Astana äkımı Äset İsekeşev İtaliia Respublikasynyŋ Qazaqstandaǧy Tötenşe jäne ökılettı elşısı Paskuale D’Avinomen kezdestı. Qos tarap sauda-ekonomikalyq jäne mädeni-gumanitarlyq bailanystardy nyǧaitu mäselelerın talqylady.
Elorda basşysy diplomatty elşı qyzmetıne taǧaiyndaluymen qūttyqtap, Qazaqstan men İtaliia arasyndaǧy yntymaqtastyq artatynyna senım bıldırdı.
«Astananyŋ serpındı damuy, investisiialyq tartymdylyǧy jäne aitarlyqtai innovasiialyq potensialy qalamyzdyŋ maŋyzdy artyqşylyǧy bolyp tabylady. Bügıngı taŋda İtaliia Qazaqstannyŋ basty sauda serıktesterınıŋ bırıne ainaldy. Bız memleketter arasynda bolaşaqta ärtürlı qarym-qatynastardyŋ saqtaluyn quana qūptaimyz. Öŋıraralyq yntymaqtastyqtyŋ serpındı damuyna Astana men İtaliianyŋ bırqatar aimaqtary men qalalary arasynda jasalǧan yntymaqtastyq jönınde kelısım sep boldy» dedı Äset İsekeşev.
Astana äkımı «EKSPO-2017» körmesı kezınde Astanaǧa İtaliianyŋ 10 aimaǧynan delegasiialar kelgenın erekşe atap öttı. Olardyŋ qatarynda Kampaniia, Lombardiia, Marke, Toskana men Umbriia, Apuliia, Lasio, Milan, Sisiliia jäne Emiliia-Romania aimaqtary bar. Būl aimaqtar – sany jaǧynan halyqaralyq körmege qatysqan Resei men Qytaidan keiın üşınşı körsetkış.
Paskuale D’Avino öz tarapynan Astanaǧa tamsanǧanyn, 20 jyl ışınde elordada atqarylǧan ısterden ülken äser alǧanyn jetkızdı.
«Rim men Milan qalalarymen belsendı bailanysta bolu üşın tıkelei reister aşyluy kerek. Qazırgı kezde Almaty-Milan jäne Astana-Rim tıkelei reisterın aşu mäselesı şeşılude» degen İtaliia elşısı küzde Astanada ötetın säulet jäne dizain aptalyǧyna italiialyq mamandar qatysatynyn habarlady. Bügıngı taŋda Astanada İtaliianyŋ mädeniet institutyn aşu mäselesı qarastyrylyp jatqanyn jetkızdı.
