ASTANADA ÖNDIRIS ÖRISTEIDI
Astana qalalyq mäslihatynyŋ deputattary «Astana – jaŋa qala» arnaiy ekonomikalyq aimaǧynda ornalasqan öndırıs oryndaryn aralady.
Bügınde Astana eldıŋ barlyq aimaǧy boi tüzeitın qalaǧa ainaldy. Jaŋa önerkäsıptı damytu da elordadan bastau alǧan. Bız ony qalalyq mäslihattyŋ deputattarymen industrialdy-innovasiialyq aumaqty aralaǧanda anyq baiqadyq. Atalǧan aimaq 2001 jyly qūrylǧan. Onyŋ aumaǧy 7 634, 71 gektarǧa sozylyp jatyr.
Deputattar aldymen attyŋ basyn elımızdegı jeŋıl önerkäsıp üzdıkterınıŋ bırı «PİK Astana Iýtariia ltd» JŞS-ne tıredı. Käsıporyn älemdık brend sanalatyn «ZOJE» tıgın maşinalarymen jabdyqtalǧan. Şyǧaratyn önımınıŋ sapasy europalyq nemese türık tekstilınen eşbır kem emes. Äskeri kiımderge de arnaiy tapsyrys alǧan. Sondai-aq, mūnda qonaq üi, meiramhana, medisina salalaryna arnalǧan būiymdar men üige laiyqty tekstil önımderı de daiarlanady. «Biznestıŋ jol kartasy – 2020» baǧdarlamasy aiasynda jüzege asqan käsıporyn qanşama adamǧa jūmys ūsynyp otyr.
Memleketımızdıŋ üdemelı industrialdy-innovasiialyq damu baǧdarlamasy aiasynda jüzege asqan jobalardyŋ bırı – «Tūlpar-Talgo» vagondary ekenı belgılı. Qazırgı künde atalǧan vagondardan qūralǧan jürdek jolauşylar poiyzy elımızdıŋ barlyq aimaqtaryna qatynaidy. Bügınde ispaniialyq kompaniiamen bırlesıp salynǧan zauytta otandyq önım 20 paiyzdan asqan. Jyl saiyn būl körsetkış joǧarylai bermek. Negızınen, jobanyŋ quattylyǧy boiynşa jylyna 150 jolauşylar vagony şyǧarylady. Bügınge deiın 400-ten astam jolauşylar vagony paidalanuǧa berılgen.
Deputattar «Tūlpar-Talgo» zauytynda bolǧan kezde ondaǧy mamandardyŋ jūmysyn jıtı baqylady.
«Jalpy, jolauşylar tasymalyna arnalǧan vagondardyŋ artyqşylyǧy köp. Poiyz saǧatyna 200 şaqyrym jyldamdyqpen jüitkidı. Pnevmatikalyq jabdyqtalu, esıkterdıŋ avtomatty aşylyp-jabyluy, jyldamdyqtan belgı beretın ABS jüiesı de jolauşylardyŋ jailylyǧy üşın qolaily» deidı zauyt direktorynyŋ öndırıs jönındegı orynbasary Vladimir Kiselev.
Qazırgı taŋda «Tūlpar-Talgo» poiyzdarynyŋ qyzmetın millionnan astam jolauşy paidalanuda.
«Elektrovoz qūrastyru zauyty» – elımızdegı eŋ ırı jobalardyŋ bırı. Ol Qazaqstan, Fransiia jäne Reseidıŋ bırlesken käsıporny sanalady. Öndırıstık alaŋnyŋ aumaǧy 27 myŋ şarşy metrden asady. Jylyna 50 elektrovoz qūrastyru josparlanǧan. Bügınde käsıporyn tolyqtai öz quatynda jūmys ısteidı. Mamandar şetelge baryp, arnaiy kurstan ötken. Bügınde otandyq KZ8A elektrovozdaryn şet memleketter de satyp aluǧa qyzyǧuşylyq tanytyp otyrǧan körınedı.
Sonymen bırge deputattar «Qazaqstan Aselsan injiniring» JŞS-nıŋ qyzmetımen tanysty. Qazaq-türık bırlesken käsıporny negızınen elımızdıŋ qorǧanys-önerkäsıp keşenı önımderı sanalatyn elektrondyq-optikalyq qūrylǧylar, elektrondyq platalar men linza öndırısı üşın tehnologiialyq qūjattar, materialdar men jabdyqtar şyǧarady. Käsıporyn tolyqtai uaqyt talabyna sai joǧary tehnologiialyq qūraldarmen jaraqtalǧan.
Bır baiqaǧanymyz, industrialdyq aimaqta ornalasqan öndırıs oryndarynda eŋbek etıp jürgenderdıŋ denı – jastar.
Tüiındep aitqanda, mäslihat deputattary är käsıporynnyŋ jūmysymen jaqyn tanysyp, özderın tolǧandyrǧan sūraqtaryn qoiyp, mamandardan naqty jauaptar aldy.
Azamat ESENJOL