbegın atap öttı.
Ärı qarai aitys äzıl-qaljyŋ, bır-bırın sözben tüireu formasynda öttı. Aisäule Balǧynbektı saqaldy däu aiuǧa teŋese, Balǧynbek ony qoianǧa teŋedı. Ekı aqyn körermenderdı qyran-topan külkıge batyryp, köŋıl-küilerınıŋ odan saiyn köterıluıne sebep boldy.
Jan saraiy aşylyp otyrǧan halyq aldyna eŋ soŋynda aqyn, änşı-kompozitor Elena Äbdıhalyqova şyǧyp, özınıŋ «Amanat» änın oryndap berdı.
Amanǧali QALJANOV
