Elordadaǧy №3 balalar kıtaphanasynda qazaq balalar ädebietınıŋ klassigı, körnektı jazuşy Berdıbek Soqpaqbaevtyŋ tuǧanyna 95 jyl toluyna orai «Ädebietke balalyqty äkelgen» atty ädebi keş öttı. Keşke belgılı balalar jazuşysy Tolymbek Äbdıraiym qatysty.
Qazaq balalar ädebietınde Berdıbek Soqpaqbaevtyŋ salǧan soqpaǧy bölek. Şyǧarmaşylyq jolyn öleŋmen bastaǧan qalamger keiın prozaǧa bet būryp, jetkınşekter ömırınen tamaşa äŋgıme-hikaiattar jazdy. Äsırese, suretkerdıŋ «On alty jasar chempion», «Qaidasyŋ, Gauhar?», «Menıŋ atym Qoja» atty taŋǧy şyqtai möldırep tüsken povesterın älı künge deiın balalar qyzyǧyp oqidy. «Menıŋ atym Qoja» şyǧarmasynyŋ jelısımen tüsırılgen film 1967 jyly Kann qalasyndaǧy jastar men balalarǧa arnalǧan halyqaralyq festivalınde baǧaly syilyqqa ie boldy. Jazuşy özınıŋ balalyq şaǧyn özek etken «Balalyq şaqqa saiahat», «Ölgender qaityp kelmeidı» degen ekı romany da şynşyldyǧymen oqyrmandy baurap alǧan.
Keş barysynda Tolymbek Äbdıraiym oquşylarǧa qarymdy qalamgerdıŋ ömır joly men şyǧarmaşylyǧy turaly äŋgımelep, bır ūsynysyn bıldırdı.
– Berdıbek aǧamyz 15 qazanda ömırge kelgen. Soǧan orai bas qalada jyl saiyn qazan aiynda Soqpaqbaevtyŋ tuǧan künıne arnap balalar ädebietınıŋ aptalyǧyn ötkızse deimın. Būl bır jaǧynan jetkınşekterdıŋ kıtap oquǧa degen qyzyǧuşylyǧyn oiatady. Sol aptalyqta balalar taqyrybyna qalam tartyp jürgen aqyn-jazuşylar qatysyp, oquşylarmen kezdesıp, öz şyǧarmalary jaiynda oi tolǧap, ūlaǧatty äŋgıme örbıtse, taǧylymdy dünie bolar edı. Būl şara elordadan bastalyp, respublikalyq deŋgeige ūlassa dep oilaimyn, – dedı qalamger.
Sondai-aq kıtaphana meŋgeruşısı Maral Aqtaeva jazuşy turaly aitqan aituly tūlǧalardyŋ estelıgın oquşylarǧa oqyp berdı. Keş soŋynda balalar qazaq ädebietı klassigınıŋ jaryq körgen kıtaptarynan ūiymdastyrylǧan körmenı tamaşalady.
