Qazaqstan Respublikasy Prezidentınıŋ jüldesı üşın qazaq küresınen ötetın «Qazaqstan barysy» respublikalyq turnirınde elorda namysyn qorǧaityn baluandardy ırıkteitın «Astana qyrany» jarysy öttı. Biyl besınşı ret ūiymdastyrylatyn bairaqty bäsekede Astana atynan küreske şyǧu üşın 23 baluan synǧa tüstı.
«Qazaqstan» sport saraiynyŋ basty alaŋynda töselgen boz kılemde künı boiy beldesken baluandardyŋ şeberlıgın köruge jinalǧan janküier qauymnyŋ da qarasy az bolǧan joq. Jarys aldynda QR Mädeniet jäne sport ministrlıgı Sport komitetınıŋ töraǧasy Elsiiar Qanaǧatov elordanyŋ atynan Elbasy jüldesı üşın alaman saiysqa eŋ myqty baluandar ǧana qatysa alatynyn, osy oraida küreske şyǧatyn astanalyq baluandardyŋ bärıne sättılık tıledı.
Bas töreşı Qazaqstannyŋ eŋbek sıŋırgen jattyqtyruşysy Ǧalym Külekeşev jarys reglamentın jariialaǧannan keiın apaitös jıgıtterdıŋ aiqastary bastalyp kettı. Ekı topqa bölıngen baluandar arasynda qazaq küresınen Qazaqstannyŋ eŋbek sıŋırgen sport şeberı, dziudo, sambo küresterınen bırneşe halyqaralyq därejedegı sport şeberlerı boldy. Bıraz janküierler «Ätteŋ-ai, osy jarystyŋ finalynda kezdesuı mümkın Ǧani Seidıldaev pen Arman Äbeuov bır jaqqa tüsıp qalǧan eken, endı ekeuınıŋ bırı finalǧa jetpei qalatyn boldy ǧoi» dep topşylap ta jatty. Alaida, sol ümıt artqan Arman baluan ekınşı beldesuınde Aibar Abdullovqa ese jıberıp qoidy. Al qazaq küresınen älemnıŋ bırneşe dürkın chempiony, «Astana batyry» jekpe-jek sport klubynyŋ ökılı Ǧani Seidıldaev küresken saiyn şiryǧyp, är qarsylasyn aiqyn basymdyqpen ūta berdı. Söitıp, bırınşı toptan top jaryp finalǧa öttı. Ekınşı toptan osy mekemenıŋ atynan şyqqan Aibat Seiten aqtyq synǧa deiın alqynbai jettı. Osylaişa «Astana batyry» jekpe-jek küres kluby» MKQK (direktory A.Abdrahmanov) baluandary «Astana qyrany» ataǧy üşın küresıp, būl beldesude talai jarystarda top jarǧan «Jaujürek» baluan Ǧani Seidıldaev jeŋıske jettı. Al Aibat Seiten kümıs medal jäne jeŋımpazben bırge «Qazaqstan barysy» respublikalyq turnirınde elorda namysyn qorǧaityn boldy. Üşınşı oryn üşın küreste №7 ORBJSM baluany Aituar Abdulovtyŋ joly boldy.
«Astana qyrany» ırıkteu jarysynyŋ jüldegerlerın Astana qalasy Turizm, dene tärbiesı jäne sport basqarmasynyŋ basşysy Berık Marjyqpaev qūttyqtap, diplomdar, medaldar jäne baǧaly syilyqtar tabys ettı. Sonymen, «Qazaqstan barysy» respublikalyq turnirınde elordamyz Astananyŋ namysyn Ǧ.Seidıldaev pen A.Seiten qorǧaityn boldy. Al, būl alaman aiqas 5 şılde künı «Saryarqa» velotrek keşenınde ötetın bolady.
