Elordada 15-ınşı halyqaralyq «Astana» bard-oryndauşylar festivalı bolyp öttı. Aua raiynyŋ myŋ qūbylǧanyna qaramastan qatysuşylar men körermenderdıŋ merekelık köŋıl-küiı köterıŋkı boldy.
Üş künge sozylǧan festival barysynda neşe türlı konkurstar men oiyn-sauyq baǧdarlamalary ūiymdastyrylyp, köptegen äsem äuender astanalyq tūrǧyndardy qaita-qaita taŋdai qaqtyrdy.
Körermenderdıŋ oryndauşylarǧa degen ystyq yqylasy da sät saiyn arta tüspese, eş kemımegenı baiqaldy. Köŋıldıŋ jaily bolǧany sonşa, än oŋai şyrqaldy. Ombydan kelgen «Kamerton», qaraǧandylyq «Marianna» men «Piatnisa» jäne elordalyq «Belyi kit» ansamblderı oryndauşylyǧymen festivaldıŋ körkın odan ärı qyzdyra tüstı. Būl jerde älsızdık tanytqan eşkım körınbedı, bärınıŋ dauysy qūlaqqa jaǧymdy, köŋılge qonymdy. Byltyrǧyǧa qaraǧanda oryndauşylar deŋgeiınıŋ edäuır öskenın baiqadyq.
Al Mihail Şerbakov pen Iýlii Kimnıŋ bır jarym saǧattyq baǧdarlamasy tyŋdarmandar üşın eŋ ülken syilyq boldy. Ädemı bezendırılgen turistık bazada ötken festivaldıŋ dybys pen jaryq sapasy jaǧyn da auyz toltyryp aituǧa bolady. Joǧaryda atalǧandardan bölek, Jeŋıs Ysqaqova, Raisa Nur, Mihail Kochetkov, Vadim Egorov, Aleksei İvaşenko, Vladimir Truiianskii jäne Aleksandr Boromotov siiaqty taǧy da basqa kıl myqtylardyŋ keibırı öz önerlerın körsetse, ekınşılerı ädılqazylyq ettı.
Alǧaşqy künı Resei men Qazaqstannyŋ ärtürlı qalalarynan kelgen märtebelı meimandardyŋ qatysumen qalalar şeruı bolyp öttı. Ūiymdastyruşylardyŋ aituynşa, avtorlyq festivaldı jer-jerden kelgen şamamen 1500-ge juyq körermen tamaşalaǧan eken.
Üş kündık festivaldı qorytyndylai kele, «avtor», «sazger», «oryndauşy» jäne «ansambl» atalymdary boiynşa üzdıkter anyqtaldy. «Avtor» atalymynda astanalyq Dmitrii Davinskih laureat atansa, qaraǧandylyq Vadim Kim diplomant boldy. Al oryndauşylar arasynan laureat şyqpaǧanmen, qaraǧandylyq qos önerpaz Katia Vitek pen Aleksandra Şarafutdinova diplomant atandy. «Ansambl» atalymynda Ombydan kelgen «Kamerton» laureat atanyp, diplomant bolu qaraǧandylyq «Mariannanyŋ» maŋdaiyna jazyldy. Al arnaiy syilyqqa Astana qalasynyŋ tūrǧyny Quanyş Maqsotov pen Qaraǧandy qalasynan kelgen qonaq Katia Vişniakova ie boldy. Tek qana «Sazger» atalymynan alǧa suyrylyp şyǧar eşkım tabylmady.
Osylaişa halyqaralyq festival joǧary deŋgeide öttı. «Ögız de ölmedı, arba da synbady», iaǧni oryndauşylar da mäz, tyŋdarman da taŋdai qaǧyp tarqasty.
Nūrislam QŪSPANǦALİ
